(1) Sce le tentatif d'apajada ne gareta nia o sce al é tomé le termin preodü dal codesc de prozedöra zivila, pó les perts fá fora da ti surandé la soluziun dla stritaria ala comisciun de apajada preodüda dal articul 23, sciöche comisciun arbitrala, y chël ince tres l’organisaziun sindacala de chëra che le personal fej pert o a chëra che al ti á surandé le mandat.
(2) La domanda che alda lapró pó gní presentada tratan la prozedöra d’apajada y vëgn scrita tl verbal; ara pó ince gní dada jö daldô tla sënta dla signoria arbitrala.
(3) La domanda preodüda dal coma 2 mëss contigní avisa la ghiranza, sciöche ince les atres indicaziuns preodüdes dal articul 23, coma 6.
(4) La signoria arbitrala pó fá fora le termin por dé jö i documënc o les proes dles perts y comané l’aministraziun da dé jö la documentaziun aratada debojëgn por pronunzié la sëntenza arbitrala.
(5) La comisciun arbitrala dá jö la sentënza arbitrala te dui mëisc dala stlüta dla prozedöra de inrescida. Sce la sëntenza arbitrala ne vëgn nia emetüda te sis mëisc da canche al é gnü dé jö la domanda preodüda dal coma 2, pól gní inciarié l’autorité iudiziara impara.
(6) Ala presidënta/Al presidënt dla comisciun arbitrala y a süa sostituta/so sostitut ti spetel n paiamënt adaté da fá fora dala Junta provinziala, do s'avëi baié fora cun les organisaziuns sindacales rapresentatives a livel de raiun.