(1) L cunsum de fonz autorisà tres i ac de planificazion tlo dessot ublieia l Chemun a recuperé na pert dl aumënt dl valor de marcià dla imubilies nteressedes generà da chëstes:
- individuazion de raions mescedei;
- individuazion de raions cun destinazion particulera per l svilup dl turism sun la sperses natureles y agricules nunziedes tl articul 13, dedora dal raion de nridlamënt.
(2) L Chemun ademplësc a si ublianza l plu tert tl mumënt dla dumanda de autorisazion de ntervënt per l’adurvanza, nce mé n pert, dla capaziteies de frabica recunesciudes cun l at de planificazion.
(3) Tl cajo de individuazion de raions mescedei, vën l 60 percënt dla spersa acuisì dal Chemun ala metà dl valor de marcià. La sperses acuisides nsci ie resservedes per l frabiché abitatif alesirà y/o a cuatieres a priesc lià. L Chemun ie liede de ne acuisì nia chësta spersa. Te chësc cajo muessa l valor njuntà de planificazion nunzià tl coma 1 unì cumpensà, sun la basa de n’acurdanza, tres trasferimënt al priesc de venduda aldò dl articul 40. Chësta sperses ie resservedes ala realisazion de cuatieres a priesc lià. Sce l ie bele sun la spersa che ie oget dl at de planificazion frabiches n cunformità de lege, vëniel da chësta spersa trat ju una sëuraspersa dla mesura de sies cherc dla sëuraspersa che n basa al at de planificazion fossa de bujën per realisé la frabiches ejistëntes, for che, y tla mesura che, la destinazion de nuzeda uriginela dla frabiches curespuende a chëla preududa tl at de planificazion.
(4) Tl cajo aldò dl coma 1, pustom b), ademplësc l Chemun si ublianza tres scudida de na soma dl 30 percënt dl valor de marcià dla sperses individuedes cun l at de planificazion. Te chël cajo ie l at de planificazion sometù al vist dl ufize dla Provinzia cumpetënt tl ciamp de sciazeda o de n prufesciunist liede abilità/na prufesciunista liedia abiliteda o dl tecnich/dla tecnica cumenela cun sciazeda sot a juramënt n cont dla cungruità dla soma. Sce l ie sun la spersa, che ie oget de n at de planificazion nunzià tl coma 1, pustom b), bele frabiches cunformes ala lege, vëniel da chësta spersa trat ju la sëuraspersa che fossa n basa al at de planificazion de bujën per realisé la frabiches ejistëntes.
(5) Per sustenì i raions economicamënter dëibli possa l program de svilup cumenel preudëi la delibrazion n pert o defin dala ublianzes preududes da chësc articul, tl cajo de individuazion de raions cun destinazion particulera per l svilup dl turism.
(6) Pra l’apurvazion di ac de planificazion per sperses cun sëuraspersa mascima de 1.000 m2 possa l Chemun stabilì che l valor njuntà de planificazion preudù dal coma 3 vënie recuperà tres scudida de na soma dl 30 percënt dl valor de marcià sciazà per grunc da frabiché nluegei ti raions individuei cun l at de planificazion. Chësta sperses ie liedes ala realisazion de cuatieres per persones residëntes aldò dl articul 39 y les muessa unì seniedes aposta ti strumënc de planificazion. L articul 24, coma 3, ne vën nia aplicà.
(7) La ntredes di Chemuns che se porta pro dal’aplicazion de chësc articul ie mé destinedes y zënza liams de tëmp al frabiché residenziel alesirà o ala realisazion de cuatieres a priesc lià, al ressanamënt di cumplesc de frabica ti zëntri storics o di ensembli y tla periferies dejudiedes, ala realisazion y manutenzion de opres de urbanisazion primera y segondera y a ntervënc de readurvanza y de regenerazion.
(8) La Jonta provinziela mët su n fond de readurvanza. Tres chësc vëniel purtà pro che la imubilies ejistëntes vënie inò adurvedes cumpensan, ulache l ie puscibl, i cosć de acuisizion y de frabica plu auc de scumenciamënt dantaldut per la realisazion de lerch abitativa per la populazion residënta. L fond de readurvanza vën nuzà per limité l cunsum dl fonz tres la readurvanza de imubilies arbandunedes. La Jonta provinziela regulea la dotazion y la manieres de funziunamënt cun n pruvedimënt aposta. 22)23)