d) Lege provinziala di 10 de messè dl 2018, n. 91)2)
Teritore y cuntreda

(1) N possa fé recurs ala Jonta provinziela contra:

1. l’autorisazion de cuntreda cun cundizions o l pruvedimënt de refudeda dl diretëur/dla diretëura dla repartizion provinziela cumpetënta tl ciamp de natura, cuntreda y svilup dl teritore aldò dl articul 67 coma 1 de chësta lege.
   

(2) La Jonta provinziela dezid do avëi tëut ite l arat de n espert/na esperta dedora dl’aministrazione provinziela.

(3) N possa fé recurs al Coleghium per la cuntreda metù su pra la repartizion provinziela cumpetënta tl ciamp de natura, cuntreda y svilup dl teritore contra:

1. l’autorisazion de cuntreda cun cundizions o l pruvedimënt de refudeda dl Ambolt/dla Ambolta aldò dl articul 68 de chësta lege;
   
2. la refudeda dl’autorisazion de frabiché o l’autorisazion de frabiché cun cundizions per rejons architetoniches, de cuntreda o estetiches, nunziedes tl articul 72, coma 1, de chësta lege.
   

(4) L Coleghium per la cuntreda vën numinà dala Jonta provinziela per la dureda de 3 ani y l ie metù adum da:

1. n architet/n’architeta, sciche presidënt/presidënta, cris/crissa ora da na pruposta de trëi inuemes purteda dant dal Orden di Architec, Planificadëures, Paesajisć y Cunservadëures dla Provinzia de Bulsan;
   
2. n espert/na esperta de urbanistica, cris/crissa ora dal register nunzià tl articul 9;
   
3. n espert/na esperta de defendura dla cuntreda, cris/crissa ora dal register nunzià tl articul 9;
   
4. n espert/na esperta tl ciamp dl patrimone storich, artistich y etnografich;
   
5. n reprejentant/na reprejentanta dla repartizion provinziela cumpetënta per i bòsc o l’agrucultura, sun pruposta dla repartizion provinziela cumpetënta tl ciamp de agricultura o bòsc. 200)
   

(5) L Coleghium ie metù adum a na maniera valëivla cun la prejënza de duc si cumpunënc y l dezid a maiuranza dla ujes. Uni cumëmber/cumëmbra vën baratà ora/barateda ora, tl cajo d’assënza, da n cumëmber suplënt/na cumëmbra suplënta. La funzions de secreter/secretera vën eserzitedes da n giurist/na giurista dla repartizion provinziela cumpetënta de natura, cuntreda y svilup dl teritore.

(6) Ala sentedes dl Coleghium per la cuntreda possel tò pert n reprejentant/na reprejentanta dl Chemun diretamënter nteressà sciche nce la persona che fej recurs o na persona nciarieda da chësta, che muessa se n jì dan la lita.

(7) L recurs ala Jonta provinziela o al Coleghium per la cuntreda possa unì purtà ite dal damandant/dala damandanta tl tëmp nchin al tiermul d’esclujion de 30 dis dala nutificazion dl pruvedimënt y l vën tëut la dezijion lessù tl lim de tëmp de 90 dis dala data de prejentazion de chësc. Sce per ejaminé l recurs iel de bujën de fé n sëuraluech y la cundizions meteorologiches zariëuses da d’inviern ne l lascia nia pro tl tëmp preudù, possa l’unità urganisativa cumpetënta slungë l tiermul de lege per la dezijion de nchin al plu 90 dis. Dl slungiamënt dl tiermul muessel unì nfurmà l nteressà/la nteresseda y l Chemun cumpetënt per l teritore.

(8) L recurs aministratif ne suspënd nia i tiermui per la proposizion dl recurs dan sunieria. L recurs giuridich contra l medemo pruvedimënt fej a na moda che l recurs aministratif ne posse nia unì purtà inant.