(1) Les prescriziuns suraprò por l'atuaziun dl titul II vëgn stabilides cun regolamënt de esecuziun.
(2) Les desposiziuns preodüdes dal titul II vëgn inće aplicades sce les ativitês che alda laprò vëgn eserzitades da impreses industriales o de sorvisc. Te chësc caje po i recuisić profescionai che alda laprò gnì desmostrà inće dai dependënć dla impresa.
(2/bis) Les desposiziuns preodüdes dal titul II, seziun V/bis vëgn ince aplicades sce les ativités che alda lapró vëgn eserzitades da impreses agricoles. 48)
(2/ter) L'esperiënza profescionala preodüda dal titul II é minada sciöche esperiënza de laur fata a tëmp plëgn. 49)
(3) Zënza tochè les desposiziuns preodüdes dal titul II de chësta lege y a öna cun i articui da 43 a 55 dl Contrat CE y les diretives 2005/36/CE y 2006/123/CE, é l’eserzize autonom dles ativitês artejanales che é tla lista dles profesciuns sotmetüdes al lernerat dla provinzia de Balsan, lié ala desmostraziun di recuisić profescionai stabilis cun regolamënt de esecuziun. Por l’eserzize autonom de ativitês artejanales che ne n’é nia tla lista dla provinzia de Balsan dles profesciuns sotmetüdes a lernerat po la Junta provinziala, a öna cun les normes dl’UE dades dant dessura y do avëi aldì les organisaziuns profescionales plü rapresentatives dla provinzia, scrì dant na esperiënza profescionala tla materia de altamo dui agn.
(4) I programs dl ejam de maester artejan por sigać y carigas mëss preodëi conescënzes profescionales che garantësc la produziun a regola d'ert de lignan da costruziun, dantadöt chëres che abilitëia al adempimënt dles funziuns de diretur tecnich preodü dal decret ministerial di 14 de setëmber dl 2005. Le diplom de maester artejan che alda laprò sostituësc l'atestat de cualificaziun odü danfora dal decret nominé.
(5) Les competënzes dl tecnich abilité preodüdes dal articul 1, coma 348, lëtra a), dla lege di 27 de dezëmber dl 2006, n. 296, cun laprò la responsabilité zivila y penala corespognënta, po - limité ales ativitês che alda pro le ćiamp de sües competënzes aladô dl profil profescional - gnì eserzitades inće da che che à stlüt jö cun n resultat positif la formaziun dada dant tl articul 12 de chësta lege. Chësc vel a condiziun che la Junta provinziala - do avëi aldì les organisaziuns profescionales plü rapresentatives dla provinzia - ais stabilì les profesciuns artejanales te chësc ćiamp, sciöche inće l'atribuziun di investimënć energetics desvalis por les profesciuns che alda laprò.
(6) Les impreses artejanales che é scrites ite por l’eserzize de na certa ativité tl Register dl comerz de n'atra regiun taliana o dla provinzia de Trënt y che ponsa da se lascè jö cun la medema ativité tla provinzia de Balsan vëgn scrites ite tl Register dl comerz dla Ćiamena dl comerz de Balsan sön la basa de süa iscriziun tl Register dl comerz dla regiun o dla provinzia de provegnënza. Le medemo vel por les abilitaziuns dl eserzize autonom dl’ativité conzedüdes dales autoritês competëntes tles atres regiuns talianes. 50)
(7) I zitadins de n Stat comëmber dl'Uniun europeica che ponsa da eserzité na ativité artejanala o se lascè jö cun na ativité artejanala tla provinzia de Balsan depenn dala diretiva 2005/36/CE y dales normes de aplicaziun che alda laprò por l’eserzize dles ativitês respetivamënter por l'iscriziun tl Register dl comerz.
(8) La contlujiun dla formaziun de maester artejan aladô dl titul I, pert IV, abilitëia i slosseri y feurs scrić ite tl Register dl comerz da eserzité la funziun diretur tecnich y coordinadù da bolì, aladô dla lege di 5 de novëmber dl 1971, n. 1086 y dla lege di 2 de forà dl 1974, n. 64 – surantutes tl decret dl Presidënt dla Republica di 6 de jügn dl 2001, n. 380 – sciöche inće aladô dl articul 5 dl decret-lege di 28 de mà dl 2004, n. 136, convertì dala lege di 27 de messè dl 2004, n. 186. 51)
(9) Sce al é preodü tles normes dl’Uniun europeica o statales che por eserzité certes ativitês o por adorè certes materies prömes o cer materiai, val debojëgn de recuisić particolars o standarg spezifics, po chëstes desposiziuns gnì atuades cun deliberaziun dla Junta provinziala, da publiché tl Boletin Ofizial dla Regiun. 51)
(10) La contlujiun dla formaziun de maester artejan aladô dl titul I, pert IV, abilitëia i maestri artejans scrić ite tl Register dl comerz da eserzité la funziun de diretur tecnich aladô di articui 87 y 248 dl decret dl Presidënt dla Republica di 5 d’otober dl 2010, n. 207. 51)
(11) Les porsones che à le diplom da maester artejan, aladô dl titul I, pert IV, por les profesciuns dl setur dl frabiché y dles istalaziuns, che vëgn stabilides cun deliberaziun dla Junta provinziala, po dè fora zertificaziuns sön l’efiziënza energetica complessiva di frabicać, preodüdes dala diretiva 2002/91/CE dl Parlamënt europeich y dl Consëi di 16 de dezëmber dl 2002 sön l’efiziënza energetica complessiva di frabicać. 51)