(1) Tles localitês dla provinzia de Balsan che é sëntes de strotöres universitares po l’aministraziun provinziala mëte a desposiziun poscibilitês abitatives sciöche cuartiers, ćiases por studënć o istituziuns analoghes che vëgn manajades diretamënter dal’aministraziun provinziala o da terzi por studëntes y studënć sciöche inće por les professuries y i professurs a contrat, i visiting professors y por les assistëntes y i assistënć a contrat. La Junta provinziala stabilësc l’afit a ćiaria dles porsones che nen benefiziëia y inće i criters y les modalitês por rové pormez a chëstes poscibilitês abitatives.
(2) La Junta provinziala po stlüje jö convenziuns cun Regiuns o d’atres istituziuns publiches o privates tla Talia o te paîsc dl raiun cultural todësch por resservè n numer adeguè de posć da dormì por studëntes y studënć de Südtirol te strotöres residenziales aposta. Tles convenziuns vëgnel anter l’ater stabilì i criters por rové pormez a chëstes poscibilitês abitatives y inće i cosć por resservè i posć da dormì da pert dl’aministraziun provinziala. L’afit y les spëises secundares é a ćiaria dla studënta o dl studënt che à chësc benefize.
(3) Acioche les strotöres vëgnes adorades deplëgn y cun razionalité po la Junta provinziala ti conzede de rové pro na poscibilité d’abitaziun te chëstes strotöres inće a porsones che n’à aladô de chësta lege nia le dërt de rové ite.
(4) Le post da dormì te na te’strotöra abitativa po gnì acumulé cun les atres prestaziuns preodüdes tl articul 1, coma 1.
(5) Ai ënć y ales assoziaziuns, zënza fins de davagn, che mët a desposiziun posć da dormì preodüs dal coma 1, ti pol gnì conzedü contribuć ćina a na mosöra mascima dl 90 porcënt dles spëises reconesciüdes por:
- cumprè frabicać o tòć de grunt;
- proietè, fà sö, amplié, sistemé, restrotoré y completè frabicać;
- cumprè aredamënć y atrezadöres.
(6) I ënć y les assoziaziuns che ciafa i contribuć preodüs dal coma 5 mëss s’impegné a ne mudé nia la destinaziun d’adoranza di frabicać cun ći che alda laprò, atrezadöres y aredamënt, zënza consëns dla Junta provinziala. La dorada de chësc impëgn, che ne po nia ji sot ai 20 agn mo gnanca sura i 50 agn fora, vëgn stabilida dala Junta provinziala tolon en conscidraziun la mosöra dl contribut conzedü. L’impëgn de ne mudé nia destinaziun d’adoranza vëgn anotè tl liber fondiar.
(7) Sc’al vëgn mudé destinaziun d’adoranza di frabicać y de ći che alda laprò mëssel gnì dè zoruch le contribut cun i fić legai. Sce la strotöra vëgn adorada inant por fins soziai spo vëgn le contribut conzedü smendrì, en raport al tëmp che le frabicat é gnü adorè aladô dla destinaziun dada dant tl coma 1. La desfarënzia, cun i fić legai laprò, mëss gnì dada zoruch.
(8) Desvian dales desposiziuns preodüdes dai comesc 6 y 7 po i bëgns cun lian de destinaziun gnì metüs a desposiziun dla Provinzia sön paiamënt de n’indenisaziun che tëgn cunt di contribuć ciafà.
(9) Por ti garantí le dërt da studié al’université ales studëntes y ai studënc dla provinzia de Balsan tl respet dles carateristiches etnich-linguistiches, ti pó la Provinzia conzede i contribuc preodüs dal coma 5 ince a istituziuns publiches o privates te paisc dl raiun cultural todësch che gestësc diretamënter o tres terzi, convic universitars o istituziuns somiëntes y che mët a desposiziun dantadöt lec a studëntes y studënc dla provinzia de Balsan. Por chësc fin stlüj jö la Provinzia convenziuns aposta cun les istituziuns nominades dessura tl respet dles desposiziuns preodüdes dai comesc 5, 6, 7 y 8. 22)
(10) Por realisé i obietifs preodüs dal coma 9 pó la Provinzia autonoma de Balsan stlü jö convenziuns cun ënc raionai, ince locai, por tó pert ales spëises d’investimënt de sües ciases di studënc, sce:
- al vëgn garantí tles ciases di studënc da vire bunmarcé;
- al vëgn metü a desposiziun di studënc y dles studëntes dla provinzia de Balsan n gran numer de posć te cuartiers;
- ara se trata de comuns cun n marcé dles abitaziuns tla crisa;
- le raport danter la partezipaziun ales spëises da pert dla Provinzia y la spëisa complessiva ne vá nia sura le raport danter studënc y studëntes dla provinzia de Balsan y le numer total de studënc y studëntes tla ciasa di studënc. 23)