(1) Per la Provinzia de Bulsan vëniel metù sù, spartìi per cariera, rodui dl personal zevil dl’aministrazions stateles che à ufizies tla Provinzia. Chisc rodui vën determinei aldò di organics dl personal di ufizies nstësc, coche stabilìi – sce de bujën – cun despusizions aposta.
(2) L coma da dant ne vën nia aplicà per la carieres diretives dl’aministrazion zevila dl ntern, per l personal dla segurëza publica y per chël aministratif dl Ministere dla Defendura.
(3) La stieres di rodui, nunziedes al prim coma, tëutes n cunscidrazion aldò dl’aministrazion y dla cariera, ie resservedes ai zitadins de uniuna dla trëi grupes linguistiches, n relazion ala cunsistënza dla grupes nstësses, coche la resultea dala detlarazions de purtenienza fates tla cumpededa ufiziela dla populazion.
(4) L’atribuzion dla stieres resservedes ai zitadins de rujeneda tudëscia y ladina unirà fata var per var, nchin che la cuotes nunziedes tl coma da dant unirà arjontes, tres la nueva assunzions te chëla stieres che per uni sort de rejon unirà liedies ti singuli rodui.
(5) Al personal di rodui, nunzià tl prim coma, ie garantida la stabilità de sënta tla Provinzia, ora che a chëi che toca pra aministrazions o carieres, per chëles che l ie de bujën de trasferimënc per rejons de servisc y per la furmazion dl personal.
(6) I trasferimënc dl personal de rujeneda tudëscia ne sarà a uni moda nia de plu che l 10% dla stieres che l personal ocupea de ndut.
(7) La despusizions sun la resservazion y la partizion pruporzionela danter la grupes linguistiches taliana y tudëscia dla stieres che ie tla Provinzia de Bulsan vel nce per l personal de sunieria giudichënta y nfruscienta. L ti vën garantì la stabiltà de sënta tla Provinzia nstëssa ai magistrac dla grupa linguistica tudëscia, lascian mpe la normes dl urdinamënt giudizier sun la cumpatibltà. Al personal dla sunieria tla Provinzia de Bulsan vëniel nce aplicà i criteres per l’atribuzion dla stieres resservedes ai zitadins de rujeneda tudëscia, stabilìi tl coma 4 de chësc articul.