c') Lege Provinziala di 5 de merz dl 2001, n. 71)
Ordinamënt nü dl Sorvisc sanitar provinzial

(1) La programaziun sanitara provinziala ti speta ala Junta provinziala che vëgn sostignida por chësc fin dala Repartiziun provinziala Sanité, dai organs consultifs en materia de sanité, dal'Aziënda Sanitara y da esperc da defora.

(2)  Stromënc essenziai por la programaziun sanitara provinziala é:

1. le Plann sanitar provinzial;
   
2. i planns de setur, che determinëia strategies y mosöres spezifiches por aspec singui dl'assistënza sanitara, sön la basa di prinzips y di fins stabilis tl Plann sanitar provinzial;
   
3. i programs d'intervënt cun fins spezifics por la proteziun dla sanité dla popolaziun.
   

(3)  Le Plann sanitar provinzial y le Plann sozial provinzial preodüs dal articul 2 dla lege provinziala di 30 d'aurí dl 1991, n. 13 é acordënc un cun l'ater y deboriada formëii la programaziun sanitara y soziala coordinada y integrada.

(4)  Por garantí la faziun, l’efiziënza y la planificaziun coreta dl fabojëgn sanitar provinzial vëgn i stromënc de planificaziun arjigná ca, atuá, controlá en relaziun a süa atuaziun y en caje adatá, en conscidraziun:

1. di svilups demografics y epidemiologics;
   
2. dl'evoluziun clinica, dl svilup scientifich y tecnologich sciöche ince de d'atres evoluziuns tl ciamp sanitar.
   

(5)  Le Plann sanitar provinzial é le stromënt de programaziun por assiguré na planificaziun che döra dl'assistënza sanitara dla popolaziun. Sciöche plann strategich de orientamënt y govern dl'assistënza sanitara stabilëscel por le tëmp de programaziun corespognënt i fins prinzipai, sciöche ince les strategies y les mosöres eventuales por i arjunje, cun referimënt particolar ai trëi liví d'assistënza: l'assistënza sanitara coletiva tl ambiënt de vita y laur, l'assistënza ti raiuns y l'assistënza te ospedal.

(6)  I fins, les strategies y les mosöres da odëi danfora tl Plann sanitar provinzial vëgn determiná tl respet de chisc criters:

1. garanzia dla miú cualité poscibla dles prestaziuns sanitares y di resultac relatifs;
   
2. la faziun dles prestaziuns sanitares por i paziënc aladô dl comosoramënt, dl'utilité efetiva y dla sodesfaziun di paziënc;
   
3. garanzia dla sostignibilité finanziara de dorada mesana y lungia dl Sorvisc sanitar.
   

(7)  Por l’aprovaziun dl Plann sanitar provinzial vëgn le proiet dl Plann, delibré dala Junta provinziala, dé jö y taché fora al publich tl'Aministraziun provinziala, ti Comuns dla provinzia y tl Consëi di Comuns, sciöche ince publiché online. La data d’esposiziun dl proiet dl Plann vëgn lasciada alsavëi damperfora tres n avis publiché tl Boletin Ofizial dla Regiun Trentino-Südtirol y te altamo dui foliec da vigni de locai, un por talian y un por todësch, sciöche ince te n foliet edemal. Le proiet dl Plann vëgn tachè fora 30 dis alalungia, tratan chi che düc po ti ciaré. Te chësc tëmp pó singoles porsones, sciöche ince i ënc y les assoziaziuns interessá ti presentè osservaziuns y propostes de perfezionamënt dl Plann ai Comuns, al Consëi di Comuns o ala Junta provinziala. Tratan chësc tëmp vëgnel aldì a livel provinzial les rapresentanzes di paziënc, independentemënter da süa forma d'organisaziun, les assoziaziuns y confederaziuns interessades, sciöche ince les perts soziales. I Comuns pó dé jö so arat motivé sön le proiet dl Plann ti 30 dis suandënc, tignin cunt dles osservaziuns y propostes che ti é gnüdes fates y ti le ortiëia inant al Consëi di Comuns. A vigni moda ti ortiëia i Comuns les osservaziuns y propostes che ti é gnüdes fates al Consëi di Comuns. Ti 30 dis suandënc dá spo jö le Consëi di Comuns so arat motivé sön le proiet dl Plann, tignin cunt di arac di Comuns, y ti le mëna inant ala Junta provinziala. Sce le Consëi di Comuns ne dá te chësc tëmp nia jö süa tuta de posiziun, ne vëgnel nia plü tigní cunt de chësta.

(8)  La Plann sanitar provinzial vëgn aprové dala Junta provinziala y al vá en forza le medemo de de süa publicaziun tl Boletin Ofizial dla Regiun Trentino-Südtirol, tan inant che al n’é nia gnü stabilí atramënter.

(9)  Le Plann sanitar provinzial vel por almanco trëi agn y alplü por cin' agn. Al mantëgn süa validité cina che le plann suandënt vá en forza.

(10)  Por assiguré che al vëgnes arjunt i fins stabilis dal Plann sanitar provinzial valutëia tres indô le Comité provinzial por la planificaziun sanitara sce les strategies y mosöres che é tl Plann vëgn atuades. Por chësta valutaziun pó le Comité ince se sorví dl sostëgn de esperc da defora en materia de programaziun sanitara. Les modalités y i tëmps dla valutaziun regolara, sciöche ince les adataziuns puntuales dl Plann, che mëss en caje gní fates do da chësta valutaziun, vëgn stabilis dala Junta provinziala cun l'aprovaziun dl Plann sanitar provinzial. Al'adataziun puntuala nominada dessura, che pó ince gní fata vigni ann, ne vëgnel nia apliché le coma 7. 62)