(1) La lista dles ativitês artejanales vëgn aprovada dala Junta provinziala; ara surantol la lista tignida dala Ćiamena dl comerz canche chësta lege va en forza.
(2) Les ativitês nöies che vëgn aratades da scrì ite vëgn portades ite tla lista preodüda dal coma 1; tl medemo tëmp vëgnel scrit ite la impresa artejanala tl Register dl comerz. Inće les organisaziuns profescionales plü rapresentatives dla provinzia y la Repartiziun provinziala Artejanat, Industria y Comerz po ti damanè ala Ćiamena dl comerz de registré ativitês nöies. Tl tëmp de 10 dis ti comunichëia la Ćiamena dl comerz la registraziun de na ativité nöia ala Repartiziun provinziala Artejanat, Industria y Comerz y ales organisaziuns profescionales plü rapresentatives dla provinzia.
(3) Les organisaziuns preodüdes dal coma 2, sciöche inće les impreses interessades po fà recurs pro la Junta provinziala cuntra le provedimënt de registraziun o de nia-registraziun de na ativité artejanala nöia tla lista preodüda dal coma 1, tl tëmp de 30 dis da canche ares à ciafè la comunicaziun. Tl medemo tëmp po la Repartiziun provinziala Artejanat, Industria y Comerz presentè na proposta de refodanza, de mudaziun o de registraziun.
(4) La Ćiamena dl comerz controlëia vigni cin agn, do avëi aldì la Repartiziun provinziala Artejanat, Industria y Comerz y les organisaziuns profescionales plü rapresentatives dla provinzia, la lista preodüda dal coma 1 por verifiché sce les carateristiches dles ativitês y di seturs scrić ite ti corespogn ales denominaziuns atuales.
(5) La Junta provinziala aprovëia la lista ajornada.