(1) Restan mpe cie che ie stabilì dal articul 86, coma 5, ie i ntervënc de frabica nunziei tla njonta E, realisei zënza la SZCA/SCIA o autramënt da cie che chësta vëija danora, da desmëter o da zaré ju a cura y a spëises di sogec respunsabli dla viulazion, nchin a n tiermul adatà nia sëura 120 dis, fissà dal’autorità respunsabla dla verdia.
(2) Canche la opres realisedes zënza SZCA/SCIA ie ntervënc de dertureda y ressanamënt de cunservazion y de manutenzion straurdinera, dejëuc sun imubilies a uni maniera liedes n basa a leges stateles, cumanda l’autorità cumpetënta dla verdia dl respet dl liam, restan mpe l’aplicazion de d’autra mesures y straufonghes preududes da normes n forza, la represtinazion dla situazion y la dà na straufonga da 600,00 euro a 6.000,00 euro aldò dla gravità dla viulazion.
(3) Sce la opres realisedes zënza SZCA/SCIA o autramënter da chësta ie ntervënc de dertureda y ressanamënt de cunservazion o manutenzion straurdenera, dejëuc sun imubilies a uni maniera liedes n basa a leges provinzieles o n basa a previjions de strumënc urbanistics o de cuntreda o de plans de setor, cumanda l’autorità respunsabla dla verdia la respristinazion dl stat dla lueges a cura y a spëises di sogec respunsabli dla viulazion y la dà na straufonga da 600,00 euro a 6.000,00 euro aldò dla sort dla opres y aldò dla gravità dla viulazion; l resta mpe l’aplicazion de d’autra mesures y straufonghes preududes da normes n forza.
(4) La despusizions nunziedes te chësc articul vën nce aplichedes ai ntervënc realisei zënza la CSLC/CILA o autramënter da cie che chësta vëija danora; te chësc cajo iel preudù na straufonga de 1.000,00 euro. Chësta straufonga vën arbasseda de doi terzi, sce la comunicazion vën fata ulentermënter ntan che l ntervënt vën dejëut. Sce la comunicazion ne vën nia fata ulentermënter muessa l nteressà/la nteresseda ti rembursé al’autorità respunsabla dla verdia la spëises per l azertamënt dl’ejistënza dla cundizions curespundëntes.
(5) Chësc articul vën nce aplicà pra frabiches nia finedes per chëles che la SZCA/SCIA nunzieda tl articul 75 ie destumeda, ora che sce l ie unì prejentà mo na SZCA/SCIA nchin al tiermul nunzià tl articul 75, coma 5. La medema fazion vën aplicheda tl cajo che l jì inant cun i lëures per chëi che l ie unì prejentà la SZCA/SCIA ie unì pruibì aldò dl articul 77, coma 5.