(1) I cuntribuc vën cunzedui a emitëntes radiotelevisives locales y a portai de nfurmazion online locai che realisea, lascia realisé o che trasmët ënghe mé cuntenuc da pudëi sustenì. Nia tlo leprò ne ie la emitëntes y i portai che:
- pervia di cuntenuc devulghei da d’ëi ie da raté reprejentanc de grupes de nteres coche partic politics, urganisazions prufesciuneles, sindacheles o religëuses o che ne curespuend nia ala linia di prinzips y di fins dl articul 1;
- ne respetea nia la normes sun la defendura di dërc dla infanzia y dl’adolescënza;
- ne à nia respetà la normes de basa dla legislazion n forza ti ciamps dl lëur, dla chëutes y di mesuns de nfurmazion, dantaldut la normes dl Test unich per la furnidura de servijes di media audiovisives nunziei tl decret legislatif di 8 de nuvëmber 2021, n. 208;
- à pruzedures de cuncordat preventif o de falimënt pendëntes;
- devulghea plu che l ie preudù cun delibrazion dla Jonta provinziela coche nunzià pra l coma 3, cuntenuc liei al cumerz eletronich, ala televendudes, ala urganisazion de juesc cun pesć, a sponsorisazions y ativiteies promoziuneles o a ativiteies cumerzieles semientes;
- ne ie nia scric ite tl Register di operadëures de comunicazion ROC.
(2) La cunzescion o la negazion dl cuntribut vën urdenedes dal diretëur/dala diretëura dla repartizion provinziela cumpetënta tl ciamp de Servijes, do avëi audì nce la Cumiscion.
(3) La Jonta provinziela dà dant cun delibrazion, che ie da publiché tl Buletin Ufiziel dla Region, i criteres y la manieres de cunzescion di cuntribuc, tenian cont de chisc aspec:
- per la emitëntes radiotelevisives: i indesc de audida sun l teritore provinziel, determinei sun la basa di relevamënc che l Istitut provinziel de statistica fej periodicamënter y do avëi audì l’assoziazion de categoria plu reprejentativa dla emitëntes;
- per i portai de nfurmazion online: i azesc o d’autri indicatores ogetifs per determiné l numer de azesc sun l teritore provinziel;
- cosć de produzion y de defujion di cuntenuc da pudëi sustenì;
- per la emitëntes radiofoniches, la cuota de “mujiga produjeda tl Südtirol”.
(4) Tla deliberazion nunzieda tl coma 3 vëniel determinà i cosć lascei pro a cuntribut y stabilì duc i autri criteres ogetifs y sogetifs, per azeder al sustëni per l calcul curespundënt y la licuidazion curespundënta, cun la puscibltà de definì na defrenziazion di sustenimënc n basa ala sort di mesuns de nfurmazion y de preudëi nce cuntribuc de basa minims.
(5) La Provinzia autonoma de Bulsan recunësc la mpurtanza zentrela dla descuscion publica per la furmazion dla minonga aldò di prinzips dla democrazia. Cun i cuntribuc cunzedui aldò de chësta lege ne possel nia unì finanzià portai ti forums online de chëi che l vën publicà cumentares dai cuntenuc de relevanza penala, che ufënd o che descriminea. Per purté pro a miuré l livel de descuscion vën i cuntribuc mé cunzedui ai portai de nfurmazion online che per la partezipazion ai forum ti dà dant ai utënc/ala utëntes de crië n account persunel, nia trasferibl, segurà da password y autenticà coche nce de dé n si numer de fonin, che ti comunichea ala Cumiscion l inuem de na persona respunsabla di forum y che atuea la moderazion redaziunela sibe ti forum sibe te si sic soziei. La Jonta provinziela determinea, do avëi audì la Cumiscion, i criteres y la manieres dla cunzescion di cuntribuc. 27)
L art. 10 ie n iede unì baratà ora dal art. 7, coma 1, dla L.P. di 29 de setëmber 2015, n. 13, y dadedò dal art. 8, coma 1, dla L.P. di 30 de mei 2022, n. 4.