d) Lege Provinziala di 12 de mà dl 2010, n. 61)2)
Lege sön la sconanza dla natöra y d’atres desposiziuns

[(1) Por ći che reverda les sorts de plantes sot a sconanza y les sorts de tiers nia sotmetüdes ales leges provinziales sön la ćiacia y sön la pëscia, po le diretur o la direturia dla Repartiziun provinziala Natöra y contrada conzede derogaziuns dles desposiziuns preodüdes dal articul 4, coma 5, y dal articul 7, coma 4, por certi raiuns y tëmps limità. Dantadöt sce al ne esist nia d’atres bones soluziuns y sce al ne vëgn nia manacè le mantignimënt te na bona condiziun de conservaziun dla popolaziun dla sort interessada te so raiun de difujiun naturala, vëgnel conzedü chëstes derogaziuns:

1. por sconè les plantes y i tiers salvari y conservè sü habitać naturai;
   
2. por tignì fora de gragn dagns, dantadöt ales coltivaziuns, al zidlamënt, ai bosć, ai pësc y ales eghes, sciöche inće a d’atres formes de proprieté;
   
3. tl interès dla sanité y dla segurëza publica o por d’atres rajuns obliëntes de gran interès publich, cun laprò les rajuns de natöra soziala o economica, y por rajuns che porta pro a conseguënzes positives de importanza primara por l’ambiënt;
   
4. por la didatica o la inrescida, le repopolamënt y la reintroduziun de sorts y por operaziuns de reproduziun che va debojëgn por chësc fin, cun laprò la reproduziun artifiziala dles plantes;
   
5. por conzede de apié y tignì sö n numer limité y spezifich de sorts preodüdes tl’injunta IV dla diretiva habitat, te condiziuns controlades a na moda rigorosa, sön basa seletiva y te na mosöra limitada.
   

(2) Vigni dui agn ti ortia le diretur o la direturia dla Repartiziun provinziala Natöra y contrada na relaziun sön les derogaziuns conzedüdes aladô dl coma 1 ales autoritês nazionales competëntes.] 3)

(3)  La Junta provinziala scrì dant les mosöres adatades por le prelevamënt y la nuzaziun dles sorts de tiers y plantes preodüdes tl’injunta V dla diretiva habitat, sce al va debojëgn por süa sconanza.