(1) Por finanzié l’acuisiziun y l’urbanisaziun de sperses por le frabiché abitatif alisiré vëgnel conzedü finanziamënc y contribuc ai comuns, al IPFS y a sozietés y ënc zënza fins de davagn, aladô dl articul 2, coma 1, letra H).
(2) Sön la basa dl decret de determinaziun dl’indenisaziun d’espropriaziun nominada tl articul 5 dla lege provinziala di 15 d’aurí dl 1991, n. 10, y mudaziuns suandëntes, desponn l’assessur provinzial por le frabiché abitatif la conzesciun de n finanziamënt a bëgn dl comun tla mosöra dl’indenisaziun d’espropriaziun. Le 50 porcënt de chësc finanziamënt vëgn conzedü sciöche contribut de n iade y l'ater 50 porcënt mëss gní dé zoruch dal comun instës. Sce les sperses por le frabiché abitatif alisiré vëgn espropriades diretamënter a bëgn dl IPFS, aladô dl articul 80, coma 3 de chësta lege, vëgnel conzedü n contribut de n iade de döta la soma dl’indenisaziun d’espropriaziun.
(2-bis) Sce l'acuisiziun dles sperses destinades al frabiché abitatif alisiré vëgn adaldé tres n contrat de cumpra aladô dl articul 19, coma 3 dla lege provinziala di 10 de messé dl 2018, n. 9, y mudaziuns suandëntes, desponn la Provinzia la conzesciun de n finanziamënt che ti corespogn al prisc de cumpra a bëgn dl comun sön la basa dl contrat de cumpra preliminar respetif registré. Le 50 porcënt de chësc finanziamënt vëgn conzedü sciöche contribut de n iade y le 50 porcënt che resta mëss gní retü dal comun instës. Sce les sperses destinades al frabiché abitatif alisiré vëgn acuisides a bëgn dl Istitut por le frabiché sozial vëgnel conzedü n contribut de n iade de döt l'import dl prisc de cumpra. L'Ofize Sciazada dla Provinzia determinëia sce le prisc de cumpra é amosoré. 275)
(3) Sce l'autorité iudiziara competënta stabilësc te sües sentënzes indenisaziuns d’espropriaziun maius desponn l’assessur por le frabiché abitatif da integré le finanziamënt aladô.
(4) Tl caje d’espropriaziun de sperses por le frabiché abitatif alisiré aladô dl articul 16 dla lege provinziala di 15 d’aurí dl 1991, n. 10, y mudaziuns suandëntes desponn l’assessur provinzial por le frabiché abitatif, sön la basa dla deliberaziun en forza cun chëra che le comun delibrëia da cumpré les sperses cun la prozedöra preodüda dal articul 16, la conzesciun de n finanziamënt che ti corespogn al'indenisaziun d'espropriaziun. Le 50 porcënt de chësc finanziamënt é n contribut de n iade y l'ater 50 porcënt mëss gní dé zoruch dal comun instës.
(5) Les desposiziuns di comesc 2, 3 y 4 vëgn ince aplicades tl caje che al vëgn esproprié terac da frabiché, aladô dl articul 81.
(5-bis) Sce les sperses resservades al frabiché abitatif alisiré ê bele proprieté dl comun, tl momënt che al é gnü individué le raiun, á les porsones che ciafa en assegnaziun les sperses resservades al frabiché abitatif alisiré le dërt che al ti vëgnes assegné chëstes sperses a n prisc che ti corespogn al 50 porcënt dl'indenisaziun d’espropriaziun che é da determiné aladô dl articul 7-quinquies dla lege provinziala di 15 d'aurí dl 1991, n. 10, y mudaziuns suandëntes. Sön la basa dles deliberaziuns d'assegnaziun ti vëgnel conzedü al comun n contribut che amunta al 50 porcënt che resta dl'indenisaziun d'espropriaziun. L'Ofize Sciazada dla Provinzia determinëia sce l'indenisaziun d'espropriaziun é amosorada. Te chësc caje ne spetel nia l'aumënt dl 10 porcënt dl'indenité preodüda dal articul 6, coma 2 dla lege provinziala di 15 d'aurí dl 1991, n. 10, y mudaziuns suandëntes. 276)
(6) Sce por cumpré sperses por le frabiché abitatif alisiré mëssel gní paié la cuta sön le valur ajuntè vëgn les somes dades dant ti comesc 2, 3, 4 y 5 alzades dla soma corespognënta.
