j) Lege provinziala di 16 de merz dl 2018, n. 41)
Parch naziunel dl Stelvio

(1)  Chësta lege dà esecuzion al'acurdanza arjonta ai 11 de fauré 2015 danter l Ministere dl ambient y dla defendura dl teritore y dl mer, la Region Lombardia y la Provinzies autonomes de Trënt y Bulsan, che à coche oget l'atribuzion de funzions stateles y dla cëries finanzieres relatives n referimënt al Parch naziunel dl Stelvio coche nce al articul 3 dl decret dl Presidënt dla Republica di 22 de merz 1974, n. 279 (Normes d’ atuazion dl statut speziel per la region Trentin-Südtirol tla materia de proprieteies de cultivazion menudes, ciacia y pëscia, agricultura y bosc), y mudazions suzessives, y la regulea tl cheder dla cumpetënza legislativa primera preududa tl Statut d'autonomia, per la pert dl teritore de cumpetënza provinziela, la gestion, la urganisazion y l funzionamënt dl Parch naziunel dl Stelvio, da tlo inant denuminà "Parch naziunel", coche nce la pruzedures de furmazion y apurvazion dl plann y dl regulamënt dl Parch naziunel.

(2)  La disciplina preududa vën aplicheda n armunia cun i fins y i prinzips dl urdinamënt statel tla materia de sperses defendudes, dla disciplina dla Union europeica relativa ala rë ecologica Natura 2000, dla Cunvenzion per la prutezion dl'Elpes, de si protocoi y de d'autra ublianzes de dërt internaziunel generel y d'acurdanzes internaziuneles.

(1)  Tla gestion dla pert sudtiroleja dl Parch naziunel mira la Provinzia a chisc fins:

1. defënder y cunservé la spezies de tieres y vegeteles, l'assoziazions de plantes y la furmazions de bosc, la biodefrënzia, la integrità di ecosistems y de si dinamica naturela, coche nce i elemënc reprejentatifs per si mpurtanza naturalistica, geologica y geomorfologica, paleontologica, paesajistica, ecologica y genetica.
   
2. mantenì y defënder i balanc idraulics y geoidraulics;
   
3. sustenì la nrescida scientifica y l relevamënt ambientel finalisei a na miëura cunescënza di ambienc naturei y antropisei dl Parch naziunel, nce coche basa per na gestion ecocumpatibla dla ressurses natureles y per la cunservazion o la represtinazion dla biodefrënzia coche nce la derturazion ambientela y dl paesaje;
   
4. sustenì scumenciadives de furmazion y d'educazion ambientela nce interdisciplineres, finalisedes al svilup dla cunescënzes y a sensibilisé ai bujëns dl respet y dla defendura dla natura, coche nce dl respet dl patrimone naturel y culturel;
   
5. cunservé la interazion armonica danter natura y cultura tres na planificazion dl paesaje y dl teritore che tënie cont dla formes de svilup sustenibl, sustenian l'agricultura da mont y l'autra economies cumpatibles;
   
6. sustenì l svilup de na fruizion recriativa y turistich-soziela cumpatibla cun i fins prioriteres de defendura dl Parch naziunel nstës;
   
7. sustenì l'atività da paur y di bosc per seguré l mantenimënt dla vita y l svilup economich dla populazion residënta y per cuntrasté l despopulamënt di raions rurai.
   

(1)  L vën cialà de arjonjer i fins nunziei tl articul 2 dantaldut tres chësta ativiteies:

1. ntervënc per la recupereda, la cunservazion y la valorisazion dla biodefrënzia, di habitat naturei y dl paesaje;
   
2. dejëujamënt de tuédes y relevamënc;
   
3. ntervënc per la realisazion, la gestion, l mantenimënt, l adatamënt y l renuvamënt de zëntri vijites y purteles de nfurmazion dl Parch naziunel, de infopoints, de troies tematics y de duta chëla strutures che ie de bujën per na nfurmazion y devulgazion prezisa y da udëi;
   
