b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) Chëstes deliberaziuns dl IPFS mëss gnì sotmetüdes al control de legitimité da pert dla Junta provinziala:

1. i regolamënć;
2. l’ordinamënt di ofizi y la strotöra di sorvisc;
3. le bilanz de previjiun y les variaziuns relatives;
4. le cunt consuntif;
5. le regolamënt dl personal y les acordanzes de setur cun les mudaziuns relatives;
6. les convenziuns danter l’IPES y i atri ënć;
7. l’assunziun de imprësć;
8. l’indenisaziun d’inćiaria che ti speta al Presidënt, al Vizepresidënt y ai atri comëmbri dl Consëi d’aministraziun y dl Consëi de control.

(2) Por ći che reverda les atres deliberaziuns ti mëna l’IPFS la lista corespognënta ala Junta provinziala tl tëmp de set dis dala data dla deliberaziun. Sce la Junta provinziala se damana les deliberaziuns singules ti mësseres gnì menades tl tëmp de chinesc dé dala recioiüda dla domanda. Implü mëss l’IPFS ti menè na copia dles ates damanades ala Junta provinziala tl tëmp de chinesc dé dala recioiüda dla domanda dla Junta. Implü à le Consëi d’aministraziun le podëi de sotmëte ala Junta provinziala de süa scomenciadia deliberaziuns por le control de legitimité.

(3) Tl tëmp de 30 dis dala data dla recioiüda po la Junta provinziala anulè les deliberaziuns che violëia les leges, i regolamënć o le statut dl IPFS sciöche inće les deliberaziuns che va cuntra i interesc dl IPFS o dla Provinzia. Por les deliberaziuns che reverda regolamënć y por mudaziuns eventuales é chësc terminn fissé cun 60 dis.

(4) La Junta provinziala mëna n comissêr aposta por ademplì i ać d’oblianza por lege o por ti jì do ai impëgns surantuć te na manira varënta sce i organns ordinars che é gnüs invià plü iadi a fistidié é tardis o trascurëia sü dovëis.

(5) Les deliberaziuns aladô dl coma 1, che reverda le bilanz y sües variaziuns, é esecutives sce la Junta provinziala ne formulëia nia l’anulamënt anter le terminn pretlusif de 60 dis por ći che reverda le bilanz, y de 30 dis por ći che reverda les variaziuns relatives. Chisc terminns pëia ia dala data de recioiüda.

(6) Ann por ann ti dà l’IPFS cunt ala Junta provinziala, anter i terminns da ëra stabilis cun deliberaziun, dla situaziun d’atuaziun di programs de costruziun inće por ći che reverda les spëises portades y i resultać arjunć.