(1) Do le coma 1 dl articul 8 dla lege provinziala di 19 de merz dl 1991, n. 5, vëgnel ajuntè chisc comesc:
"2. Le personal dla Provinzia y di ënć publics che depënn dala Provinzia o che à l'ordinamënt che toca pro süa competënza legislativa o delegada, sciöche inće le personal dozënt paié dala Provinzia po gnì adorè ti dui agn denanco jì en ponsiun por avëi arjunt i limić d'eté, preodüs dales desposiziuns varëntes sön la previdënza, por les ativitês preodüdes dal articul 2, coma 1, dala lëtra a) ala lëtra e) y dal coma 2. Te chësc caje ne vara nia da proroghè le sorvisc do avëi arjunt le limit d'eté por jì en ponsiun.
3. La Junta provinziala fissa vigni ann le numer mascimal di dependënć y dles dependëntes che po s'anuzé dla poscibilité preodüda dal coma 1. Les condiziuns, i dovëis y les modalitês vëgn determinà sides dales desposiziuns provinziales sön le personal che dala Junta provinziala aladô de chësta lege.
4. La colocaziun y l’assegnaziun dl personal vëgn a s'al dè sön domanda dles porsones interessades tres les Repartiziuns provinziales Personal y Presidënza. Sce al va debojëgn po la Provinzia stlü jö convenziuns cun organisaziuns locales, nazionales y internazionales che laôra tl setur dla cooperaziun al svilup. Por assegné le personal val debojëgn dl consëns dl diretur dl’unité organisativa de portignënza. La valutaziun dl’idoneité de vigni candidat y de vigni candidata é de competënza dl’organisaziun olache al vëgn fat le sorvisc. La condiziun che va debojëgn por ti rové pormez al sorvisc é na formaziun adatada por gnì adorà y colaborè ai proieć. I cursc vëgn proponüs dal'organisaziun.
5. L’adoranza dl personal preodü dal coma 2 po gnì fata inće tl cheder di proieć y programs de cooperaziun al svilup sostignis dala Provinzia.
6. Les retüdes dles spëises reconesciüdes por l’inćiaria vëgn determinades dala Junta provinziala y é a ćiaria dles spëises generales por le personal dla Provinzia. La stipulaziun de n’assiguraziun por curì la responsabilité zivila y le prigo d’inzidënt é a ćiaria dl’organisaziun.”