(1) L’ativité profescionala de lavanderia é l’ativité de n’impresa che se crüzia da lavé, dla netijia chimica a sech y a mol, da intënje, da tó demez les maces, da sferié fora, da folé y tratamënc anfat, de guanc y azessurs, de coran y coran sintetich, de pelicia naturala y sintetica, de blanciaria y pezes por la ciasa por n'adoranza industriala, comerziala o sanitara, de tapec, tapezeria y revestimënc por l'aredamënt y de ogec d’adoranza, sciöche ince articui de peza y produc de de vigni sort de fira.
(2) Le titolar dl'impresa, la maioranza di comëmbri tl caje de na sozieté cun inom coletif, la maioranza di comëmbri comandatars tl caje de na sozieté comandatara scëmpla, la maioranza di aministradus tl caje de na sozieté cun responsabilité limitada, la maioranza di aministradus tl caje de consorc y cooperatives - pro dui comëmbri respetivamënter comandatars o aministradus altamo un - mëss gní indiché sciöche responsabl tecnich tl Register dl comerz y avëi altamo un de chisc recuisic profescionai:
- frecuënza de cursc de cualificaziun tecnich-profescionala dla dorada de altamo 250 ores indöt da fá tl tëmp de n ann; 47)
- atestat de cualificaziun che reverda l’ativité, arjunt aladô dla legislaziun varënta en materia de formaziun profescionala, cun lapró n tëmp de inserimënt dla dorada de altamo n ann pro les impreses dl setur, da fá tl tëmp de trëi agn dal arjunjimënt dl atestat;
- diplom de maturité tecnica o profescionala o de livel post-secundar alt o universitar, te materies che reverda l’ativité;
- tëmp de inserimënt pro impreses dl setur de altamo:
- un n ann do avëi stlüt jö le lernat dla dorada preodüda dal contrat coletif;
- dui agn sciöche titolar, soze che laora para o colaboradú familiar che laora para;
- trëi agn, ince nia indolater mo a vigni moda tl tëmp de cin agn, ti caji d'ativité de laur subordinada;
- posses di recuisic aladô dl articul 6-bis dla lege provinziala di 12 de novëmber dl 1992, n. 40, y mudaziuns suandëntes, y dles desposiziuns d’atuaziun che alda lapró.
(3) Le tëmp de inserimënt preodü dales lëtres b) y d) dl coma 2 fej fora le desfiramënt de n’ativité de laur cualificada tresfora pro impreses abilitades dl setur.
(4) Les ativités profescionales de lavandaria ne pó nia gní eserzitades te na forma ambulanta o te plazes da parché.
(5) I recuisic profescionai vëgn azertá canche al vëgn ejaminé la domanda d’iscriziun dl'impresa tl Register dl comerz. 46)
La lëtra a) dl art. 41/bis, coma 2 é gnüda sostituida insciö dal art. 33, coma 5 dla l.p. di 24 de setëmber dl 2019, n. 8;
La Pert VI cun i artt. 41/bis, 41/ter y 41/quater é gnüda ajuntada dal art. 62, coma 4 dla l.p. di 11 de messé dl 2018, n. 10.