(1) Tl raion de nridlamënt iel lascià pro la trasfurmazion de volum de frabica ejistënt te volum cun d’autra destinazions de nuzeda do la cancelazion d’autri liams per fins turistics eventuei, sce l ie cumpatibl cun i strumënc de planificazion n forza. Tl cajo de ntervënc de frabica nunziei tl articul 62, coma 1, pustoms c) y d) possa ti raions mescedei l volum de frabica ejistënt destinà a cuatieres o a ativiteies de servisc o al cumerz ala menuda, coche nunzià tl articul 23, coma 1, pustoms a) b) y c) te uni cajo unì trasfurmà tl cheder dla categuries de destinazion de nuzeda nunziedes. L volum de frabica oget de trasfurmazion ie sometù ala regulamentazion aldò dl articul 38. Tl dedite de na frabica muessa almanco l 60 percënt dl volum unì destinà a nuzeda abitativa. 74)
(2) Tl’autorisazion de ntervënt iel da preudëi la demolizion dla pert de volum de frabica ejistënt tl mumënt che l vën dat l’autorisazion che ne possa nia unì trasfurmeda aldò dl coma 1. Te caji mutivei avisa possa l Cunsëi de Chemun o la Jonta de Chemun ti chemuns cun la populazion sëura 50.000 abitanc, do avëi tëut ite l arat dla Cumiscion cumenela per l teritore y la cuntreda, lascé pro la trasfurmazion ntiera o n pert dl volum de frabica. Te chësc cajo iel da fé n paiamënt de cumpensazion per la desvieda dai strumënc de planificazion, determinà aldò di criteres nunziei tl articul 19. L paiamënt cumpensatif ne ie nia da fé tl cajo che l se trate de frabiches sometudes al liam de defendura storich-artistica y sce la demolizion dla cubatura che superea l indesc de frabicabltà dl grunt ne ie, aldò dl arat dla Sëurantendënza provinziela di Bëns culturei, nia puscibla. 75)
(3) Dedora dl raion de nridlamënt ne daussa l volum cun la destinazion de nuzeda de atività d’eserzize publich nia avëi na destinazion de nuzeda defrënta, nce tl cajo che la frabica vënie zareda ju y po inò fata su.
(4) I eserzizies de rezezion nluegei ora dl raion de nridlamënt, cun al plu 25 lueges liet n la data di 7 d’agost 2013, possa unì trasfurmei te cuatieres resservei a persones residëntes y i possa, restan mpe l liam curespundënt, unì adurvei n desvieda dala despusizions nunziedes tl articul 39 per l fit de majons y cuatieres mubiliei per feries y per ativiteies de feries sun l luech da paur. 76)
La sëurascrita dl articul 36 ie unida barateda ora nsci dal articul 4, coma 3, dla L.P. di 10 de jené 2022, n. 1.
L art. 36, coma 1, ie n iede unì baratà ora dal art. 4, coma 4, dla L.P. di 10 de jené 2022, n. 1, dadedò mudà dal 'art. 7, coma 6, dla L.P. di 16 d’agost 2022, n. 10, y dal art. 12, coma 1, dla L.P. dl prim de juni 2023, n. 9.
L art. 36, coma 2, ie n iede unì mudà dal art. 4, coma 5, dla L.P. di 10 de jené 2022, n. 1, y dadedò dal art. 12, comes 2 y 3, dla L.P. dl prim de juni 2023, n. 9.
L articul 36, coma 4, ie unì baratà ora nsci dal articul 11, coma 2, dla L.P. di 20 de dezëmber 2019, n. 17.