(7) I comuns o sü consorc assegnëia les sperses acuisides do les desposiziuns de chësta lege meton a ciaria dla porsona che ciafa l’assegnaziun na soma che ti corespogn al import da ti rete ala Provinzia por la cumpra dles sperses, tl respet de ci che vëgn preodü al coma 5-bis de chësc articul. Sce por le raiun moscedé interessé dal'assegnaziun él danman tl medemo tëmp chëstes trëi condiziuns, ti corespogn le prisc d'assegnaziun al dopl dl import da rete:
- les porsones che á ciafé l'assegnaziun é i proprietars da denant dles sperses o so parenté y süa parentela de pröm degré dl om o dla fomena;
- i stromënc de planificaziun urbanistica resservëia plü co le 60 porcënt dla spersa o dla cubatöra por le frabiché abitatif alisiré o por abitaziuns a cun n lian de prisc;
- cun le 40 porcënt dla spersa o dla cubatöra dl raiun moscedé fossel sté poscibl por le proprietar da denant da realisé n'abitaziun de almanco 495 metri cubics. 277)
(7-bis) Les majeres entrades poscibles dl comun o de so consorz sön la basa de ci che vëgn odü danfora dal coma 7 de chësc articul, mëss ti gní retüdes ala Provinzia te 120 dis da canche les sperses ti é gnüdes zedüdes a che che ciafa l'assegnaziun. Te chësc caje n'éson nia debit i fic legai. 278)
(8) L’acuirënt mëss paié la soma corespognënta tl momënt dla zesciun y le comun mëss dé derevers la soma finanziada danfora dala Provinzia tl tëmp preodü dal coma 14. Le somes incassades de iade en iade dala Provinzia röia indô tl bilanz provinzial por gní adorades por d'atri impëgns de spëisa.
(9) Por l’urbanisaziun primara dles sperses por le frabiché abitatif alisiré sciöche ince por i atri laurs che vá debojëgn por taché ite chëstes sperses ala rëi di sorvisc publics vëgnel conzedü n contribut de n iade tla mosöra dl 60 porcënt dles spëises reconesciüdes por i laurs. Al vëgn stlüt fora les mosöres de proteziun cuntra prighi naturai che pó gní finanziades aladô dl articul 89. Sön domanda dl comun pól gní conzedü n'antizipaziun tla mosöra dl 60 porcënt dla spëises preventivades tla domanda de contribut y che corespogn ai laurs preodüs da chësc coma. Le contribut definitif che speta vëgn determiné sön la basa dl decunt final y pó ester de alplü le 60 porcënt dles spëises reconesciüdes por i laurs. Dal contribut definitif vëgnel trat jö l'antizipaziun che é eventualmënter bele gnüda conzedüda. Sce sön la basa dl decunt final mëssel gní dé derevers na pert dl'antizipaziun conzedüda, ne éson nia debit i fic legai. Le decunt final mëss gní presenté te cinch agn dala data de conzesciun dl'antizipaziun scenó vëgn le contribut revoché. Sön domanda motivada dl comun pó le termin por la presentaziun dl decunt final gní proroghé de alplü trëi agn. 279)
(10) Adöm cun le contribut de n iade por l’urbanisaziun primara ti vëgnel conzedü ai comuns n contribut de n iade por l’urbanisaziun secundara tla mosöra dl 60 porcënt dl contribut che, sön la basa dl regolamënt comunal sön le scudimënt di contribuc d’urbanisaziun, é a ciaria dles sperses por le frabiché abitatif alisiré.
