(1) Pro les entrades dles scores alda, tan inant che ai ti speta aladô dles normes varëntes:
- les assegnaziuns dla Provinzia;
- les assegnaziuns di comuns;
- les tasses scolastiches determinades dala Junta provinziala y i contribuć dles scolares y di scolars;
- i contribuć de d’atri ënć y istituziuns, de aziëndes o de privać;
- les entrades che vëgn da convenziuns stlütes jö dales scores o da alienaziuns de bëgns a desposiziun;
- les donaziuns, les arpejuns y i legać, les contribuziuns y la bunaman;
- vigni atra sort d’entrada economica.
(2) Pro les assegnaziuns dla Provinzia por le finanziamënt dles ativitês scolastiches vëgnel desfarenzié danter assegnaziuns ordinares y straordinares. Les assegnaziuns vëgn fates aladô di criters stabilis dala Junta provinziala.
(3) La Junta provinziala stabilësc les assegnaziuns ordinares sön la basa de parametri ogetifs por la determinaziun di bojëgns tignin cunt dla grandëza y dla complessité dla singola scora.
(4) Les assegnaziuns straordinares dess curì les spëises nia preodüdes o sorvì por la realisaziun de proieć particolars.
(5) La Provinzia y i Comuns ti garantësc tl ćiamp de sües competënzes a dötes les scores l’atrezadöra de basa por assiguré le funzionamënt regolar dl’ativité scolastica.
(6) Les assegnaziuns ordinares dla Provinzia vëgn atribuides zënza degun ater lian de destinaziun co chël dl’adoranza prioritara por l’eserzize dles ativitês d’istruziun, de formaziun y d’orientamënt che alda pro vigni sort de scora y pro vigni direziun de stüdi.
(6/bis) Les scores che vëgn regolamentades da chësta lege surantol dal 1. de jená dl 2017 la contabilité de dërt zivil y aplichëia les desposiziuns corespognëntes che é tl decret legislatif di 23 de jügn dl 2011, n. 118, y mudaziuns suandëntes. 14)
(6/ter) Cun regolamënt d’esecuziun vëgnel stabilí les desposiziuns por la gestiun finanziara y aministrativa contabla dles scores, tl respet dles desposiziuns preodüdes dal coma 6/bis sciöche ince les normes transitores por la surantuta dl sistem de contabilité corespognënt. 14)
(7)Un o plü collegiums de control nominá dal’intendënta scolastica competënta o dal intendënt scolastich competënt controlëia sce l’aministraziun y la contabilité é en regola. I collegiums é metüs adöm da personal dla provinzia cualifiché tl ciamp aministratif y contabl. I criters y les modalités de funzionamënt vëgn stabilis cun regolamënt d’esecuziun preodü dal coma 6/ter. 15)
(8) 16)
(9) Por l’efiziënza y l’economizité dla gestiun dles ressurses finanziares po l’aministraziun provinziala surantó diretamënter singoles spëises che é liades al’ativité dla scora. La Junta provinziala stabilësc les sorts de spëises. Implü se fistidiëia la Provinzia dla manutenziun straordinara dles scores altes.
(10) Tles scores vëgn i agënc de scodimënt nominá dala dirigënta scolastica o dal dirigënt scolastich. Tl regolamënt d’esecuziun preodü dal coma 6/ter vëgnel fat fora les desposiziuns sön le scodimënt, le cunt iudiziar, le paiamënt y le decunt aministratif dles entrades scudides dai agënc de scodimënt. 17)
Art. 12 comesc 6/bis y 6/ter é gnüs injuntá dal art. 8, coma 1 dla l.p. di 25 de setëmber dl 2015, n. 11.
L'art. 12, coma 7 é naota gnü mudé dal art. 8, coma 2 dla l.p. di 25 de setëmber dl 2015, n. 11, y spo dal art. 21, coma 1 dla l.p. di 7 d’agost dl 2017, n. 12.
L'art. 12, coma 8 é gnü abroghè dal art. 23, coma 1, lëtra e), dla l.p. di 25 de setëmber dl 2015, n. 11.
L'art. 12, coma 10 é gnü ajunté dal art. 21, coma 2 dla l.p. di 7 d’agost dl 2017, n. 12.