(1) Por zede en proprieté abitaziuns destinades al afit elaborëia l’IPFS programs de trëi agn por la venüda de abitaziuns. I programs de trëi agn mëss gnì aprovà dala Junta provinziala. Canch’al vëgn metü jö i programs de venüda vëgnel trat dant chi frabicać olache bele na pert dles abitaziuns é gnüda zedüda en proprieté ai afitadins.
(2) Le fin di programs de venüda é chël de alienè frabicać intiers.
(3) Sce n frabicat é gnü metü ite te n plann de venüda po l’IPFS ti assegné ai afitadins che ne damana nia la zesciun en proprieté, sciöche barat, n’atra abitaziun adeguada al bojëgn dla familia. I cosć de trasferimënt vëgn surantuć dal IPFS che cür les spëises corespognëntes cun ći ch’al tira ite dai afić.
(4) Por porsones cun handicap y porsones cun plü de 65 agn ne vëgnel nia apliché la desposiziun dl coma 3. A chëstes porsones ti réstel le dërt de abité inant tl’abitaziun sciöche afitadins ćina ch’al ne vëgn nia a s’al dè d’atres zircostanzes che iustifichëia la revocaziun dl’assegnaziun. Do che chisc afitadins é morć po les porsones che à le dërt de sozesciun tl’assegnaziun o tl contrat d’afit detlarè anter 90 dis de orëi cumprè l’abitaziun. Sc’ares ne detlarëia nia d’orëi cumprè l’abitaziun vëgnel apliché inće por ëres la desposiziun dl coma 3.
(5) Les abitaziuns che ne vëgn nia cumprades dai afitadins che à le dërt po gnì venüdes a d’atri afitadins dl IPFS che à detlarè de orëi cumprè l’abitaziun ch’ai ocupëia, mo che n’é indere nia gnüda metüda sön le program de venüda.
(6) Por respetè la cuota mascima dada dant tl articul 122 mëssel gnì tignì cunt canch’al vëgn metü jö i programs de venüda, inće dl numer dles abitaziuns venüdes ti agn da denant aladô de chësta lege. Le numer dles abitaziuns destinades a gnì venüdes ti programs singui ne po nia ester majer co chël dles abitaziuns fates sö o cumprades ti trëi agn da denant.
(7) Les desposiziuns menüdes por la redaziun y l’esecuziun di programs de venüda vëgn regolades cun regolamënt d’esecuziun.