(1) Dal pröm dé dl mëis inant, do la jüda en forza de chësta lege, vëgn le personal medich y le personal laureè mo nia medich dl organich sanitar, che é tl 1 y tl 2 livel, incadrè tl unich organich de dirigënza.
(2) Por trëi agn alalungia dal dé olache chësta lege é jüda en forza, é l’organich unich de dirigënza partì sö te dui livì de paiamënt: livel A y livel B. Le livel A corespogn al ex secundo livel de dirigënza y al ex pröm livel de dirigënza dl livel A: le livel B corespogn al ex pröm livel de dirigënza dl livel B. Dala data stabilida tl coma 1 inant vëgnel metü a jì les tratatives de contrat sön le livel de teritore aladô dl articul 46.
(3) Dala data dl incadramënt ti vëgnel atribuì al personal cun le livel de paiamënt B le livel A, sot ala condiziun ch’al ais la spezialisaziun tla disciplina che corespogn al post ocupé o ch’al ais cin agn de sorvisc efetif; le tëmp de formaziun ne vëgn nia cumpedé laprò. Al personal che é bele pro l’organich inizial y che ne n’à te chësc tëmp degügn de chisc recuisić, ti vëgnel assegné le livel de paiamënt A dal pröm dé dl mëis do avëi arjunt la spezialisaziun o i agn de sorvisc nominà dessura. Ćina a chësta data romagn le personal sön le livel de paiamënt B.
(4) Le personal dles disciplines de anestesia y de reanimaziun, radiologia, de medejina nucleara, de radiodiagnostica y de neuroradiologia po ma passè al livel de paiamënt A sc’al arjunj la spezialisaziun tla disciplina. Al personal che le dé dla jüda en forza de chësta lege é en sorvisc cun l’inćiaria a tëmp limité o cun na inćiaria de suplënza, ti spétel le livel de paiamënt A o B sot ales condiziuns preodüdes por le personal de rode.
(5) Ai concursc publics por l’azès ala dirigënza sanitara dl livel A, scrić fora tles disciplines singoles, po tó pert i candidać che à le zertificat de spezialisaziun. Tó pert po inće i candidać che à le diplom de spezialisaziun te na disciplina ecuipolënta o analoga.143)
(5/bis) Por la formaziun medich-specialistiza pón tó sö a tëmp determiné y fora dl organich personal dirigënt sanitar, sciöche doturs che fej la formaziun tles repartiziuns y sorvisc dl’Aziënda Sanitara dl Südtirol acreditá dal Ministere dl’Istruziun, dl’Université y dl'Inrescida por la formaziun medich-spezialistica. L’assunziun vëgn fata sön la basa de na prozedöra de seleziun, tl respet dl personal dirigënt sanitar bele tut sö tla fascia economica B canche chësta desposiziun é jöda en forza. La formaziun medich-spezialistica vëgn fata aladô dles desposiziuns spezifiches dl’Uniun europeica. Le personal dirigënt sanitar che fej la formaziun medich-specialistica á dlungia tutor proponüs dal diretur de strotöra complessa y confermá dal diretur medich dl ospedal. Le paiamënt dl personal dirigënt sanitar che fej na formaziun medich-specialistica vëgn fat aladô dles desposiziuns di contrac coletifs provinziai. 144) 145) 146)
(5/ter) Les desposiziuns preodüdes dal coma 5/bis vëgn aplicades en via esperimentala cina ai 31 de dezëmber dl 2024. Ala fin dl'esperimentaziun gnarál valuté süa faziun en colaboraziun cun le Ministere dla Sanité por preodëi süa aplicaziun definitiva. 147)
(5/quater) 148)
(6) Le regolamënt aladô di comesc 5 y 5/bis vëgn apliché, tan inant ch’al é compatibl cun les previjiuns di contrać coletifs. Al personal tut sö tres le concurs scrit fora anter i 31 de merz 2006 ti vëgnel atribuì le paiamënt aladô dl coma 2. Tl caje d’assunziun ti vëgnel dè la prezedënza dantadöt al personal che à la spezialisaziun tla disciplina relativa o te chëra ecuipolënta o analoga.149)
Le coma 5 é gnü sostituì dal art. 5 dla L.P. di 3 de messè 2006, nr. 6.
L'art. 50, coma 5/bis é gnü injunté dal art. 5 dla l.p. di 3 de messé dl 2006, n. 6, y spo mudé insciö dal art. 37, coma 1 dla l.p. di 11 de messé dl 2018, n. 10.
Ciara art. 9, coma 10 dla l.p. di 13 de ma dl 2011, n. 3.
Ciara l'art. 20, coma 2 dla l.p. di 24 de ma dl 2016, n. 10.
L'art. 50, coma 5/ter é gnü injunté dal art. 7, coma 3 dla l.p. di 29 d’aurí dl 2019, n. 2, y dedô él gnü mudé insciö dal art. 7, coma 1, dla l.p. di 18 de otober dl 2022, n. 13.
L'art. 50, coma 5/quater é gnü injunté dal art. 28, coma 3 dla l.p. di 24 de setëmber dl 2019, n. 8, y spo abroghé dal art. 38, coma 1, lëtra a) dla l.p. di 27 de merz dl 2020, n. 2.
Le coma 6 é gnü injunté dal art. 22 dla l.p. di 8 de aurì 2004, nr. 1, y dedô sostituí dal art. 5 dla l.p. di 3 de messé dl 2006, n. 6.