d) Lege Provinziala di 19 de novëmber dl 2012, n. 191)
Desposiziuns por valorisé i sorvisc volontars tla provinzia de Balsan y mudaziuns de leges provinziales sön la cooperaziun al svilup y le personal

(1) La Provinzia autonoma de Balsan porta pro, aladô dl articul 2 dla Costituziun, ala valorisaziun di sorvisc volontars, sciöche inće al sostëgn dles formes particolares dl impëgn zivil dla popolaziun dla provinzia y s'anüza por arjunje chësc fin dles ressurses dla sozieté zivila y dl volontariat, sciöche inće de chëres de sü sorvisc tl ćiamp dl sozial, dla sanité, dla cultura, dl ambiënt, dla formaziun y dl tëmp lëde.

(2) I sorvisc volontars preodüs da chësta lege à le fin da:

1. ti assiguré a dötes les zitadines y a düć i zitadins dla provinzia da ti podëi pormez ai sorvisc volontars zënza desfarënzia d'eté, ses, cultura y religiun y podëi insciö valorisé süa partezipaziun ativa;
   
2. ti pité ai jogn sides pro le sorvisc zivil volontar che pro i sorvisc volontars da d'isté, la poscibilité da renforzè süa cosciënza soziala, y da fà esperiënzes y arjunje conescënzes d'öga por s'orientè sön so tru personal y profescional, sciöche inće da renforzè süa cosciënza de responsabilité por le bëgn de döta la sozieté;
   
3. ti pité ales porsones adultes de vigni eté la poscibilité da mëte a desposiziun dla comunanza les competënzes arjuntes y les esperiënzes fates y da ciafè porchël benefizi y credić;
   
4. sostignì tres i sorvisc volontars proieć y scomenciadies por sodesfà les nezescitês y i bojëgns de düć, ćiaran dantadöt dles porsones plü debles y che à debojëgn;
   
5. sostignì ativitês y seturs inovatifs sciöche le laûr por la pêsc, i intervënć de solidarieté, sciöche inće les formes alternatives de intervënć zënza violënza te situaziuns de crisa;
   
6. sostignì le svilup sostenibl dles sozietês sides a livel provinzial che global.
   

(1) Te chësta lege é i volontars y les volontares porsones jones y adultes che fej n sorvisc volontar aladô de chësta regolamentaziun zënza fins de davagn diret y defora da süa formaziun profescionala.

(1) I fins preodüs dal articul 1 vëgn realisà cun:

1. le sorvisc zivil provinzial volontar fat da jogn y jones dai 18 ai 28 agn pro organisaziuns y ënć de dërt publich y privat por alplü 12 mëisc, por credić y benefizi preodüs dal articul 6, comesc 1, 2, 5 y 6, [sciöche inće cun le sorvisc zivil volontar nazional preodü dala lege di 6 de merz dl 2001, n. 64;] 2)
   
2. le sorvisc sozial volontar fat da porsones adultes dai 29 agn insö pro organisaziuns y ënć de dërt publich y privat por alplü 32 mëisc, por chël che i volontars y les volontares ciafa i credić y i benefizi preodüs dal articul 6, comesc 1, 2, 5 y 6;
   
3. le sorvisc volontar da d'isté fat da jogn y jones dai 15 ai 19 agn, tl respet de sü dërć, pro organisaziuns y ënć de dërt publich y privat, da 6 a 8 edemes, por chël che i jogn y les jones ciafa i credić y i benefizi preodüs dal articul 6, comesc 1, 2, 4, 5 y 6.
   

(1) L’adoranza de volontars y de volontares ne porta nia pro a n raport de laûr.

(2) Le sorvisc zivil provinzial volontar aladô dl articul 3, coma 1, lëtra a) y le sorvisc sozial volontar aladô dl articul 3, coma 1, lëtra b), po gnì fać te chisc ćiamps:

1. assistënza sanitara y soziala;
   
2. reintegraziun tla sozieté y intervënć d'emergënza;
   
3. formaziun, sorvisc ala jonëza y promoziun dla cultura;
   
4. sconanza dl ambiënt y di bëgns culturai;
   
5. proteziun zivila;
   
6. sconanza di dërć di consumadus;
   
7. educaziun al svilup tla provinzia de Balsan;
   
8. ativitês dl tëmp lëde y educaziun sportiva.
   

