(1) I contribuć de capital y i contribuć de de plü agn costanć aladô dl articul 2, coma 1, lëtres A) y B) à le fin de aumentè le patrimone de frabiches dl IPFS che é metü adöm da abitaziuns dades en afit ala generalité dles families cun n davagn plü bas, ales categories speziales o ales categories soziales particolares aladô dl articul 22, y da ćiases alberch por laurantes y lauranć, studëntes y studënć, porsones te na situaziun de handicap, porsones despartides - devorziades che é te dificoltês da n punt de odüda sozial y categories soziales particolares.39)
(2) L’aumënt dl patrimone de frabiches dl IPFS vëgn realisé tres:
- la costruziun o la cumpra de frabicać residenziai o la cumpra de frabicać adatà a gnì recuperà;
- la manutenziun straordinara y la recuperada de abitaziuns de proprieté dl IPFS o che vëgn aministrades dal IPFS;
- la tuta en afit de imobii a dorada lungia che va bun por recuperè abitaziuns.
(3) Al po gnì cumprè abitaziuns ma sc’ares n’é nia ocupades y sce sües carateristiches corespogn ai bojëgns dl IPFS.
(4) Por realisé le program de costruziun pol inće gnì cumprè frabicać che va bun por recuperè abitaziuns mo che é en pert ocupà da afitadins che à les condiziuns por ciafè en assegnaziun n cuartier adinfit dal IPFS. La cumpra de chëstes abitaziuns mëss gnì autorisada danfora dal assessur provinzial competënt y al mëss implü gnì desmostrè che, do che i laûrs de recuperada é gnüs stlüć jö, é le numer dles abitaziuns che é gnüdes recuperades por n’assegnaziun nöia trëi iadi tantes co chëres ocupades dai afitadins vedli.
(5) L’IPFS mët te n cunt spezial la soma anuala di afić tiran jö i cosć generai de aministraziun, de manutenziun ordinara y dles cutes; insciö fêjera inće cun la soma netta di afić di cuartiers de proprieté dla Provinzia che ti é gnüs surandà en aministraziun al IPFS.
(6) Tl program di intervënć aladô dl articul 6 vëgnel odü danfora l’adoranza di mesi dl cunt spezial por i fins dà dant te chësc articul.
(7) Por realisé sü programs de costruziun, la manutenziun straordinara y la recuperada de abitaziuns de proprieté dl IPFS o gestides dal IPFS, pó l’IPFS stlüje jö imprësć cun les banches do avëi ciafé l’autorisaziun dala Junta provinziala. La Provinzia garantësc por i imprësć tuc sö dal IPFS. L'IPFS se crüzia dl amortamënt dles rates dl imprëst cun i fonds metüs sön le cunt spezial. Sce i fonds metüs sön le cunt spezial ne foss nia assá se cruzion di intervënc preodüs tl program preodü dal articul 6. 40)
(8) Canch’al vëgn determiné l’amunta di contribuć al IPFS vëgnel inće tut en conscidraziun les somes trates ites dala zesciun en proprieté dles abitaziuns dl IPFS.