(1) Eserzizies rezetifs nia a carater d’albierch ie la ustaries da mont, i campings, i paejes turistics, la cëses y i cuatieres per feries, i cunvic per feries y i albiercs per la junëza, la plazes per autocaravan y i hotiei sparpaniei. 6)
(2) Ustaries da mont ie eserzizies nluegei tla montes, che ne ie nia da cualifiché sciche sostes da mont aldò dla lege provinziela di 7 de juni 1982, n. 22 y mudazions suzessives, y che pieta da maië y da bever, da durmì y eventualmënter d’autri servijes, dantaldut a arpizadëures y persones che va a pe.
(3) Campings ie eserzizies publics rezetifs menei unitermënter, che pieta almanco vint plazes, sun na spersa siveda ite, per la permanënza de turisć, che sta iló cun tendes, camper y d’autri mesuns de pernuetamënt autonoms; i campings muessa vester njiniei ite aldò.
(4) I paejes turistics ie eserzizies rezetifs davierc al publich y menei unitermënter, njiniei ite, eventualmënter, ënghe cun servijes per l tëmp liede, sun sperses sivedes ite, per la permanënza te de pitla uniteies, de turisć che ie zënza camper, tendes o vel’ da de tel.
(5) Cëses y cuatieres per feries ie frabiches cun mubilia, te na cumpëida nia mëndra che cinch, menedes unitermënter te na forma mprenditoriela, per unì fitedes a turisć per una o deplù sajons, zënza ufierta de servijes zentralisei, cun cuntrac che ne vel nia plu giut che trëi mënsc ndolauter.
(6) Cunvic per feries ie la strutures rezetives njiniedes ite per la permanënza de persones o grupes de persones nia menedes aldò di canai cumerziei gastronomics, ma da enc publics, assoziazions y istituzions religëuses, che lëura zënza fins de davani per traverc soziei, culturei, assistenziei, religëusc o sportifs, o nce da enc y aziendes per ti dé albierch a si dependënc y ala families de chisc.
(7) Coche lueges d’ancunteda internaziunela ie i albiercs per la junëza strutures per la junëza aldò dla lege provinziela dl prim de juni 1983, n. 13. I vën menei aldò dla diretives dla International Youth Hostel Federation (IYHF) y porta pro - ti pitan pernuetamënt y permanënza a bon marcià a viagiadëures singui, a grupes juniles y de sculeies - ala promozion dl’atività de viac dla junëza, al’urganisazion de enes de furmazion y workshops y la feries o ativieteies recriatives de jëunes y jëuni y families. 7)
(8) La sperses per plazes per autocaravans ie sperses da parché publiches che possa unì preududes dai chemuns y ulache manco che 20 autocaravans possa parché per al plu 72 ëura. Do che n autocaravan à parcà per 72 ëura ndolauter sun na plaza muessel jì demez dala spersa y l possa se nuzé inò de chësta strutura do che l ie passà trëi dis. I organns cumenei sëurastanc ie de verdia che la usservanza dl lim de al plu 72 ëura vënie tenida ite. L chemun possa se cruzië diretamënter dla costruzion y dla gestion dla sperses da parché per autocaravans o les sëurandé a sogec privac. L chemun determinea uni ann la tarifes per la nuzeda dla sperses da parché per autocaravans. L ie da respeté la despusizions nunziedes tl articul 44 y chëles sun la comunicazion statistica. Chi che n la data dla jita n forza de chësc coma fajova n’atività autoriseda semienta a chëla ndicheda iló, possa la dejëujer inant tla medema mesura, fajan na comunicazion per fins statistics y de segurëza publica dla persones che ie tl autocaravan. 8)
(9) I hotiei sparpaniei ie eserzizies rezetifs davierc al publich, cun gestion unitera, de chëi che la majons o uniteies abitatives ie desluegedes a na maniera sparpanieda te costruzions defrëntes te n zënter storich y urganisativamënter cunliedes a na frabica prinzipela. La distanza dala frabica prinzipela ne daussa nia vester majera che 300 metri. La majons y la uniteies abitatives vën metudes a despusizion, nce da patrons defrënc, aldò dl patrimone da frabiché esistënt y zënza vel’ mudazion dl liam d’adurvanza urbanistica. I hotiei sparpaniei muessa vester costituii da almanco set majons o uniteies abitatives te almanco trëi costruzions defrëntes o pertes de chëstes. Ora che la puscibltà de durmì muessel unì pità l gusté, che vën dat ora diretamënter te majon o tla unità abitativa o te na sala aposta tla frabica prinzipela. L possa oradechël unì pità d’autri cëifs diretamënter o tres cunvenzion cun d’autri eserzizies publics. 9)
L articul 6, coma 1, ie n iede unì remplazà dal articul 2, coma 2, dla L.P. di 14 de lugio 2015, n. 8, y dadedò mudà nsci dal articul 55, coma 1, dla L.P. di 11 de lugio 2018, n. 10.
L coma 7 ie unì remplazà dal articul 20, dla L.P. di 14 d’agost 2001, n. 9.
L articul 6, coma 8, ie unì njuntà dal articul 2, coma 3, dla L.P. di 14 de lugio 2015, n. 8, dadedò mudà nsci dal articul 20, coma 1, dla L.P. di 23 de lugio 2021, n. 5, y dal articul 8, coma 1, dla L.P. di 10 de jené 2022, n. 1.
L art. 6, coma 9, ie unì njuntà dal articul 55, coma 2, dla L.P. di 11 de lugio 2018, n. 10.