(1) Sce n’abitaziun costruida, cumprada o recuperada cun les alisiraziuns dl frabiché preodüdes da chësta lege é manaciada dala venüda sforzada, po le patrun gnì autorisé, por tignì fora la venüda sforzada, da dè jö l’abitaziun al’IPFS. L’autorisaziun da pert dl diretur dla Repartiziun provinziala Frabiché abitatif po gnì conzedüda en conscidraziun dla gauja dl indebitamënt y dles condiziuns economiches, soziales y familiares dl damanant.
(2) Le prisc de cumpra che l’IPFS po paié ti corespogn al valur convenzional dl’abitaziun, determiné aladô dl articul 7. Sce l’abitaziun vëgn dada adinfit al comerziant aladô dl coma 3, vëgn le prisc de cumpra smendrì dl 20 por cënt. Le comerziant mëss consintì che le prisc de cumpra vëgnes adorè dantadöt por le paiamënt di debić.
(3) L’IPFS ti dà adinfit al patrun da denant l’abitaziun cumprada o n’atra abitaziun adatada al bojëgn de süa familia, sce al à i recuisić generai por l’assegnaziun de abitaziuns y sce al arjunj altamo 20 punć aladô dl regolamënt d‘esecuziun. Le patrun da denant devënta a düć i efeć afitadin de n’abitaziun dl’IPFS.
(4) Sce n’abitaziun cumprada dal IPFS aladô de chësc articul vëgn metüda ite te n plann de venüda aladô dl articul 124, ne n’é le patrun da denant nia autorisé da cumprè por n tëmp de 20 agn y al vëgn apliché ći che é desponü dal articul 124, coma 3.35)