(1) Ales sperses resservades al frabiché abitatif alisiré vëgnel lascè pro l’IPFS y les porsones singules o assoziades te cooperatives che po gnì ametüdes ai alisiramënć aladô dl articul 2. I comuns po adorè les sperses resservades al frabiché abitatif alisiré por fà sö abitaziuns finanziades daldöt o en pert cun sü mesi.248)
(2) Al vëgn inće lascè pro les sozietês y i ënć cun le fin de fà sö, zënza intenziun de davagn, abitaziuns popolares standard da vëne o da dè en afit, inće cun l’impormetüda de venüda tl dagnì, sön la basa de acordanzes cun l’aministraziun provinziala. Chësta acordanza mëss fissé i criters por l’assegnaziun dl’abitaziun, por la determinaziun y la revijiun dl afit sciöche inće por la determinaziun dl prisc de venüda, osservan i prinzips de chësta lege cun garanzies finanziares adatades por ademplì les oblianzes tutes sö.
(3) Canch’al vëgn assegné sperses por le frabiché abitatif alisiré ti vëgnel dè la prezedënza al IPFS che à intenziun de fà sö tl comun abitaziuns adinfit che é preodüdes tl program de costruziun aladô dl articul 22.
(4) I comuns determinëia cun regolamënt i termi y les modalités por la presentaziun dles domandes de assegnaziun dles cooperatives da frabiché y dles porsones singoles che fej domanda o de chëres che reverda proiec abitatifs por porsones atempades, porsones cun handicap, maraties psichiches o dependënzes, por jënt jona o por abitaziuns por la convivënza de de plü generaziuns y le cohousing o proiec abitatifs somiënc, sciöche ince i criters por formé la gradatöra y por determiné la mosöra dla spersa da assegné. Surapró determinëia i comuns tl regolamënt i criters de prezedënza dles domandes dades jö dales cooperatives por le frabiché en confrunt a chëres che reverda proiec abitatifs por porsones atempades, porsones cun handicap, maraties psichiches o dependënzes, por jënt jona, por abitaziuns por la convivënza de de plü generaziuns y le cohousing o proiec abitatifs somiënc y en confrunt ales domandes dles porsones singoles che fej domanda. Tl regolamënt pó i comuns ince odëi danfora che al vëgnes reconesciü dui punc implü por la dorada dla residënza tl comun y che la gradatöra veles al mascimo trëi agn. 249)
(4-bis) Cun regolamënt stabilësc i comuns les condiziuns por chëres che al ti pó gní zedü la rajun de proprieté o le dërt de suraspersa dl raiun resservé al frabiché abitatif alisiré a che che á le dërt al'assegnaziun. 250)
(5) Por acuisì la proprieté de sperses resservades al frabiché abitatif alisiré mëss i comëmbri de cooperatives por le frabiché y i damananć singui ester en possès de chëstes condiziuns:
- avëi la residënza tl comun o avëi le post de laur tl comun; les porsones che fej domanda che é maridades o convir more uxorio aladô dl articul 7 dl decret dl Presidënt dla Junta provinziala di 15 de messé dl 1999, n. 42, pó ciafé deboriada l'assegnaziun dla spersa, ince sce ma öna de ëres á la condiziun dla residënza o dl post de laur tl comun. 251)
- ester en posses dles condiziuns damanades dala lege por gní lasciá pro ai alisiramënc por frabiché dla Provinzia por fá sö n’abitaziun de proprieté y avëi n davagn che ne vá nia sura chël dl cuinto scalin de davagn; 252)
- arjunje almanco 16 punć aladô dl regolamënt d’esecuziun;
- n’ester nia proprietars y n’avëi nia zedü ti cin agn dan la presentaziun dla domanda n tòch de grunt da frabiché te n post saurì da arjunje che bastass por fà sö n’abitaziun de almanco 495 metri cubich.
(6) A parité de punć vëgnel trat dant i damananć che po mostrè sö, por ći che reverda la condiziun dada dant tl coma 5, lëtra a), la residënza plü lungia.
