a) Lege Provinziala di 17 de otober dl 1981, n. 281)
Ordinamënt dl’Aziënda provinziala por l’aministraziun di bosć y dl demane tla Provinzia autonoma de Balsan

(1) Tl respet dla legislaziun varënta y dles diretives stabilides dal consëi d’aministraziun se crüzia l’Aziënda da:

1. aministré, miorè y amplié le patrimone indesponibl dla Provinzia nominé tl articul 3, garantì sües funziuns de produziun, proteziun y recreaziun tl respet dla sconanza dl ambiënt, promöie l’adoranza sostenibla dles ressurses naturales y regolè y controlè la prelevaziun de salvarjina ti raiuns de sconanza demaniai;
   
2. garantì la sconanza dl terac, le mantignimënt y la restauraziun dl ecuiliber idrogeologich y bioecologich ti raiuns de süa competënza;
   
3. promöie a livel provinzial la formaziun de resserves de lignan tres l’ampliamënt dla spersa de bosch de proprieté dla Provinzia, tres la gestiun di vivà y inće tres la lauraziun y la comerzialisaziun dl lignan prodüt tl’Aziënda;
   
4. promöie y fà ativitês d’inrescida, stüdi y cursc d’istruziun ti seturs di bosć, dla ćiacia y dla siëia y organisé dantadöt la formaziun y l’ajornamënt dl personal forestal, di lauranć forestai, di verdaćiacia, di iagri y di lauranć dla siëia y inće mëte a jì y tignì cursc sön la segurëza sön le laûr ti seturs odüs danfora dala lege che vel en materia;
   
5. fà les ativitês d’istitut preodüdes dala lege provinziala di 21 d’otober dl 1996, n. 21, y mudaziuns suandëntes o da d’atres normes de lege. 2)
   

(2)L’Aziënda pó eserzité por d’atri ënc publics o, sce al é les condiziuns preodüdes dal articul 33, coma 1, dla lege provinziala di 21 d’otober dl 1996, n. 21, por terzi laurs y intervënc desvalis da chi preodüs dal coma 1 y desponüs dal consëi d’aministraziun, tan inant che ai vá a öna cun l'atuaziun de so program de laur. 3) 

(3) L’Aziënda atuëia por la Repartiziun provinziala Bosć i proiec en economia preodüs y autorisá dala Repartiziun y s’anüza porchël dles strotöres. 4)