c') Lege Provinziala di 5 de merz dl 2001, n. 71)
Ordinamënt nü dl Sorvisc sanitar provinzial

(1)  Le Comité provinzial por la programaziun sanitara vëgn istituí sciöche organ tecnich consultif dl’Aministraziun provinziala.

(2)  Le Comité provinzial por la programaziun sanitara:

1. dá jö arac sön le Plann sanitar provinzial y verifichëia süa situaziun d'atuaziun, tl respet dl articul 30;
   
2. dá jö arac sön i programs planivolumetrics di singui proiec y sön le program plurienal dl frabiché sanitar;
   
3. dá jö arac sön le program anual y plurienal por i intervënc de manutenziun straordinara di frabicac sanitars aladô dl articul 16, coma 4 dla lege provinziala di 2 de jená dl 1981, n. 1, y mudaziuns suandëntes;
   
4. dá jö arac sön le program anual y plurienal por la cumpra de inijins biomedics sciöche ince de aparac, implanc y aredamënc tecnics aladô dl articul 16, coma 5 dla lege provinziala di 2 de jená dl 1981, n. 1, y mudaziuns suandëntes;
   
5. dá jö arac sön le program anual y plurienal por i proiec tl ciamp dla tecnica dl'informaziun y dla comunicaziun, sciöche ince por la cumpra de hardware y software aladô dl articul 16, coma 5 dla lege provinziala di 2 de jená dl 1981, n. 1, y mudaziuns suandëntes;
   
6. dá jö arac facoltatifs sön les tarifes dles prestaziuns sanitares;
   
7. dá jö arac sön i orientamënc y les sorts de prestaziuns sciöche ince, tignin cunt dles desposiziuns sön la partezipaziun ai cosć sanitars, sön la mosöra di imporc che vëgn retüs por les prestaziuns spezialistiches ambulantes, aladô dl articul 34, coma 4;
   
8. dá jö arac sön le bojëgn de formaziun plurienal y anual dles profesciuns sanitares y di cursc de spezialisaziun, y en particolar sön le fabojëgn de doturs de medejina generala y de doturs spezialisć en referimënt ales spezialisaziuns aladô dl articul 2, coma 1 dla lege provinziala di 15 de novëmber dl 2002, n. 14;
   
9. dá jö arac facoltatifs sön le bojëgn de acreditamënt de sogec privac che eserzitëia prestaziuns sanitares, sön le scomenciamënt dla valutaziun tecnica do che al é gnü fat domanda de acreditamënt, sciöche ince sön les domandes d'autorisaziun o acreditamënt desvian dales ghiranzes stabilides aladô di articui 39 y 40.
   

(3)  Le Comité é metü adöm da:

1. l'Assessur provinzial por la sanité, sciöche presidënt;
   
2. le Diretur dla Repartiziun provinziala Sanité, sciöche vizepresidënt;
   
3. le Diretur general dl'Aziënda Sanitara;
   
4. le Diretur sanitar, le Diretur aministratif y le Diretur tecnich-assistenzial dl'Aziënda Sanitara;
   
5. cater rapresentanc dl personal sanitar academich, danter chësc dui doturs; un di doturs mëss ester espert por l'organisaziun y la programaziun sanitara, l'ater vëgn proponü dal Ordin di doturs y doturs di dënz dla provinzia de Balsan;
   
6. n rapresentant dl personal che n'é nia dotur;
   
7. trëi rapresentanc di comuns y plü avisa le presidënt dl Consëi di Comuns o n so deleghé, n rapresentant di presidënc dles Comunités comprensoriales y n rapresentant dl Comun de Balsan;
   
8. le Diretur dla repartiziun provinziala Politiches soziales;
   
9. n rapresentant de privac che ademplësc prestaziuns sanitares convenzioná cun le Sorvisc sanitar provinzial;
   
10. dui rapresentanc dles organisaziuns di paziënc;
    
11. i Direturs di distrec sanitars.
    

(4)  Sce al vëgn traté argomënc che reverda les tecnologies biomediches, le frabiché sanitar, la medejina y la pediatria de basa vëgn le Comité integré cun n espert de tecnologies biomediches, n espert de frabicac sanitars, n rapresentant di doturs de medejina generala y n rapresentant di doturs di mituns de lîta lëdia. Vigni comëmber surapró tol pert cun dërt de usc.

(5)  L'organisaziun y les modalités de funzionamënt dl Comité provinzal por la programaziun sanitara vëgn regolamentades dala Junta provinziala.

(6)  Le Comité vëgn nominé dala Junta provinziala y romagn tl’inciaria por la dorada dla legislatöra. Les funziuns da secreter vëgn destrigades da n impiegat dla Repartiziun provinziala Sanité, che é almanco tl sesto livel. 110)