(7) L’assegnaziun dles sperses por le frabiché abitatif alisiré tla proprieté de che che fej domanda o la costituziun dl dërt de spersa a so bëgn vëgn fata, en concordanza cun le cronoprogram por la frabicaziun dl raiun dé dant tl plann comunal por le teritore y la contrada y cun le plann d’atuaziun aprové, do l’ordin dla gradatöra definitiva cun deliberaziun dla junta comunala. 253)
(7-bis) Les sperses destinades al frabiché abitatif alisiré che é de proprieté sóra dla Provinzia o dl IPFS ti vëgn dades en proprieté ai damananć dala Junta provinziala o dal IPFS en acordanza cun le comun competënt te chël raiun.254)
(7-ter) Desvian dal coma 5, lëtra a) pó le comun competënt ti assegné les sperses por le frabiché abitatif alisiré ince a damananc y damanantes che á la residënza te n ater comun dla provinzia. Por chësc fin ól ester le consëns di comuns interessá. 255)
(8) L’assegnaziun dles sperses pó gní fata te döes fases. L’assegnaziun provisora pó gní fata do che le plann d’atuaziun é gnü aprové y la prozedöra d’espropriaziun é gnüda inviada ia. Sön la basa dl’assegnaziun provisora pó les porsones che ciafa en assegnaziun na spersa damané la lizënza por l'ativité de costruziun. L’assegnaziun definitiva tla proprieté pó impormó gní fata do che al é gnü esproprié les sperses destinades al frabiché abitatif alisiré. Tla deliberaziun d’assegnaziun provisora o tla deliberaziun d’assegnaziun definitiva, sce chëra provisora n’é nia gnüda fata, mëssel gní verifiché che al ne vëgnes nia dant les rajuns d’esclujiun preodüdes dal articul 45, coma 1, lëtres b) y c), y tl coma 5, lëtra d) de chësc articul. 256)
(9) Tratan ch’an aspeta l’assegnaziun definitiva en proprieté po le comun dè l’autorisaziun ales porsones che ciafa en assegnaziun la spersa a ocupé les sperses espropriades y a mëte man i laûrs de costruziun. L’autorisaziun a tó ite la spersa depënn dal paiamënt de n acunt dl 80 porcënt dl prisc de zesciun dla spersa probabl y di cosć de urbanisaziun.
(10) Sön les sperses resservades al frabiché abitatif alisiré pól ma gní fat sö abitaziuns che á les carateristiches stabilides tl articul 41. Tut fora da chësc é les ciases alberch por lauranc/laurantes, scolars/scolares y studënc/studëntes, les abitaziuns protezionades y i proiec abitatifs por porsones atempades, porsones cun handicap, maraties psichiches o dependënzes, por jënt jona o ince abitaziuns por la convivënza de de plü generaziuns y le cohousing o proiec abitatifs somiënc. 257)
(11) Les porsones emigrades foradecá che é bele stades residëntes tla provinzia dan l’emigraziun por almanco cin' agn, sciöche ince süa fomena o so om nia despartis legalmënter o les porsones convivëntes more uxorio, che á intenziun da porté indô la residënza tla provinzia, pó presenté la domanda d’assegnaziun de grunt tl comun de süa ultima residënza o te chël olache ares desmostra da ester bones da eserzité süa profesciun o so laur. Por faziun de chësta norma vëgnel conscidré le tëmp de laur fat foradecá sciöche fat tl comun. 258)
Le coma 1 é gnü integrè dal art. 22 dla L.P. di 10 d’agost 2001, n. 8.
L'art. 82, coma 4 é gnü sostituí insciö dal art. 2, coma 3 dla l.p. di 22 de dezëmber dl 2022, n. 15.
L'art. 82, coma 4-bis é gnü injunté dal art. 2, coma 4 dla l.p. di 22 de dezëmber dl 2022, n. 15.
La lëtra a) dl art. 82, coma 5 é gnüda sostituida insciö dal art. 2, coma 5 dla l.p. di 22 de dezëmber dl 2022, n. 15. Ciara ince l'art. 2, coma 6 dla l.p. di 22 de dezëmber dl 2022, n. 15.
La lëtra b), dl art. 82, coma 5 é naota gnüda sostituida dal art. 1, coma 22 dla l.p. di 22 de jená dl 2010, n. 1, y spo mudada dal art. 11, coma 1 dla l.p. di 18 de merz dl 2016, n. 5. Ciara ince l'art. 14, coma 1 dla l.p. di 18 de merz dl 2016, n. 5. Inultima é la lëtra b) gnüda mudada dal art. 5, coma 6 dla l.p. di 22 de dezëmber dl 2022, n. 15.
L'art. 82, coma 7 é gnü mudé dal art. 5, coma 7 dla l.p. di 22 de dezëmber dl 2022, n. 15.
Le coma 7-bis é gnü injuntè dal art. 22 dla L.P. di 10 d’agost 2001, n. 8.
L'art. 82, coma 7- ter é gnü injunté dal art. 1, coma 7 dla l.p. di 13 de jügn dl 2012, n. 11, y dedô él gnü mudé insciö dal art. 2, coma 7 dla l.p. di 22 de dezëmber dl 2022, n. 15.
L'art. 82, coma 8 é gnü mudé insciö dal art. 5, coma 8 dla l.p. di 22 de dezëmber dl 2022, n. 15.
L'art. 82, coma 10 é gnü sostituí insciö dal art. 2, coma 8 dla l.p. di 22 de dezëmber dl 2022, n. 15.
L'art. 82, coma 11 é gnü mudé insciö dal art. 2, coma 9 dla l.p. di 22 de dezëmber dl 2022, n. 15.