(11) L’assessur provinzial/L'assessuria provinziala por le frabiché abitatif ti conzed ai comuns o a sozietés y ënc zënza fins de davagn n finanziamënt por cumpré terac frabicá o sön chi che al pó ciamó gní frabiché che é ti raiuns moscedá, ti zëntri storics y ti raiuns de recualificaziun urbanistica preodüs dai articui 24, 26 y 30 dla lege provinziala di 10 de messé dl 2018, n. 9, y mudaziuns suandëntes, y te vigni caje tl raiun de insediamënt, por recuperé le patrimone imobiliar che é bele por fins abitatifs o adoré dërc da frabiché por fins abitatifs. Desvian da ci che vëgn stabilí dai articui 57, 58 y 59 dla lege provinziala di 10 de messé dl 2018, n. 9, y mudaziuns suandëntes, vëgn chisc terac destiná al frabiché abitatif alisiré tres na mudaziun dl plann comunal por le teritore y la contrada o, sce al é n plann d'atuaziun, n plann de recuperada o n plann de recualificaziun urbanistica, tres na mudaziun dl plann interessé. I terac che vëgn destiná a chësta moda vëgn conscidrá, por dötes les faziuns dla lege provinziala di 10 de messé dl 2018, n. 9, y mudaziuns suandëntes, sciöche ince de chësta lege, sperses por le frabiché abitatif alisiré y é sotmetüdes al lian preodü dal articul 86 colié a ci che vëgn stabilí dal articul 62. Do che al é gnü mudé le plann comunal por le teritore y la contrada o le plann d'atuaziun, le plann de recuperada o le plann de recualificaziun urbanistica vëgn na pert dl finanziamënt trasformé te n contribut de n iade. Por i terac frabicá da recuperé fej fora le contribut de n iade dal 50 al 80 porcënt di cosć de costruziun dla cubatöra amissibla sön le terac. I criters por la conzesciun dl contribut nominé vëgn stabilis dala Junta provinziala cun na deliberaziun da publiché tl Boletin Ofizial dla Regiun. Sce le comun é bele le proprietar di terac frabicá o á bele cumpré i terac cun mesi desvalis da chi preodüs da chësc articul, ti vëgnel conzedü, do che al é gnü mudé le plann comunal por le teritore y la contrada o le plann de atuaziun, de recuperada o de recualificaziun urbanistica cun chi che le terac vëgn destiné al frabiché abitatif alisiré, sön la basa dla deliberaziun de assegnaziun, n contribut de n iade dl 20 porcënt dl cost de costruziun dla cubatöra amissibla sön le terac. 280)
(12) L'assessur provinzial/L'assessuria provinziala por le frabiché abitatif ti conzed al IPFS n contribut por cumpré sperses che é tl raiun de insediamënt adatades da gní destinades a grunt da frabiché, do ch’al é gnü mudé la destinaziun urbanistica y che vá debojëgn por realisé i programs de costruziun aprová. Denanco cumpré la spersa mëss l’IPFS damané l’arat dl comun competënt te chël raiun y dla Comisciun comunala por le teritore y la contrada. I arac liënc dl comun y dla Comisciun comunala por le teritore y la contrada por ci che reverda l’idoneité dla spersa sciöche terac da frabiché mëss gní dá jö te 90 dis da canche al é gnü presenté domanda. Sce chësc termin toma zënza che le comun o la Comisciun comunala por le teritore y la contrada ais lascé alsavëi valch, vëgn l’arat conscidré positif. Do che al é gnü stlüt jö le contrat de cumpra y sön domanda dl IPFS aprovëia le Consëi de comun te na manira definitiva la mudaziun dl plann comunal por le teritore y la contrada. 281)
