(1) La formaziun permanënta é n setur autonom de döt le sistem formatif.
(2) Cun formaziun permanënta capëscion, aladô dl aprendimënt tratan döta la vita, dötes les sorts d’aprendimënt organisé, ater co nia i cursc regolars d'istruziun scolastica y universitara. 3)
(3) Cun ativités de formaziun permanënta capëscion ince düc i proiec y les scomenciadies, sciöche ince i stüdi y les publicaziuns che ti vá do ai fins de chësta lege.
(4) L'aministraziun provinziala, les aministraziuns de comun sciöche ince strotöres de formaziun privates y publiches realisëia ci che vëgn nominé ti comesc dessura, tl respet dl prinzip de sussidiarité.
(5) La Provinzia determinëia le cheder normatif y stabilësc i prinzips generai sciöche ince les condiziuns ditatiches y organisatives por tigní les ativités de formaziun permanënta. Te chësc contest individuëia la Provinzia i ciamps d'ativité y les priorités.
(6) La Provinzia y i Comuns ciara periodicamënter te so raiun teritorial cal che é le bojëgn y controlëia la realisaziun dles scomenciadies de formaziun permanënta.
(7) La Provinzia sostëgn la formaziun de basa y l’ajornamënt dles colaboradësses y di colaboradus dla formaziun permanënta sides tres scomenciadies diretes che tres finanziamënc spezifics. 4)