(1) Por alzé la chersciüda generala y la produtivité dl’economia locala, pó la Provinzia conzede, pian ia dal 2016, contribuc a istituc, ënc, assoziaziuns y organisaziuns por scomenciadies a bëgn di seturs dl artejanat, dl’industria, dl turism, dl comerz y di sorvisc. Les scomenciadies amissibles reverda:
- la formaziun, l’ajornamënt, la consulënza y la difujiun de conescënzes;
- l’internazionalisaziun;
- le retlam y le sostëgn dla produziun locala;
- i stüdi, i relevamënc, l’inrescida y i proiec de valorisaziun;
- vigni atra scomenciadia aratada d’ütl por arjunje i fins preodüs da chësc coma.
(1/bis) Por amplié la chersciüda generala y la produtivité dl’economia locala, pó la Provinzia ti conzede contribuc ai zëntri d'assistenza tecnica ales impreses, metüs sö ince sciöche consorc o cooperatives o en colaboraziun cun d'atri sogec interessá, dales assoziaziuns de categoria plü rapresentatives dl setur che toca lapró a livel provinzial. Chisc zëntri pitará assistënza tecnica ales impreses tl cheder dla formaziun y dl ajornamënt por ci che reverda l'inovaziun tecnologica y organisativa, la gestiun economica y finanziaria d'impresa, l'azes ai finanziamënc dl'Uniun europeica, la segurëza por sconé i consumadus, la sconanza dl'ambiënt, l'igiena y la segurëza sön le post de laur y d'atres materies preodüdes eventualmënter da so statut, sciöche ince ativités por la zertificaziun dla cualité dles aziëndes. I contribuc preodüs da chësc coma vëgn conzedüs aladô dl regolamënt (UE) n. 1407/2013 dla Comisciun di 18 de dezëmber dl 2013 sön l’aplicaziun di articui 107 y 108 dl tratat sön le funzionamënt dl’Uniun europeica ai aiüc «de minimis». 74)
(2) I contribuc vëgn conzedüs aladô dl regolamënt (UE) n. 651/2014 dla Comisciun di 17 de jügn dl 2014, sön la constataziun dla compatibilité de certes categories d’aiüc cun le marcé intern en aplicaziun di articui 107 y 108 dl tratat sön le funzionamënt dl’Uniun europeica, o sciöche aiüc “de minimis” aladô dl regolamënt (UE) n. 1407/2013 dla Comisciun di 18 de dezëmber dl 2013, sön l’aplicaziun di articui 107 y 108 dl tratat sön le funzionamënt dl’Uniun europeica, ai aiüc «de minimis». 75)
L'art. 23/quater, coma 1/bis é gnü injunté dal art. 13, coma 1 dla l.p. di 13 d'otober dl 2020, n. 12.
L'art. 23/quater é gnü ajunté dal art. 1, coma 2 dla l.p. di 14 de messé dl 2015, n. 8.