4. metuda a despusizion de material de nfurmazion per na miëura cunescënza di fins, dla carateristiches y dl'ativieteis scientifiches dl Parch naziunel;
   
5. dejëujamënt de manifestazions de carater nfurmatif, metuda a despusizion o venduda de gadgets, publicazions, chertes per escurscions y nsci inant;
   
6. la promozion y l dejëujamënt de scumenciadives y mesures tl ciamp dla nfurmazion y educazion ambientela coche escursions menedes, de manifestazions publiches, ma nce la realisazion de strutures adatedes al'educazion ambientela y ala furmazion spezifica, tlo ratà pea vëniel nce l ecuipajamënt, y l ajurnamënt sibe dl personal intern sibe nce de chël nciarià n chësc cont dala Provinzia autonoma;
   
7. istituzion de n servisc de nfurmazion, prutezion dla natura y verdia tl cheder dl manejamënt dla fauna salvera, tlo ratà pea vëniel nce l ecuipajamënt y la furmazion dla/di culaburadëures che se cruzia de dut chësc;
   
8. ntervënc per regulé l flus de vijitadëures, nce tres la senialetica ufiziela, per la realisazion y l mantenimënt dla strutures funzioneles ala fruizion turistich-recriativa cun mëises o banc y mplanc saniteres, per plazes da se fermé y sté, azesc y lueges dai auti tl Parch naziunel y sun la sperses de purtenienza;
   
9. ntervënc per la realisazion, l mantenimënt y la promozion dla rë di troies, nce tres la senialetica curespundënta;
   
10. promozion dla cura dl paesaje, ratei pea nce l finanziamënt de manufac tradiziunei y de strutures y imubilies cun valor storich-culturel;
    
11. promozion de proiec de mubiltà sustenibla cun deguna emiscions tl raion dl Parch naziunel y ti raions ujins y ti chemuns de purtenienza;
    
12. proiec per realisé la diretives y i traverc fissei tl plann dl Parch.
    

(1-bis)  Per l arjunjimënt di obietifs y l’atuazion dla mesures y ativiteies nunziedes tl coma 1 possa la Provinzia autonoma de Bulsan stlù ju cunvenzions o acurdanzes nce cun d’autra aministrazions publiches, ënc, aziendes spezieles, sozieteies partezipedes dala Provinzia, universiteies, istituc de nrescida, lies o fassoziazions. 2)

(2)  Per duta la scumenciadives de chësc articul che reverda aspec de comunicazion vëniel aplicà la linies diretives sun la comunicazion apurvedes dal cumité de coordinamënt y de manejamënt.

(1)  L Parch naziunel adum cun i chemuns dl Südtirol che fej pert dl teritore dl Parch naziunel forma l "Teritore Parch naziunel dl Stelvio". La Provinzia autonoma de Bulsan sustën l'ativiteies fates tl teritore dl Parch naziunel y i prodoc che curespuend a n model de turism y svilup economich sustenibl dl teritore dl Parch naziunel dl Stelvio tres scumenciadives teritorieles aposta.

(2)  La scumenciadives teritorieles nunziedes tl coma 1 ie finalisedes a:

1. sustenì l teritore dl Parch naziunel y si prodoc, dantaldut chëi da paur y di bosc;
   
2. scuné la produzions tipiches y l artejanat local tl Parch naziunel;
   
3. sustenì y cualifiché la produzion de bëns de servisc cun metodes cumpatibles cun la carateristiches dl teritore dl Parch naziunel y cun si bujëns de cunservazion;
   
4. sustenì la cumerzialisazion y l cunsum di prodoc che à i recuisic de cualità sciche chëi biologics, tipics y tradiziunei locai, per purté pro ala cunservazion dla biodefrënzia tl teritore dl Parch naziunel;
   
5. sustenì la mprejes y la ocupazion dl raion;
   
6. fé che la/i cunsumadëures recunësce diretamënter y debota i prodoc y l'ativiteies che vën dal raion dl Parch naziunel;
   
7. garantì la pruvenienza dl prodot y dl servisc tres n sistem de trassabltà cun chël che n posse cunstaté avisa y cun segurëza da ciun produtëur uriginel che l prodot y l servisc vën.
   