(13) L’assessur provinzial/L'assessuria provinziala por le frabiché abitatif ti conzed ai comuns finanziamënc por cumpré terac tl raiun d'insediamënt che pó gní adorá sciöche grunt da frabiché. Denanche cumpré le grunt mëss le comun damané do l’arat liënt dla Comisciun comunala por le teritore y la contrada. L’arat dla Comisciun comunala por le teritore y la contrada sön l’idoneité dl terac sciöche grunt da frabiché mëss gní dé jö te 90 dis da canche al é gnü fat domanda. Sce chësc termin toma zënza che la Comisciun comunala por le teritore y la contrada ais lascé alsavëi valch, vëgn l’arat conscidré positif. Do che al é gnü aprové le plann d’atuaziun por chës sperses che tl plann d’atuaziun é destinades al frabiché abitatif alisiré y ai laurs d’urbanisaziun primara che alda lapró, mëss le 50 porcënt dl finanziamënt conzedü ti gní retü ala Provinzia. 282)
(14) Le comun mëss ti rete ala Provinzia le finanziamënt conzedü te 120 dis da canche les sperses ti é gnüdes zedüdes a che che les ciafa en assegnaziun. Le finanziamënt nominé mëss a vigni moda gní retü te cater agn da canche al é gnü conzedü, ince sce les sperses n’é nia ciamó gnüdes assegnades. Sce i finanziamënc ne vëgn nia retüs te chësc tëmp, vëgn les somes corespognëntes trates jö, pro la proscima tomanza, dales somes che ti speta ai comuns aladô dl articul 5 dla lege provinziala di 14 de forá 1992, n. 6, y mudaziuns suandëntes. Les somes trates ite insciö röia indô tl bilanz provinzial por gní adorades por d'atri lians de destinaziun. Sön domanda dl comun pó le termin por la retüda di finanziamënc gní proroghé alplü de ciamó cin' agn, sce le comun dá na motivaziun aladô o sce ara se trata de intervënc d'interes suracomunal. Te chësc ultim caje vëgn la soma valutada danü sön la basa di indesc dl cost dla vita azertá dal Istitut provinzial de statistica tl raiun dla provinzia de Balsan. La retüda revalutada di finanziamënc mëss a vigni moda gní adaldé te 20 agn. Sce les sperses ti é bele gnüdes assegnades al Istitut por le frabiché sozial, pó i finanziamënc conzedüs ai comuns gní retüs sön domanda motivada y sce al é n bojëgn ogetif, te set agn da süa conzesciun, ince sce les sperses n’é nia ciamó gnüdes zedüdes en proprieté. Al romagn la poscibilité da proroghé de n ann le termin por rete i finanziamënc. 283)
(15) I finanziamënc conzedüs aladô di comesc 12 y 13 ne stlüj nia fora la poscibilité che sön le plann d’atuaziun, che é da arjigné aladô dl articul 37 dla lege provinziala di 11 d’agost 1997, nr. 13, y mudaziuns suandëntes, pól gní preodü aladô dl coma 5 dl articul 37 nominé dessura, da resservé cubatöres por les aziëndes de sorvisc y de comerz al detai sciöche inće por implanc d’urbanisaziun secundara de chi che le raiun à debojëgn.
(16) Les somes che vá ite aladô de chësc articul röia tl bilanz provinzial por gní destiná a gní impegná danü tl setur dl frabiché abitatif alisiré. 284)
L'art. 87, coma 2-bis é gnü injunté dal art. 1, coma 1 dla l.p. di 22 de dezëmber dl 2022, n. 15.
L'art. 87, coma 5-bis é gnü injunté dal art. 1, coma 2 dla l.p. di 22 de dezëmber dl 2022, n. 15.
L'art. 87, coma 7 é gnü sostituí insciö dal art. 1, coma 3 dla l.p. di 22 de dezëmber dl 2022, n. 15.
L'art. 87, coma 7-bis é gnü injunté dal art. 1, coma 4 dla l.p. di 22 de dezëmber dl 2022, n. 15.
L'art. 87, coma 9 é gnü sostituí insciö dal art. 1, coma 5 dla l.p. di 22 de dezëmber dl 2022, n. 15.
L'art. 87, coma 11 é naota gnü sostituí dal art. 5, coma 11 dla l.p. di 22 de dezëmber dl 2022, n. 15, y spo mudé insciö dal art. 26, coma 12 dla l.p. di 4 d'agost dl 2023, n. 18.
L'art. 87, coma 12 é gnü mudé insciö dal art. 5, coma 12 dla l.p. di 22 de dezëmber dl 2022, n. 15.
L'art. 87, coma 13 é gnü mudé insciö dal art. 5, coma 13 dla l.p. di 22 de dezëmber dl 2022, n. 15.
L'art. 87, coma 14 é naota gnü mudé dal art. 28, coma 14 dla l.p. di 19 d'agost dl 2020, n. 9, y spo dedô dal art. 1, comesc 6 y 7 dla l.p. di 22 de dezëmber dl 2022, n. 15.
L'art. 87 é gnü sostituí insciö dal art. 15, coma 7 dla l.p. di 25 de setëmber dl 2015, n. 11.