a) Lege Provinziala di 17 de otober dl 1981, n. 281)
Ordinamënt dl’Aziënda provinziala por l’aministraziun di bosć y dl demane tla Provinzia autonoma de Balsan

(1) Chëstes é les funziuns dl consëi d’aministraziun:

• a)  delibré le bilanz preventif, les mudaziuns de bilanz y le cunt consuntif dl’Aziënda;
  
• b)  delibré la strotöra interna dl’Aziënda, sciöche inće le numer y vigni ćiamp de competënza dles staziuns forestales demaniales;
  
• c)  fà propostes ala Junta provinziala da cumprè y vëne terac da bosch, pastöres y pra da munt, sperses nia produtives y d’atri bëgns imobii; 13)
  
• d)  fà propostes da cumprè imobii agricoi nia coltivà; 14)
  
• e)  aprovè i planns economics preodüs dal art. 3, coma 2;
  
• f)  determiné i terac che ne va nia bun por l’Aziënda y gnanca sciöche raiuns de sconanza, reproduziun y palsa por la salvarjina aladô dl articul 4;
  
• g)  aprovè le program dles ativitês dl’Aziënda nominades tl articul 2 y sües mudaziuns tl respet di limić de spëisa preodüs dal bilanz odü danfora dala lëtra a);
  
• h)  aprovè les conzesciuns de terac demaniai y frabicać che döra por plü co nü agn; 15)
  
• i)  aprovè l’import mascimal por venüdes a man lëdia;
  
• l)  aprovè i prisc minimai por la venüda a man lëdia de produć forestai;
  
• m)  aprovè les tarifes minimes de conzesciun y i criters por i documënć de conzesciun che döra manco co 9 agn;
  
• n)  aprovè l’esecuziun de ativitês y intervënć aladô dl articul 2, ultimo coma, sciöche inće la contlujiun de contrać d’esecuziun di laûrs por ći che reverda intervënć straordinars lià ales ativitês dl articul 2;
  
• o)  stabilì le numer mascimal di funzionars cun n davagn fis;
  
• p)  dè l’autorisaziun da lascè jö l’auto a paiamënt sön sperses gestides dal’Aziënda y che vëgn destinades a plazes da parchè tl plann urbanistich provinzial y stabilì la tassa por parchè; 16)
  
• q)  conzede, tl respet di bojëgns dl’Aziënda, sön terac che ti é gnüs dà en gestiun al’Aziënda le dërt de suraspersa por alplü 29 agn, ater co sce chësc vëgn renovè, por la realisaziun y le mantignimënt de frabicać publics o d’interès publich o de d’atres operes che mëss gnì scrites ite tl cataster di frabicać y stabilì les condiziuns por dè fora la conzesciun che toca laprò. 17)
  

(2) Por che les deliberaziuns veles mëss plü co mec i comëmbri dl consëi, cun laprò inće la porsona a će o chëra en süa sostituziun, ester presënć.

(3) Les deliberaziuns vëgn fates a maioranza dles usc.

(4) Cuntra i ać aministratifs che é gnüs dà fora dal consëi d’aministraziun, sce ara ne se trata nia de ać definitifs por lege, pol gnì fat recurs, da pert de che che à interès, te n’istanza unica ala Junta provinziala por rajuns de legitimité y de mirit. Le recurs mëss gnì fat te 30 dis, scenò ne vel nia plü, da canche l’at contestè é gnü notifiché o comuniché sön tru aministratif o dal momënt olache la porsona interessada ê informada deplëgn sön l’at. 18)