(1)  La funzions tl cheder dla gestion dl Parch, tl lim dl raion de cumpetënza provinziela, vën dejëutes dal'Aministrazion provinziela che les eserzitea prinzipelmënter tres l Ufize per l Parch naziunel dl Stelvio, i zëntri vijites y la lueges de verdia tl Parch naziunel coche nce tres i Ispetorac di bosc cumpetënc per l teritore.

(2)  La Provinzia eserzitea la funzions de gestion sustenian:

1. la partezipazion plu ampla de duc i sogec nteressei;
   
2. l coordinamënt cun la Provinzia autonoma de Trënt y cun la Region Lombardia y nce acurdanzes a carater transfruntalier;
   
3. la integrazion danter la politiches de cunservazion y de svilup sozio-economich sustenibl.
   

(1)  Per tò ite la populazion locala tla cuestions che à da nfé cun l teritore dl Parch naziunel tl raion dla provinzia de Bulsan vëniel per la dureda dla legislatura cun delibera dla Jonta provinziela istituì l cumité de gestion coche organn consultif dl'aministrazion provinziela, che ie metù adum nsci:

1. da cater reprejentanc di chemuns desiniei dala nduneda di ambolc di chemuns de chëi che l teritore toma, defin o n pert, tla sëides dl Parch;
   
2. dala diretëura/dal diretëur dl Ufize per l Parch naziunel dl Stelvio;
   
3. da una na reprejentanta/un n reprejentant dla Repartizion provinziela bosc;
   
4. da una na reprejentanta/un n reprejentant dla lia di paures plu reprejentativa a livel provinziel;
   
5. da doi reprejentantes/reprejentanc dla lia ambientalista plu reprejentativa a livel provinziel;
   
6. da n espert o na esperta de scienzes natureles;
   
7. da una na reprejentanta/un n reprejentant dla urganisazions turistiches;
   
8. da una na reprejentanta/un n reprejentant dla aministrazions spartides ejistëntes ti chemuns dl Parch.
   

(2)  L cumité lita la presidënta/l presidënt y la vizepresidënta/l vizepresidënt danter si cumponënc. Per uniuna/uniun di cumpunënc tituleres preudui dal coma 1 vëniel numinà na suplënta/n suplënt. Ala cumponentes/ai cumponënc dl cumité ne ti spietel deguna cumpensazions o rembursamënc dla spëises.

(3)  L cumité de gestion:

1. porta a esprescion si arat sun l plann, sun l regulamënt y sun la sëides dl Parch naziunel;
   
2. porta a esprescion n arat sun l program anuel de gestion prejentà dal Ufize per l Parch naziunel dl Stelvio;
   
3. possa formulé arac sun tematiches che à da nfé cun la gestion dl Parch naziunel y purté dant proiec per l'atuazion di urientamënc y di obietifs fissei dal plann dl Parch, njiniei dal Ufize per l Parch naziunel dl Stelvio.
   

(4)  La funzions de secretariat ie seguredes dal Ufize per l Parch naziunel dl Stelvio.

(5)  La cumponëntes/I cumponënc che ne vën nia ala sentedes zënza na rejon mutiveda per plu che trëi iedesc ndolauter vën detlarei destumei. L ti spieta al cumité de gestion detlaré la destumënza de chësta cumponëntes/chisc cumpontënc, che vën remplazedes/remplazei dala Jonta provinziela.

