(1) Chi che à ciafè en assegnaziun n’abitaziun en afit po damanè ch’al ti vëgnes assegné n’atra abitaziun plü adeguada al bojëgn de süa familia. Chi che ciafa n’abitaziun adinfit mëss dal’atra pert dè derevers le cuartier olach’al à abité ćina a chël momënt, lëde da porsones y cosses, anter le terminn stabilì por l’ocupaziun dl’abitaziun nöia. L’assegnaziun de n’abitaziun sciöche barat sön n’atra vëgn fata cun decret dl Presidënt dl IPFS.
(2) L’IPFS mët adöm na lista de afitadins che ocupëia abitaziuns olache le numer di locai, zënza cumpedè i locai secundars, va sura le numer di componënć dla familia, tan inant che la spersa abitativa ütla sides plü grana co 50 metri cuadrać por öna na porsona y de d’atri 15 metri cuadrać por vigni atra porsona.
(2/bis) Por sostignì l’integraziun di imigranć vëgn les abitaziuns assegnades inće desvian da ći é preodü dal coma 2, a na moda che la perzentuala di imigranć ne sides te degun frabicat dl IPFS de regola majera co le 10 por cënt di assegnatars. Sce n frabicat à manco co diesc cuartiers, po un n cuartier gnì metü a desposiziun de imigranć.173)
(3) Sce l’ocupaziun de n’abitaziun cun n numer de locai, zënza cumpedè i locai secundars, che va sura le numer di componënć dla familia döra por plü de n ann, po le Presidënt dl IPFS do avëi aldì la Comisciun por l’assegnaziun, revochè l’assegnaziun dl’abitaziun y ti assegné al afitadin tl medemo momënt n’atra abitaziun adatada al bojëgn dla familia. Te n te’ caje va i cosć dl trasferimënt a ćiaria dl IPFS y vëgn curis cun ći che vëgn trat ite dai afić.
(4) Por slisiré le barat d’abitaziun ales porsones plü atempades po l’IPFS resservè na pert dles abitaziuns frabicades danü al barat de cuartiers aladô dl coma 1.174)
L'art. 104, coma 2/bis, é gnü metü pormez dal art. 1, coma 27, dla L.P. di 13 d’otober dl 2008, n. 9, y daldô sostituì insciö dal art. 1, coma 30, dla L.P. di 22 de jenà dl 2010, n. 1.
Le coma 4 é gnü ajuntè dal art. 33 dla L.P. di 10 d’agost dl 2001, n. 8.