(1) Pro la conzesciun d’alisiramënć por frabiché dla Provinzia mëssel gnì tut en conscidraziun dantadöt:
- les condiziuns economiches dla familia y inće les condiziuns economiches dla porsona che convir te na relaziun somiënta al matrimone;
- le numer dles porsones che fej pert dla familia;
- la dorada dla residënza te un o plü comuns dla provinzia.
(2) D’atri criters de preferënza é:
- le sfrat nia por gauja de inademplimënt dles oblianzes dl contrat o de imoralité tan inant ch’al reverda n contrat d’afit tomé che á doré almanco trëi agn y a condiziun che le damanant desmostres tres n zertificat dl ofize anagrafich d’avëi albü por almanco trëi agn alalungia la residënza te chë abitaziun da olache al vëgn sciuré fora; 96)
- la revocaziun de cuartiers de sorvisc por ponsionamënt por avëi arjunt le limit d’eté anagrafica o de sorvisc, o por mort dla fomena o dl om che â chësc dërt y a condiziun che le damanant à ocupé cuartiers de sorvisc dan le ponsionamënt por almanco diesc agn;
- l’ester inćiasè te n cuartier detlarè nia da podëi abité aladô dla lege;
- l’ester inćiasè te n cuartier surafolè;
- le mëte sö na familia nöia;
- la situaziun olache le damanant o n mëmber dla familia por chël ch’al mëss ćiamò gnì fistidié é mutilé, invalid dl laûr o invalid zivil.
(3) 97)
(4) Chi che fej domanda mëss dé dant la consistënza dl patrimone abitatif di geniturs, di joceri y di mituns tres na detlaraziun fata aladô dl articul 47, coma 1 dl decret dl Presidënt dla Republica di 28 de dezëmber dl 2000, n. 445. Al é ince da dé dant les abitaziuns che é gnüdes alienades ti cin’agn dan la presentaziun dla domanda. 98)
(5) Cun regolamënt d’esecuziun vëgnel stabilí le numer de punc che vëgn atribuí ai criters de preferënza preodüs dai comesc 1 y 2. Por ti podëi pormez ai alisiramënc por frabiché por la costruziun y la cumpra de abitaziuns por le bojëgn abitatif primar vëgnel damané 20 punc. 99)
(6) Le numer de punć por le sfrat vëgn reconesciü sce la domanda por i alisiramënć vëgn presentada anter chisc terminns:
- tl caje ch’al vëgn convalidé la desdita deache l’afitanza é rovada, do che le contrat d’afit é tomè y te vigni caje anter n ann;
- tl caje ch’al vëgn convalidé le sfrat anter n ann dal provedimënt che convalidëia le sfrat.
(7) Te vigni caje vëgn le numer de punć por le sfrat reconesciü ćina che le damanant ocupëia inant l’abitaziun o à n’atra sistemaziun provisora.
(8) Por l’atribuziun dl numer di punć por le sfrat ne vëgn i sfrać danter parënć en ligna direta nia reconesciüs.
(9) Ales families tocades dal sfrat aladô dl coma 2, lëtra a) vëgnel parifiché l’om o la fomena cun mituns a süa ćiaria, che mëss s’un jì dal’abitaziun do s’avëi despartì. Sce do da trëi agn dala separaziun ne vëgnel nia presentè anter i sis mëisc che vëgn domanda de deslié o anulè les faziuns ziviles dl matrimone y sce dedô ne vëgnel nia metü dant la sentënza definitiva por deslié o anulè les faziuns ziviles dl matrimone, spo vëgnel revochè l’alisiramënt por frabiché, sce le numer di punć por le sfrat é stè determinant por l’amisciun al alisiramënt.
La lëtra a) dl art. 47, coma 2 é gnüda sostituida insciö dal art. 23, coma 1 dla l.p. di 6 de messé dl 2017, n. 8.
L’art. 47, coma 3, é gnü abroghé dal art. 36, coma 5 dla l.p. di 23 de messé dl 2021, n. 5.
L’art. 47, coma 4 é gnü sostituí insciö dal art. 36, coma 6 dla l.p. di 23 de messé dl 2021, n. 5.
L’art. 47, coma 5 é gnü naota sostituí dal art. 36, coma 7 dla l.p. di 23 de messé dl 2021, n. 5, y spo integré insciö dal art. 6, coma 4 dla l.p. di 22 de dezëmber dl 2022, n. 15.