i) Lege Provinziala di 26 de mà dl 2006, n. 41)2)
Gestion dl refudam y defendura dl terac

• 1. Chësta lista ie na lista armoniseda de refudam, che unirà revijiuneda regulermënter sun la basa dla cunescënzes nueves y particulermënter de chëles pruvenientes dai resultac nueves dla nrescides, y sce n cajo mudeda aldò dl articul 18 dla diretiva 75/442/CEE. La tëuta n cunscidrazion de n material determinà tla lista ne uel nia dì che chësc material ie na sort de refudam te uni zircustanza. La tlassificazion dl material coche refudam vën mé aplicheda sce l material curespuend ala definizion aldò dl articul 1, pustom a) dla diretiva 75/442/CEE.
• 2. Al refudam nunzià tla lista vëniel aplicà la despusizions nunziedes tla diretiva 75/442/CEE, a cundizion che l ne vënie nia aplicà l articul 2, paragraf 1, pustom b) dla medema diretiva (anutazion: la reverda l' ezezions che ne ie nia stlutes ite tla normativa sun l refudam, coche per ejëmpl l refudam radioatif, l’eghes de desćëria y nsci inant).
• 3. La sortes defrëntes de refudam nunziedes tla lista ie definedes spezificamënter tres n codesc de sies zifres per uni sort defrënta de refudam y i codesc defrënc curespundënc de cater y doi zifres per i capituli curespundënc. Perviadechël iel de bujën per identifiché na sort de refudam de jì inant nsci:
  • 3.1. Identifiché la funtana che generea l refudam cunsultan i tituli di capituli da 01 a 12 o da 17 a 20 per abiné ora l codesc de sies zifres n referimënt ala sort de refudam n cuestion, ora che i codesc di capituli tlo dessëura nunziei che fina via cun la zifres 99. L ie puscibl che n cër mplant o stabilimënt muesse tlassifiché si ativiteies fajan referimënt a capituli defrënc. N fabricant de auti possa per ejëmpl abiné l refudam che l produj sibe tl capitul 12 (refudam dala laurazion y dal tratamënt superfiziel de mitei), che nce tl capitul 11 (refudam inorganich che cuntën mitei pruvenienc dal tratamënt y dala curidura de mitei), o nce tl capitul 08 (refudam dal’ adurvanza de revestimënc), n funzion dla fases defrëntes dla produzion. Anutazion: l refudam de mpacamënt che vën abinà adum te na maniera deferenzieda (nce cumbinazions defrëntes de materiai de mpacamënt) ie da tlassifiché sota 15 01, y nia sota 20 01.
  • 3.2. Sce degun di codesc di capituli da 01 a 12 o da 17 a 20 va bën per la tlassificazion de na cërta sort de refudam, iel de bujën de ejaminé i capituli 13, 14 y 15 per identifiché l drë’ codesc.
  • 3.3. Sce degun de chisc codesc resultea adatà, iel de bujën definé l refudam se nuzan di codesc nunziei tl capitul 16.
  • 3.4. Sce l refudam ne fossa da tlassifiché nianca cun i codesc dl capitul 16, pona iel de bujën de se nuzé dl codesc 99 (refudam nia spezificà autramënter), cun danora la zifres dl capitul che curespuend al' atività identificheda pra l pont 1.
• 4. L refudam contrasenià tla lista cun n asterisch "*" ie refudam periculëus aldò dla diretiva 91/689/CEE sun l refudam periculëus y a chësc refudam vëniel nce aplicà la despusizions de chësta diretiva, a cundizion che l ne vën nia aplicà l articul 1, paragraf 5.
• 5. N rata che l refudam tlassificà coche periculëus ebe una o de plu carateristiches dates sëura tla njonta III dla diretiva 91/689/CEE y, n referimënt ai codesc da H3 a H8 y ai codesc H10 y H11 (1) dla medema njonta, una o de plu de chësta carateristiches:
  pont de nflamabltà <= 55°C,
  una o de plu sustanzes tlassifichedes (2) dassënn da tuesse te na cunzentrazion de ndut >=0,1%
  una o de plu sustanzes tlassifichedes da tuesse te na cunzentrazion de ndut >=3%,
  una o de plu sustanzes tlassifichedes de dann per la sanità te na cunzentrazion de ndut >=25%,
  una o de plu sustanzes smagëntes tlassifichedes coche R35 te na cunzentrazion de de ndut >=1%,
  una o de plu sustanzes smagëntes tlassifichedes coche R34 te na cunzentrazion de ndut >=5%,
  una o de plu sustanzes iritëntes tlassifichedes coche R41 te na cunzentrazion de ndut >=10%,