(3) Le sorvisc volontar da d'isté fat da jogn y jones, preodü dal articul 3, coma 1, lëtra c), é limité a chisc ćiamps:

1. assistënza sanitara y soziala;
   
2. educaziun al svilup tla provinzia de Balsan;
   
3. proteziun zivila;
   
4. sconanza dl ambiënt.
   

(4) I sorvisc preodüs dal articul 3, coma 1, tol ite les ativitês de proiet y les ativitês de sostëgn pratiches, orientades a obietifs d'aprendimënt y de conescënza y fates cun le sostëgn de n tutor o na tutor, tl caje di sorvisc preodüs dal articul 3, coma 1, lëtra a) y c).

(5) Le sorvisc vëgn fat tl respet di dërć y dles capazitês di volontars y dles volontares y mët danfora la formaziun y l’aprendimënt de competënzes soziales y profescionales.

(1) I portadus di sorvisc volontars é aladô de chësta lege les organisaziuns y i ënć privać o publics che:

1. n'à nia fins de davagn;
   
2. à fins istituzionai che toca pro un di seturs preodüs dal articul 4, comesc 2 y 3;
   
3. à la capazité organisativa y la poscibilité de adoranza proporzionada ai proieć o ales ativitês preodüdes;
   
4. laôra da altamo trëi agn zënza interuziun;
   
5. à la sënta tla provinzia de Balsan y laôra tla provinzia.
   

(1) Ai volontars y ales volontares ti vëgnel garantì debann les prestaziuns sanitares coliades al sorvisc volontar preodü dal articul 3, coma 1.

(2) Tl respet de ći che é preodü dal coma 9, fej fora la Junta provinziala, cun deliberaziun da publiché tl Boletin Ofizial dla Regiun, la retüda dles spëises al mëis a bëgn di volontars y dles volontares impegnades ti sorvisc preodüs dal articul 3, coma 1. Les spëises é a ćiaria dl fonds provinzial por i sorvisc volontars preodü dal articul 24. Chëstes retüdes dles spëises ne vëgn nia sotmetüdes al paiamënt dla cuta regionala sön l'ativité produtiva (IRAP), tl respet dl dovëi da dè jö eventualmënter la detlaraziun por l'IRAP.

(3) Ai volontars y ales volontares preodüs dal articul 15, coma 2, ne ti spétel degöna retüda dles spëises aladô dl coma 2.

(4) Le sorvisc volontar da d´isté preodü dal articul 3, coma 1, lëtra c), po gnì reconesciü sciöche practicum de scora.

(5) Sce al é dan man les condiziuns, vëgn i volontars y les volontares paiades cun les modalitês preodüdes dai articui 70 y suandënć dl decret legislatif di 10 de setëmber dl 2003, n. 276. 3)

(6) A dötes les volontares y düć i volontars impegnà ti sorvisc preodüs dal articul 3, coma 1, lëtra a), b) y c), ti vëgnel inće fat n’assiguraziun de responsabilité zivila y cuntra inzidënć. I cosć é a ćiaria dles organisaziuns y di ënć pro chi che i volontars y les volontares é en sorvisc. 3)

(7) Les esenziuns o les reduziuns sön i tribuć locai, metüdes sö dala Provinzia, por i volontars y les volontares, sciöche inće por les organisaziuns y i ënć pro chi che al vëgn fat le sorvisc volontar, gnarà stabilides cun d'atres leges provinziales.

(8) D'atres formes de reconescimënt y benefizi gnarà fać fora cun regolamënt d’esecuziun.

