(1) En referimënt a ći che é preodü tl articul 30, coma 3 vëgnel metü en funziun le Sistem informatif sanitar teritorial por promöie na programaziun y na gestiun efiziënta di sorvisc a bëgn di debojëns di zitadins.
(2) Le Sistem informatif sanitar teritorial coordinëia i sistems de informaziun di operadus dl Sorvisc sanitar provinzial, por chi che la Provinzia stabilësc diretives y protocoi tecnics de funzionamënt.
(3) Le Sistem informatif se dà da fà por chëstes finalitês:
- al fornësc ales strotöres dl Sorvisc sanitar provinzial l’aiüt che va debojëgn por le dër funzionamënt di bogn sorvisc;
- al garantësc ala Provinzia n flus de informaziuns por che les ativitês de programaziun, de control y d’organisaziun vëgnes fates te na manira adeguada ;
- en acordanza cun les atres strotöres sanitares, ti pîtel ai zitadins y ai operadus dl Sorvisc sanitar provinzial dać y informaziuns sön les ativitês fates y sön les prestaziuns por l’educaziun sanitara, la partezipaziun y le control ;
- al ti dà la poscibilité ala Provinzia y ai atri operadus dl Sorvisc sanitar provinzial de ti jì do al dovëi de informaziun scrit dant ti confrunć dles istituziuns, autorisades sciöche por ejëmpl le minister dla sanité, le minister dl tresur y l’Istat.
(4) Le sistem teritorial de sanité pîta laprò inće:
- l’infrastrotöra tecnologica nezesciara por ativé la tessera sanitara personala che ti vëgn dada a vignun che à le dërt ai sorvisc sanitars provinziai;
- l’infrastrotöra tecnologica nezesciara por ativé en acordanza cun les aziëndes sanitares y i sorvisc spezialisà competënć, i sorvisc de tele-medejina;
- l’infrastrotöra tecnologica nezesciara por ativé, en acordanza cun les aziëndes sanitares y i sorvisc spezialisà competënć, la cherta tlinica eletronica;
- l’infrastrotöra tecnologica dl Osservatore epidemiologich provinzial.
(5) Por les ativitês aladô dl coma 3 vëgnel ma tut en conscidraziun dać anonims, che ne se referësc nia a porsones identificades o che po gnì identificades.
(6) Les strotöres sanitares che anüza le Sistem informatif sanitar teritorial, laora fora i dać personai tan inant ch’ai reverda ma i compić y i sorvisc fać tla cornisc bëgn definida de so ćiamp d’aziun y de so sistem informatif local. Les medemes strotöres po indere inće anuzé, por la comunicaziun di dać personai a d’atres istituziuns, ti caji y ti limi preodüs dala lege nr. 675/1996 y mudaziuns suandëntes, de modalitês tecniches standard, inće de segurëza di dać, definis cun regolamënć dala Junta provinziala, sön la basa de na consultaziun dles categories interessades, do avëi aldì l’arat dl ënt por la sconanza di dać personai y en acordanza cun i rapresentanć sindacai di medi de medejina generala y di medi di mituns de lîta lëdia por les chestiuns por chëres ch’ai é responsabli.201)