(1) Do che l’Agenzia competënta á ciafé la comunicaziun de azertamënt aladô dl articul 13 che al esist n handicap, ti damanera ala porsona interessada por controlé sce ara á le dërt da ciafé les prestaziuns economiches por invalig zivii, verc zivii y surc, na detlaraziun sostituënta olache ara detlarëia:
- da avëi la residënza tla provinzia de Balsan;
- da ester n zitadin talian/na zitadina taliana o dl'Uniun Europeica (UE), o n zitadin/na zitadina de n Paîsc terzo che á l'autorisaziun de sojornanza de altamo 1 ann; al é da ajunté na copia.
(2) Por ciafé na prestaziun preodüda dal articul 7, coma 1, detlarëia la porsona interessada ince:
- che ara ne ciafa degöna ponsiun de sorvisc o de vitima de vera y che ara ne ciafa gnanca da n’aministraziun publica na ponsiun sciöche indenisaziun por n inzidënt sön le laur, por le medemo handicap por chël che ara damana prestaziuns economiches por invalidité zivila;
- le davagn araté da sotmëte a IRPEF dl ann dla prestaziun.
(3) Sce l'Agenzia por le svilup sozial y economich ne ciafa degöna resposta ala domanda preodüda dai comesc 1 y 2, se ghirera tres lëtra racomanada cun recioiüda derevers na resposta. Sce al passa 60 dis zënza resposta, ne vëgn la domanda nia azetada deache al n’é nia gnü mené ite i documënc che jô debojëgn. Le damanant pó indô fá domanda te vigni momënt pro l’Agenzia don jö la documentaziun damanada; te chësc caje vëgn la prestaziun paiada fora dal pröm de dl mëis do chël olache al é gnü fat la domanda nöia.
(4) Le benefiziar de na prestaziun preodüda dal articul 7, coma 1, reconesciüda pro la pröma licuidaziun aladô dl davagn probabl detlaré, ti da jö al'Agenzia por le svilup sozial y economich, cina ai 30 de setëmber dl ann dedô, na detlaraziun dl davagn personal da sotmëte a IRPEF arjunt veramënter. La detlaraziun öga da controlé che al ne vëgnes nia superé le limit mascimal de devagn tl pröm ann de licuidaziun dla prestaziun, sciöche ince da azerté le dërt da la ciafé dal secundo ann de licuidaziun y cina ai 30 de setëmber dl ann dedô a chël olache al mëss gní dé jö la detlaraziun.
(5) Ai sogec che ne dá nia jö la detlaraziun dl davagn arjunt veramënter cina le termin preodü dal coma 4, do l'avëi lascé alsavë y do che al é passé 30 dis zënza avëi ciafé na resposta, vëgnel sospenü l'erogaziun dles prestaziuns coliades al davagn, pian ia dal mëis de dezëmber. Sce al vëgn dé jö i dac sön le davagn cina le termin preodü por la presentaziun dla detlaraziun suandënta, vëgnel fat pié ia danü la prestaziun pian ia dal mëis dedô cun erogaziun di aretrac; sce la comunicaziun vëgn dada jö do chësc termin ne vëgnel paié degun aretrat.
(6) Le davagn dla porsona che fej domanda de prestaziun ne pó nia ester majer co le limit de davagn varënt dl ann de referimënt. 30)