  una o de plu sustanzes iritëntes tlassifichedes coche R36, R37, R38 te na cunzentrazion de ndut >=20%,
  na sustanza recunesciuda coche gaujënta tumores (categoria 1 0 2) te na cunzentrazion de >=0,1%
  na sustanza recunesciuda coche gaujënta tumores (categoria 3) te na cunzentrazion de >=1%,
  na sustanza recunesciuda da tuesse per l cërtl de reproduzion (categoria 1 o 2) tlassificheda coche R60 o R61 te na cunzentrazion de >=0,5%
  na sustanza recunesciuda da tuesse per l cërtl de reproduzion (categoria 3) tlassificheda coche R62 o R63 te na cunzentrazion de >=5%
  na sustanza che muda i gens dla categoria 1 o 2 tlassificheda coche R46 te na cunzentrazion de >=0,1%
  na sustanza che muda i gens dla categoria 3 tlassificheda coche R40 te na cunzentrazion >=1%.
• 6. Ai fins de chësta dezijion ntënden cun "sustanza periculëusa" uni sustanza che vën o unirà tlassificheda coche periculëusa aldò dla diretiva 67/548/CEE y mudazions suzessives; cun "mitel pesoch" ntënden uni sort de cumpost de antimon, arsenn, cadmium, crom (VI) ram, plom, mercur, nichel, selen, telur, talium, stani, ënghe canche chisc mitei vën dant te formes miteliches tlassifichedes periculëuses.
• 7. Sce na sort de refudam vën identificheda coche periculëusa tres n referimënt spezifich o generich a sustanzes periculëuses, iela mé tlassificheda periculëusa sce la sustanzes arjonj cërta cunzentrazions (per ejëmpl tla perzentuela dl pëis), a na moda da ti dé ala sort dl refudam n cuestion una o de plu dla proprieteies nunziedes tla njonta III dla diretiva 91/689/CEE dl Cunsëi. Per la carateristiches da H1, H2; H9, H12, H13 y H14 ne vëij l articul 2 de chësta lege al mumënt nia danora vel’ spezificazion.
• 8. Coche detlarà te una dla cunscidrazions dla diretiva 99/45/CE muessen recunëscer che la carateristiches dla liadures ie nsci che l ne ie nia puscibl determiné avisa si proprieteies tres la metodes cunvenziuneles atualmënter da garat: la despusizions aldò dl articul 2 ne vën perchël nia aplichedes per la liadures de mitei nëc (uel dì nia cuntaminei da sustanzes periculëuses). Chësc vel nchin che l ie da garat i resultac de de plu ativietes che la Cumiscion y i Stac cumëmbri se à mpenià a nvië via per studië na maniera spezifica de tlassificazion dla liadures. L refudam spezificatamënter nunzià te chësta lista vën inant spezificà coche dat sëura tla lista.
• 9. Per la numerazion dla ujes cuntenides tla lista vëniel aplicà chësta regules: per l refudam, pra chël che l ne se à mudà nia iel unì adurvà i numeri spezifichei tla dezijion 94/3/CE dla Cumiscion, ntan che i codesc dl refudam che à abù mudazions ie unic cancelei y ne vën nia adurvei per schivé cunfujions do che la lista nueva vën tëuta n droa. Al refudam che ie unì njuntà ti iel unì atribuì n codesc mo nia adurvà no tla dezijion dla Cumiscion 94/CE, no tla dezijion dla Cumiscion 2000/532/CE.

-----------

(1) L' esprescion "sustanza da tuesse per l cërtl de reproduzion" ie unida purteda ite cun la diretiva 92/32/CEE sun la setima mudazion dla diretiva 67/548/EWG. L term "teratogena" ie unì remplazà dal' esprescion "sustanza da tuesse per l cërtl reprodutif", pervia che la ie plu adateda, ajache la dà na definizion plu prezisa, zënza mudé l senificat de basa. La esprescion curespuend nsci al codesc H 10 dla njonta III dla diretiva 91/689/CEE.

(2) La tlassificazion y i numeri R ie basei sun la diretiva 67/548/CEE di 27 de juni 1967 revardënta l adatamënt dla despusizions legislatives regulamenteres y aministratives sun la tlassificazion, l mpacamënt y la etichetatura dla sustanzes periculëuses, y si mudazions suzessives. I lims de cunzentrazion ie chëi che ie unic fissei tla diretiva 88/79/CEE dl 7 de juni 1988 per l adatamënt dla despusizions legislatives regulamenteres y aministratives di Stac cumëmbri n cont dla tlassificazion, dl mpacamënt y dla etichetatura di preparac periculëusc, y si mudazions suzessives.