b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) Por ch’al ti vëgnes assegné ai damananć abitaziuns dl frabiché sozial en afit aladô dl articul 94, coma 1, mëss i damananć ademplì chëstes condiziuns:

1. avëi la residënza o le post de laûr da almanco 5 agn tla provinzia y da almanco dui agn tl comun olach’al é les abitaziuns;
2. nia ester titolars dla rajun de proprieté, dl dërt de nüz, d’adoranza o d’abitaziun de n’abitaziun adatada al bojëgn dla familia y gnanca avëi zedü ti ultimi cin agn dan la presentaziun dla domanda n te’ dërt; le medemo vel por la fomena o l’om nia despartì;
3. nia fà pert de na familia lasciada pro a n contribut publich por fà sö, cumprè o recuperè n’abitaziun adeguada al bojëgn dla familia, ater co sc’al vëgn metü sö na familia nöia;
4. nia jì sura le “valur dla situaziun economica” (VSE) de 2,33 fora;157)
5. al ne po nia ester gnü desponü te sü confrunć la revocaziun dl’assegnaziun de n’abitaziun ti ultimi cin agn, ater co por les revocaziuns d’assegnaziun de abitaziuns desponüdes aladô dl articul 22, coma 5;
6. al ne po nia ester gnü desponü te sü confrunć da pert dl IPFS ti ultimi cin agn le sfrat por intardiada;
7. al ne po nia ester te sü confrunć la gauja d’estlujiun aladô dl articul 46, coma 2.158)
8. al ne po nia ester assegnatar de n’abitaziun IPFS adatada, ater co sce ara nen va dla domanda de mudé abitaziun aladô dl articul 104.159)
   

(1/bis) Por calcolè la dorada minima dla residënza tla provinzia aladô dl coma 1, lëtra a) vëgnel conscidré la residënza storica preodüda dal art. 45.160)

(1/ter) Ćina che i damananć n’à nia arjunt la dorada minima dla residënza o dl post de laûr preodüda tl coma 1, lëtra a) por l’assegnaziun de n’abitaziun, poi damanè ch’al ti vëgnes assegné n’abitaziun adinfit tl comun de provegnënza.161)

(2) Sce les abitaziuns sön chëres che le damanant, o süa fomena o so om nia legalmënter despartì à i dërć aladô dl coma 1, lëtra b), é fora dla provinzia vëgn le damanant ma stlüt fora dal’assegnaziun de abitaziuns en afit sce la valur convenzional de chëstes abitaziuns, sön la basa dles desposiziuns regionales respetives, corespogn al valur convenzional de n’abitaziun adeguada ala familia dl damanant sön la basa dles desposiziuns de leges dla provinzia.

(3) Les gaujes d’estlujiun aladô dl coma 1, lëtres b) y c), ne vëgn nia aplicades ti caji aladô di articui 29 y 39.

(4) Sce le damanant é proprietar de n’abitaziun nia adeguada te n comun dla provinzia o à le dërt de nüz de na te’ abitaziun, pol ciafè en assegnaziun n’abitaziun en afit ma sc’al ti pîta süa abitaziun en afit al IPFS.162)

(5) Por l’aplicaziun di comesc 1, 2 y 3 vel por le conzet de familia l’articul 44.

(6) Por le conzet d’abitaziun adeguada vel l’articul 43, coma 1.

(7) Por calcolè le davagn complessif dla familia vel l’articul 58. Pro la calcolaziun dl davagn complessif dla familia vëgnel inće cumpedè le davagn dla porsona che convir “more uxorio” cun la porsona che fej domanda.

(8) Tan bëgn le damanant co i comëmbri de süa familia mëss avëi les condiziuns por l’assegnaziun de abitaziuns en afit dal momënt dla presentaziun dla domanda ćina al momënt dl’assegnaziun dl’abitaziun en afit.

(9) Desvian da ći che é preodü dal coma 1, lëtra a) po les porsones emigrades foradecà bele residëntes dan l’emigraziun por almanco cin agn tla provinzia y che s’impegnëia a mëte indô süa residënza tla provinzia, presentè domanda d’assegnaziun de n’abitaziun te chël comun olach’ai â süa ultima residënza o olach’al é desmostrè ch’ai po eserzité süa profesciun o so laûr.

(10) Sce tl capolüch dla provinzia o tles localitês zentrales stabilides tl plann provinzial de svilup y de coordinamënt dl raiun él preodü programs abitatifs straordinars, po la Junta provinziala desponn, desvian dala desposiziun aladô dl coma 1, lëtra a), che inće i damananć che à la residënza o le post de laûr te n comun dl raiun d’integraziun po fà domanda d’assegnaziun de chës abitaziuns.

(11)163)