[(9) Sce le sorvisc preodü dal articul 3, coma 1, lëtra a), vëgn fat aladô dla lege 6 merz dl 2001, n. 64, ti speta ai volontars y ales volontares l’assëgn por le sorvisc zivil preodü dal articul 9, coma 2, dl decret legislatif di 5 d'aurì dl 2002, n. 77, cun laprò les indenitês eventuales. Al ne ti speta nia la retüda dles spëises preodüda dal coma 2. 4)]

(1) L’aministraziun provinziala arjigna ca n sistem informatif y na banca dać di proieć y dles ativitês proponüdes, por promöie le contat danter i portadus di sorvisc volontars y i volontars y les volontares.

(1) I volontars y les volontares ciafa dal’aministraziun provinziala na tessera de reconescimënt olache al é da odëi le sorvisc volontar, süa dorada y le portadù de referimënt. La tessera é n titul iuridich por ciafè i credić, i benefizi y i reconescimënć preodüs.

(1) La Junta provinziala eserzitëia sön la basa dles desposiziuns preodüdes da chësta lege, les funziuns de regolamentaziun, programaziun y verda sön le sorvisc zivil provinzial. La Junta provinziala se crüzia dantadöt da:

1. fissé les condiziuns por fà le sorvisc;
   
2. fà fora la dorada di intervënć;
   
3. fà fora y mëte a desposiziun les retüdes dles spëises che ti speta ai volontars y ales volontares dl sorvisc zivil;
   
4. regolamentè i dërć y i dovëis di volontars y dles volontares dl sorvisc zivil;
   
5. se cruzié dla programaziun anuala dles ressurses finanziares por i intervënć de volontars y volontares tl sorvisc zivil;
   
6. mëte sö le register provinzial di portadus dl sorvisc zivil volontar preodü dal articul 11, coma 1;
   
7. promöie la formaziun de basa di volontars dl sorvisc zivil y definì tl cheder dla programaziun anuala les materies y i aspeć fondamentai da svilupé te chësc contest;
   
8. ejaminé y aprovè i proieć de sorvisc zivil, sciöche inće ćiarè de chisc;
   
9. coordiné le sistem informatif y istituì la banca dać.
   

(2) Implü eserzitëia la Provinzia tl cheder dl sorvisc zivil nazional preodü dala lege di 6 de merz dl 2001, n. 64, les competënzes che ti é gnüdes delegades.

(1) I portadus dl sorvisc zivil provinzial é les organisaziuns y i ënć publics y privać scrić ite tl register provinzial preodü dal art. 11, coma 1.

(1) Pro la Repartiziun provinziala Presidënza vëgnel metü sö le register provinzial di portadus dl sorvisc zivil volontar.

(2) Por se scrì ite tl register provinzial preodü dal coma 1, mëss les organisaziuns y i ënć ademplì les condiziuns preodüdes dal articul 5, coma 1.

(1) Tl respet dla formaziun de basa, organisada dala Provinzia, mëss i portadus dl sorvisc zivil se cruzié dla formaziun spezifica di volontars y dles volontares; por chësc fin poi s'anuzé dl sostëgn de posć de coordinaziun o formè colaboraziuns danter i portadus.

(2) I portadus dl sorvisc zivil volontar se crüzia inće en colaboraziun cun la Provinzia, dla formaziun y dl ajornamënt dles porsones responsables dl sorvisc zivil tl’organisaziun o tl ënt instës.

(1) La repartiziun provinziala competënta aprovëia i proieć de sorvisc zivil volontar dà jö dai portadus dl sorvisc zivil volontar ti terminns y cun les modalitês dades dant tles bandides.

(2) I volontars y les volontares dl sorvisc zivil volontar mëss avëi dlungia, tl’organisaziun o tl ënt portadù, n tutor o na tutor sciöche inće n responsabl o na responsabla por le sorvisc zivil volontar, che mëss gnì dà dant tl proiet.

