(1) Les porsones residëntes tla Provinzia de Balsan scrites ite tl Sorvisc sanitar provinzial che vëgn tutes sö te strotöres publiches o privates, che n’à nia por chë sort de prestaziun raporć contratuai cun le Sorvisc sanitar nazional o provinzial, à le dërt ala retüda dles spëises efetivamënter sostignides y reconesciüdes dal Sorvisc sanitar provinzial, sce ares n’à nia bele n’assiguraziun privata o ne po nia s’anuzé de d’atres formes de indenisaziun reconesciüdes dala Junta provinziala, che cür chëstes spëises sanitares. Sce chëstes spëises sanitares vëgn ma curides en pert, ti spétel n import mascimal, cun laprò la cuota curida dal’assiguraziun, che ne po nia superè les spëises sostignides efetivamënter y reconesciüdes dal Sorvisc sanitar provinzial. La retüda vëgn stabilida aladô dla tarifa fata fora dala Junta provinziala che é mëndra co chëra stabilida por les prestaziuns pitades diretamënter y che vëgn fata fora aladô dles fasces de davagn che ara à fissé. 71)
(1/bis) La Junta provinziala po lié la retüda dles prestaziuns ales condiziuns de cualité y conformité. 72)
(2) Por la retüda tres l’Aziënda sanitara d’apartenënza, determinëia la Junta provinziala la modalité d’azès ala strotöra y i termi de presentaziun dla domanda y dla documentaziun revardënta. Sce i termi ne vëgn nia respetà, spo tomi.73)
(3) Do avëi ciafé la comunicaziun che la retüda ne vëgn nia conzedüda, pól gní fat recurs anter 30 dis, zënza toma le termin, ala Comisciun provinziala por la dezijiun di recursc dl’assistënza sanitara. La Comisciun vëgn istituida pro la Repartiziun provinziala Sanité y tol definitivamënter na dezijiun sön i recursc. Ara vëgn nominada dala Junta provinziala y é metüda adöm dal presidënt o da n so deleghé, che vëgn chiris fora pro la Repartiziun Sanité, y da d'atri sis comëmbri. Almanco cater comëmbri é doturs, de chisc é almanco un n profescionist lëde. I atri comëmbri é funzionars dla Provinzia. 74)
(4) Ala comisciun aladô dl coma 3 ti vëgnel atribuì i compić dl zënter regional de referimënt aladô dl articul 3 dl Decret dl Minister por la sanité di 3 de novëmber 1989.
L'art. 33, coma 1, é gnü naôta sostituì dal art. 11 dla l.p. di 23 de messè dl 2007, n. 6, y daldô dal art. 21, coma 1, dla l.p. di 21 de dezëmber dl 2011, n. 15.
L'art. 33, coma 1/bis é gnü injuntè dal art. 21, coma 2, dla l.p. di 21 de dezëmber dl 2011, n. 15.
Le coma 2 é gnü sostituì dal art. 11 dla L.P. di 23 de messè 2007, nr. 6.
L'art. 33, coma 3 é impröma gnü sostituí dal art. 11 dla l.p. di 23 de messé dl 2007, n. 6, y spo dedô dal art. 3, coma 7 dla l.p. di 21 d'aurí dl 2017, n. 4, y spo dedô él gnü mudé insciö dal art. 23, coma 1, dla l.p. 16 d'agost, nr. 10.