b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré 2)

(1)  Oget di alisiramënć por frabiché dla Provinzia por fà sö y cumprè abitaziuns por le bojëgn primar de n’abitaziun po ma ester abitaziuns che à les carateristiches de abitaziuns popolares.

(2)  Oget di alisiramënć por frabiché dla Provinzia por recuperè abitaziuns po ester sides les abitaziuns che à les carateristiches de abitaziuns popolares che chëres che à les carateristiches de abitaziuns economiches.

(3)  Tan dî che le lian sozial por le frabiché abitatif alisiré aladô dl articul 62 é anotè tl liber fondiar ne po abitaziuns che é bele stades n iade oget de alisiramënć por frabiché dla Provinzia por fà sö, cumprè o recuperè abitaziuns por le bojëgn primar de n’abitaziun nia ester oget de alisiramënć por frabiché dla Provinzia por la cumpra de abitaziuns aladô de chësta seziun. Chësta rajun d’estlujiun ne vel nia sce le lian sozial por le frabiché abitatif alisiré é ma gnü anotè porvia che l’abitaziun é gnüda realisada sön n terac destiné al frabiché abitatif alisiré.63) 

(4)  Por gnì lasciades pro al alisirimënt de recuperada mëss les abitaziuns avëi almanco 25 agn. Le medemo vel por d’atri frabicać che n’à nia na destinaziun d’adoranza sciöche abitaziun mo che mëss gnì trasformà te abitaziuns. Sce ti 25 agn dan la domanda él gnü fat certi laurs de recuperada alisirá pro l'abitaziun, ne vëgnel ma por chësta sort d'intervënc dé degun alisiramënt. 64) 65)

(5)  Ai alisiramënc por recuperé abitaziuns vëgnel lascé pro i intervënc de recuperada aladô dl articul 62, coma 1, lëtres b), c) y d) dla lege provinziala di 10 de messé dl 2018, n. 9, y mudaziuns suandëntes, cun lapró la demoliziun totala y la recostruziun. La recostruziun pó gní fata tl medemo post o atira dlungia. Sce le frabicat da trá jö é te n post olache al é la proibiziun da frabiché por costruziuns nöies spo pól gní lascé pro al alisirimënt por la recuperada ince la recostruziun dl frabicat te n ater post. 66) 

(6)  Por faziun di alisiramënc por frabiché provinziai regolamentá da chësta seziun y dala seziun 7 vëgnel conscidré ampliamënc de cubatöra cina al 20 porcënt sciöche recuperada. Te vigni caje vëgnel araté na recuperada sce al vëgn amplié tla mosöra mascimala n volum bele esistënt, trasformé te n'abitaziun popolara aladô dl articul 41, ince mudan la destinaziun d’adoranza, cun na suraspera da d'adoré cina a 110m2. Sce al vëgn anuzé le bonus d'energia por le ressanamënt energetich preodü dal articul 3 dla deliberaziun dla Junta provinziala di 5 d'agost dl 2104, n. 964 vel sciöche recuperada i somasc nia abitabli en regola che vëgn recuperá por gní abitá ince sce an vá sura le 20 porcënt dl ampliamënt de cubatöra, sce chisc somasc vëgn alzá cina a arjunje la mosöra che ó ester por l'abitabilité. La cubatöra implü pó ma gní anuzada sön somas y la suraspersa abitabla dl'unité abitativa dl'abitaziun ne pó nia superé chëra de n'abitaziun popolara aladô dl art. 41. 67) 68) 

(7)  Cun regolamënt d’esecuziun vëgnel regolè i standarg minims por i intervënć de recuperada. I standarg mëss inće tó en conscidraziun le respet dles normes por les limitaziuns dl’adoranza d’energia por i implanć da scialdè, de chëres dl’isolaziun termica di frabicać aladô dla lege di 9 de jenà 1991, nr. 10 y inće de chëres dles leges provinziales che reverda i provedimënć cuntra l’incuinamënt acustich.

(8)  I alisiramënć por la recuperada vëgn paià fora do avëi dè jö la documentaziun aposta. 69)