(1) Le personal á le dërt da tó pert tratan l’orar de laur a incuntades sindacales por alplü 10 ores al ann paiades a porsona, ater co sce al é preodü de mius condiziuns tl contrat coletif a livel de raiun. An pó ince tó pert ales sentades defora dal orar de laur y an ne ciafa nia n paiamënt porchël. Les sentades pó gní cherdades ite por rajuns organisatives y por conzede la partezipaziun paiada dl personal ince fora dl orar de laur, do avëi ciafé le consëns dl datur de laur. L’aministraziun mët a desposiziun i locai por tigní les sentades.
(2) Les sentades vëgn cherdades ite, singolarmënter o adöm, dales organisaziuns sindacales rapresentatives dl raiun, cun n ordin dl de che reverda i interesc sindacai y dl laur; ares vëgn tignides tl ordin de comunicaziun dles convocaziuns al’aministraziun. Les sentades pó gní cherdades ite ince dala rapresentanza sindacala unitara (RSU).
(3) Sce al vëgn cherdé ite n’incuntada ti vëgnel lascé alsavëi por scrit al’aministraziun altamo sis dis denant, sce la sentada reverda le personal dozënt y chël ecuiparé a d’ël, y altamo trëi dis de laur denant, sce al reverda l’ater personal. L’aministraziun ti lascia alsavëi por scrit altamo 48 ores denant fac eventuai y ezezionai por chi che la sentada mëss gní spostada. Le personal dozënt y chël ecuiparé a d’ël ti lascia alsavëi altamo dui dis denant a süa dirigënta/so dirigënt sce al tol pert, y l’ater personal altamo le de dant.
(4) Ater co sce al vëgn preodü atramënter a livel de raiun, vëgn les incuntades tles scores de regola tignides dales 13.00 inant. Tratan les ativités de valutaziun y de ejams ne pól nia gní fat incuntades sindacales. Tles scolines vëgn les incuntades cherdades ite a na moda da garantí te vigni caje le sorvisc cina les 12.30. La partezipaziun a na incuntada tratan l’orar de sorvisc da pert dl personal dles scolines che röia so sorvisc dan la incuntada alda pro les ores paiades preodüdes dal coma 1.
(5) I contrac coletifs regolamentëia les modalités de sorvisc dl dërt da tó pert ales incuntades, ciaran canche ares vëgn cherdades ite, di bojëgns de sconanza di dërc garantis dala costituziun, dantadöt chi dla sanité, dla segurëza y dl’istruziun.