(1)Vigni scora arjigna ca le plann trienal dl’oferta formativa tolon ite düc i comëmbri dla comunité scolastica. Chësc plann é le documënt fondamental che respidlëia l’identité culturala sciöche ince l'orientamënt didatich y educatif dla scora y tol ite la planificaziun curiculara, extracuriculara y organisativa che vigni scora adotëia tl cheder de süa autonomia.
(2) Le plann trienal ti corespogn ai obietifs de formaziun dles sorts de scores y direziuns de stüde desvalies y al tol en conscidraziun i bojëgns dl contest cultural, sozial y economich dla realté dl post. Al tol ite y reconësc les metodes de insegnamënt desvalies y valorisëia la profescionalité corespognënta dl personal dla scora.
(3) I bojëgns didatics, de organisaziun y planificaziun che vëgn dal plann trienal é un di criters por l'assegnaziun dles ressurses de personal preodüdes dal articul 15.
(4) Le plann trienal contëgn ince i fins y les modalités dles ativités formatives che ti vëgn pitades dala scora a döt le personal dla scora autonoma.
(5) Le plann trienal tëgn cunt dles mosöres de mioramënt cualitatif y de svilup che tëgn pro dl'oferta formativa che vëgn dai resultac dl'evaluaziun interna y esterna.
(6) La direturia o le diretur dla scora dá dant, tolon ite düc i comëmbri dla comunité scolastica, les diretives por mëte jö le plann trienal. Sön chësta basa laora fora le collegium dl personal insegnant le plann trienal che vëgn aprové dal consëi d'istitut cina ala fin de novëmber dl ann de scora dan dal tëmp de trëi agn a chël che al vëgn fat referimënt. Le plann vá en forza tl ann de scora suandënt y pó gní adaté vigni ann cina ala fin de novëmber.
(7) Le plann trienal vëgn publiché sön la plata internet dla scora y vëgn tresfora ajorné. I planns trienai dles scores autonomes vëgn ince publicá sön la plata internet dl'Intendënza scolastica corespognënta. Por che les scolares y i scolars y sües families pois mëte a confrunt plü saurí i planns trienai ti dá l'Intendënza scolastica competënta ales scores indicaziuns por ci che reverda la strotoraziun de chisc. 4)