(1) Por che n’abitaziun vëgnes conscidrada n’abitaziun popolara ne pora nia avëi les carateristiches de n’abitaziun de lus aladô dl decret ministerial di 2 d’agost 1969 y ara mëss:
- avëi almanco un y nia plü co cinch locai d’abitaziun suraprò ai locai secundars (ćiasadafüch, bagn, tloset, local de deponüda y entrada);
- formè n’abitaziun independënta;
- ademplì les condiziuns odüdes danfora dai regolamënć por l’igiena y le frabiché;
- tó ite na spersa abitativa ütla nia sot ai 28 y nia sura i 110 metri cuadrać.
(2) Abitaziuns popolares vëgn inće conscidrades chës abitaziuns che é gnüdes fates sö sön la basa dla conzesciun da frabiché dada fora denant che la lege provinziala di 25 de novëmber 1978, nr. 52 (30 de dezëmber 1978) jiss en forza, olache la spersa abitativa ütla ne va nia sura i 130 metri cuadrać; les atres carateristiches d’abitaziun popolara aladô dl coma 1 mëss indere valëi inant.
(3) Por les families ch’é metüdes adöm da plü de cinch componënć po la spersa abitativa ütla gnì aumentada de 15 metri cuadrać o, tl cheder de chësc limit, pol gnì ajuntè n local d’abitaziun por vigni componënt do dal cuinto.
(3-bis) Sön la basa dl majer bojëgn d’abitaziun de na familia, te chëra che al vir na porsona cun n handicap fisich permanënt, stabilësc la Junta provinziala te 180 dis i criters cun chi che ara tëgn cunt dl aumënt dl bojëgn abitatif pro l’assegnaziun de abitaziuns en locaziun y te düć i provedimënć dl frabiché alisiré. 71)
(4) Tl caje ch’al vëgn recuperè abitaziuns pol gnì desvié por rajuns de sconanza di bëgns culturai, de sconanza dla contrada y de sconanza dl carater unich dl post dales prescriziuns indicades tl coma 1, lëtres b) y d).
(5) Le damanant pó s’arjigné, surapró al’abitaziun oget dl alisirimënt por frabiché, ciamó n’abitaziun che fej fora n’unité imobiliara autonoma. Por chësta abitaziun mëssel gní surantut les oblianzes dl frabiché convenzioné preodü dal articul 39 dla lege provinziala di 10 de messé dl 2018, n. 9, y mudaziuns suandëntes. Tl caje de na costruziun nöia ne pó la spersa abitativa dl’abitaziun suplementara nia ester majera co le 50 porcënt dla spersa abitativa dl’abitaziun oget dl alisirimënt. Tl caje de recuperada ne pó la spersa abitativa dl’abitaziun suplementara nia ester majera co la spersa abitativa dl’abitaziun oget dl alisirimënt. 72)
(6) Le damanant po realisé, suraprò al’abitaziun oget dl alisirimënt por frabiché, locai che fej fora n’unité imobiliara autonoma, por l’eserzize profescional de n’ativité de na picia dita aladô dl articul 2083 dl codesc zivil da pert dl damanant o dla fomena o dl om che convir. Sc’ara se trata de n’ativité de prestaziun de sorvisc ne po la spersa ütla de chisc locai nia ester majera co chëra dl’abitaziun alisirada; chësta limitaziun ne vel nia sc’ara se trata de n’ativité aladô dla lege provinziala di 14 de dezëmber 1988, nr. 58, “Normes tla materia di eserzizi publics”.
(7) D’atres carateristiches dles abitaziuns popolares po gnì stabilides cun regolamënt d’esecuziun.
(8) Ai alisiramënć por la recuperada de abitaziuns por le bojëgn primar de n’abitaziun pol inće gnì lascè pro i proprietars d’abitaziuns te frabicać olache le proprietar afitëia bele da almanco cinch agn ćiamenes y abitaziuns de vacanza aladô dla lege provinziala di 11 de mà 1995, nr. 12, o à n’ativité de agriturism aladô dla lege provinziala di 14 de dezëmber 1988, nr. 57 o eserzitëia n’ativité turistica aladô dla lege provinziala di 14 de dezëmber 1988, nr. 58.
L'art. 41, coma 3-bis, é gnü injuntè dal art. 23, coma 1, dla L.P. di 17 de jenà dl 2011, n. 1.
L'art. 41, coma 5 é gnü naota sostituí dal art. 5 dla l.p. di 10 d'agost dl 2001, n. 8, y spo dal art. 28, coma 6 dla l.p. di 19 d'agost dl 2020, n. 9.