(1) Tl cheder dl sorvisc sozial volontar eserzitëia la Junta provinziala sön la basa dles desposiziuns preodüdes da chësta lege les funziuns de regolamentaziun, programaziun, aprovaziun y verda y se crüzia da:

1. fissé les condiziuns por ademplì le sorvisc sozial volontar;
   
2. definì la dorada di intervënć;
   
3. stabilì y mëte a desposiziun la retüda dles spëises che ti speta ai volontars y ales volontares dl sorvisc sozial;
   
4. regolamentè i dërć y i dovëis di volontars y dles volontares dl sorvisc sozial;
   
5. se cruzié dla programaziun anuala dles ressurses finanziares por le sorvisc di volontars y dles volontares dl sorvisc sozial y fà fora i seturs prioritars anuai por le sorvisc di volontars y dles volontares;
   
6. ti assegné i volontars y les volontares dl sorvisc sozial ai portadus preodüs dal art. 16.
   

(1) Le sorvisc sozial volontar po gnì fat da porsones che à:

1. complì 29 agn;
   
2. la residënza stabila tla provinzia de Balsan y la zitadinanza taliana o de n ater Stat mëmber dl’Uniun europeica; 5)
   
3. i recuisić por fà i sorvisc damanà; al ti speta ai portadus preodüs dal articul 16 da verifiché de iade en iade l'idoneité che va debojëgn.
   

(2) Le personal dla Provinzia autonoma de Balsan y di ënć publics che depënn da ëra o che à l'ordinamënt che toma te süa competënza legislativa o delegada, sciöche inće le personal dozënt paié dala Provinzia po inće fà le sorvisc volontar. Chësc sorvisc po gnì fat, sön istanza dl personal, ti dui agn denanco jì en ponsiun por avëi arjunt le limit d´eté preodü dala desposiziun sön la previdënza. Te chësc caje ne vara nia da proroghè le sorvisc do avëi arjunt le limit d'eté por jì en ponsiun. Les modalitês, les condiziuns y i dovëis vëgn determinà, tl cheder dles competënzes che alda laprò, da chësta regolamentaziun y dales desposiziuns provinziales sön le personal.

(3) Por le personal preodü dal coma 2 vëgnel fissé n contingënt anual tl program preodü dal articul 14, coma 1, lëtra e).

(1) Le sorvisc sozial volontar po gnì fat pro organisaziuns y ënć de dërt privat y publich che à les condiziuns preodüdes dal art. 5, coma 1.

(2) Les organisaziuns y i ënć pîta, tl cheder de süa ativité y aladô de sü bojëgns y de sües ressurses, intervënć de dorada desvalia ti seturs preodüs dal articul 4, coma 2, por chi che al po se candidé les porsones preodüdes dal articul 15.

(3) Les organisaziuns y i ënć stlüj jö cun i volontars y les volontares dl sorvisc sozial na convenziun che regolamentëia sü dërć y dovëis.

(1) La dorada mascimala dl sorvisc di volontars o dles volontares pro organisaziuns y ënć dl sorvisc sozial ne po nia ester majera co 32 mëisc.

(2) Ti seturs preodüs dal articul 4, coma 2, lëtra a), vara da laurè ćiamò un n iade pro n’atra organisaziun o n ater ënt adatè tl limit mascimal preodü dal coma 1.

(3) Sce le sorvisc vëgn fat tles aziëndes publiches di sorvisc por la porsona o tles ćiases de palsa y de cura, ne vëgnel nia apliché i limić de tëmp preodüs dai comesc 1 y 2.

(1) I portadus dl sorvisc sozial volontar po ti dè jö ala repartiziun provinziala competënta la domanda d’adoranza de n volontar adatè o na volontara adatada por le sorvisc proponü, sce al é les condiziuns preodüs dal art. 15.

(2) Le finanziamënt vëgn fat sön la basa dla programaziun dles ressurses finanziares aladô dl articul 14, coma 1, lëtra e), sciöche inće di criters por l’assegnaziun di volontars y dles volontares dl sorvisc sozial.

(1) Le sorvisc volontar da d'isté po gnì fat aladô de chësta lege da jogn y jones dai 15 ai 19 agn, che frecuentëia tla provinzia de Balsan na scora mesana, na scora alta o na scora profescionala de vigni sort y forma iuridica.

(1) Les scores altes y les scores profescionales informëia sü studënć y sües studëntes sön i sorvisc da d'isté pità dai portadus preodüs dal art. 21, che ti dà jö ales scores süa oferta dles ativitês da d'isté ćina ai 30 d'aurì de vigni ann.

