b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré 2)

(1)  Te chisc caji vëgn l’assegnaziun detlarada sciöche tomada:

1. sce anter n ann da canche al é gnü fat la segnalaziun zertificada por l'agibilité ne vëgn l’abitaziun fata sö sön la spersa assegnada nia ocupada dala porsona che á ciafé l’assegnaziun o nia dada en afit aladô dl articul 86; 261)
2. sce l’abitaziun vëgn afitada en contradiziun cun les normes dl articul 86;
3. sc’al vëgn mudé la destinaziun d’adoranza dl’abitaziun o de na pert de chësta, en contradiziun cun la deliberaziun d’assegnaziun y al n’é nia plü poscibl jì derevers ala condiziun da denant;
4. sc’al ne vëgn nia respetè i terminns aladô dl articul 83, coma 1, lëtra c);
5. sce les atres oblianzes odüdes danfora tla deliberaziun d’assegnaziun ne vëgn nia respetades;
6. sce l’assegnatar ne vir nia veramënter y tres tl’abitaziun por la dorada dl liam preodü dal articul 86. 262)

(2)  I fać che à sciöche conseguënza la tomanza dl’assegnaziun vëgn constatà cun deliberaziun dla Junta comunala y à da gnì contestà dal ombolt ala porsona che à ciafè l’assegnaziun tres lëtra racomanada cun recioiüda derevers cun l’invit a dè jö anter 60 dis deduziuns decuntra documentades te na manira adeguada.

(3)  Do che le termin dé dant tl coma 2 é passé pronunziëia la junta comunala la tomanza dl’assegnaziun dla spersa. Cuntra la deliberaziun dla junta comunala pól gní fat recurs ierarchich tl tëmp de 30 dis dala comunicaziun ala Junta provinziala che tol na dezijiun definitiva. La detlaraziun definitiva dla tomanza dl’assegnaziun comporta che la spersa assegnada y i frabicac che é gnüs fac sö lassura pois gní espropriá. Le comun desponn l'espropriaziun. 263)

(4)  I comesc 2 y 3 vëgn inće aplicà tl caje de renunzia al’assegnaziun.

(5)  Les desposiziuns di articui 82, 83, 84, di comesc 1, 2, 3 y 4 de chësc articul sciöche inće dl articul 86 vëgn aplicades tl caje d’assegnaziun de sperses por le frabiché abitatif alisiré da pert dl’aministraziun provinziala o dl IPFS; te n te’ caje röiel ite impede la Junta comunala la Junta provinziala y le Consëi d’aministraziun dl IPFS.

(6) Do che le lian sozial é tomé pó les contravenziuns preodüdes da chësc articul ma gní sanzionades sce ares é gnüdes contestades tratan la dorada dl lian. 264)