(2) L’oferta mëss contignì na descriziun avisa dl ćiamp d’adoranza y dles ativitês coliades al sorvisc da d'isté.

(3) I jogn y les jones ne ciafa nia ma informaziuns sön les ativitês proponüdes dai portadus tles scores mo inće sön la plata internet aposta dla Provinzia.

(4) I studënć y les studëntes ti dà jö diretamënter ai portadus süa domanda por gnì tuć sö tl ćiamp chirì fora.

(1) I portadus dl sorvisc volontar da d'isté é les organisaziuns y i ënć privać y publics che à les condiziuns preodüdes dal art. 5, coma 1, che lascia alsavëi vigni ann ti terminns preodüs dal articul 20, coma 1, süa desponibilité da tó sö jogn y jones tratan l'isté y che informëia l'ofize provinzial competënt y les scores altes y profescionales sön i posć desponibli y i ćiamps d’adoranza.

(2) Ai portadus ti spétel da coordiné, sostignì y arjigné ca tecnicamënter i jogn y les jones por so sorvisc. Ai jogn y ales jones ti vëgnel metü a desposiziun n tutor o na tutor che i/les dëida tratan so tëmp de sorvisc.

(3) I portadus stlüj jö cun vigni jonn y jona na convenziun che regolamentëia sü dërć y sü dovëis.

(4) Pro i sorvisc ti ćiamps d'adoranza él da respetè dantadöt i dërć di jogn y dles jones y da tignì cunt naôta de so bëgn y dl renforzamënt de sües competënzes.

(1) Do avëi stlüt jö le sorvisc volontar ti vëgnel retü ai jogn y ales jones les spëises; la soma vëgn fata fora dala Junta provinziala aladô dl art. 6, coma 2.

(2) La soma ti vëgn paiada fora ai jogn y ales jones dal portadù, che la ciafa zoruch dala Provinzia.

(1) Tl cheder dl volontariat da d'isté por i jogn y les jones eserzitëia la Junta provinziala les funziuns de programaziun, aprovaziun y verda. Por chësc fin fêjera fora:

1. de tan che la retüda dles spëises, che i jogn y les jones ciafa do avëi stlüt jö le sorvisc, é;
   
2. le numer mascimal di posć che po gnì aprovà vigni ann por le sorvisc volontar da d'isté;
   
3. les condiziuns dl sorvisc di jogn y dles jones.
   

(1) La Provinzia mët sö le fonds provinzial por i sorvisc volontars olache al röia adöm les ressurses destinades al sorvisc zivil provinzial volontar, al sorvisc sozial volontar y al sorvisc volontar da d'isté.

(1) Cun regolamënt d’esecuziun vëgnel regolamentè:

1. i criters por l’aprovaziun dles domandes d'assegnaziun di volontars y dles volontares dl sorvisc sozial;
   
2. i dërć y i dovëis di volontars y dles volontares dl sorvisc sozial;
   
3. les formes de reconescimënt y i benefizi por i volontars y les volontares dl sorvisc sozial;
   
4. la regolamentaziun di sorvisc volontars da d'isté por i jogn y les jones, dantadöt i dovëis y i dërć di portadus, sciöche inće di jogn y dles jones;
   
5. i benefizi, sciöche inće le reconescimënt dl sorvisc volontar da d'isté;
   
6. les modalitês por l’iscriziun tl register provinzial preodü dal art. 11, coma 1;
   
7. i criters por l’aprovaziun di proieć dl sorvisc zivil volontar;
   
8. i benefizi implü preodüs por i volontars y les volontares dl sorvisc zivil;
   
9. les modalitês por ćiarè sura y controlè i sorvisc volontars, sciöche inće les convenziuns preodüdes da chësta lege;
   
10. les ispeziuns y les sanziuns sce al ne vëgn nia tignì ite les desposiziuns de chësta lege.
    

(1) La lege provinziala di 19 de otober dl 2004, n. 7, y mudaziuns suandëntes, vëgn abrogada.