(1)  L plann per l Parch naziunel ie elaburà dal’aministrazion provinziela tl respet di prinzips de basa preudui dala lege di 6 de dezëmber 1991, n. 394, te n pruzes partezipatif cun i chemuns y i purtadëures di nteresc sëurandividuei assoziei te lies y cumiteies. L plann mira ala defendura di valores naturei, ambientei y dl paesaje, coche nce a chëi storics, culturei, antropologics, soziei, economics sustenibli y tradiziunei dl Parch. L plann per l Parch spartësc l teritore dl Parch sun la basa dl livel defrënt de prutezion te resserves nujel, resserves de mantenimënt, raions de passaje y raions de promozion economica y soziela, y l regulea:

1. la urganisazion generela dl teritore y si articulazion te sperses o pertes caraterisedes da formes defrënziedes de nuzeda, giaudënza y defendura;
   
2. liams, destinazions d'adurvanza publica y privata y normes d'atuazion relatives cun referimënt ala sperses o pertes dl plann per l Parch defrëntes;
   
3. sistems d'azessibltà per veiculi y pedons cun respet particuler di percursc, azesc y dla strutures resservedes ala persones dejables y purtadëures de handicap;
   
4. sistems d'atrezatura y de servijes per la gestion y la funzion soziela, agricula, furestela y turistica dl Parch, zëntri vijites y purteles de nfurmazion;
   
5. urientamënc y criteres per i ntervënc sun la flora, sun la fauna y sun l ambient naturel n generel.
   

(2)  L’apurvazion dl plann per l Parch naziunel, per la pert dl teritore de cumpetënza provinziela, vën dejëuta n cunformità ala linies d’urientamënt y diretives dl Cumité de coordinamënt y diretif, aldò dl articul 3 dl decret dl Presidënt dla Republica di 22 de merz 1974, n. 279, y mudazions suzessives, cun l pruzedimënt aldò dl articul 50 dla lege provinziela di 10 de lugio 2018, n. 9. La diretëura/l diretëur dl Ufize per l Parch naziunel dl Stelvio tol pert cun dërt de stima ala senteda dla cumiscion per l teritore y l paesaje, te chëla che l vën tratà l plann per l Parch naziunel o na si mudazion. Ala sentedes dla cumiscion tolel nce pert, cun funzion consultiva, la presidënta/l presidënt dl cumité de gestion.  3)

(3)  Dala data dla prima adozion dl plann per l Parch naziunel o dla mudazion de chësc nchin ala jita n forza relativa muessa l'autoriteies cumpetëntes suspënder uni determinazion sun la dumandes de ntervënc sce les recunësc che les ie n cuntrast cun la determinazions dl plann dl Parch. La Jonta provinziela apurvea l plann do avëi tëut ite l arat dl cumité de gestion y do avëi tëut ite l arat lient dl Ministere dl ambient y dla defendura dl teritore y dl mer. L plann per l Parch naziunel vën mudà y ajurnà cun la medema pruzedura che ie de bujën per si apurvazion.

(4)  L plan dl Parch naziunel à fazion de detlarazion de nteres publich generel sciche nce de prëscia y de nia prorogabltà per i ntervënc che ie udui danora te d’ël. Mé tl lim dla pertes dl teritore cumenel che toma tl parch, dà l plan dl Parch dant l cheder per i plans cumenei per l teritore y la cuntreda. Per la frabiches che ie bele, i raions urbans cunsolidei y la sperses destinedes spezificamënter al nridlamënt vëniel aplicà i regulamënc integratifs y de detail di plans cumenei per l teritore y la cuntreda, che dà dant, delimitea y desciplinea tl teritore dl Parch naziunel i cuntenuc nunziei tl articul 47 dla lege provinziela di 10 de lugio 2018, n. 9. 4)

(5)  Per la frabiches che ie bele, i raions urbans cunsolidei y la sperses destinedes spezificamënter al nridlamënt, vën l plan cumenel per l teritore y la cuntreda elaburà n cunformità a cie che ie udù danora dal plan dl Parch per arjonjer i obietifs de defendura preudui. Per chësc fin tol l Ufize provinziel per l Parch naziunel dl Stelvio pert al pruzedimënt d’adozion dl plan cumenel per l teritore y la cuntreda o de si variantes. Pra l’apurvazion dl plan cumenel per l teritore y la cuntreda possa la Jonta provinziela fé la mudazions che ie de bujën per n seguré la coerënza cun cie che l plan dl Parch dà dant. 5)

(6)  Tl respet di fins y di prinzips dla lege di 6 de dezember 1991, n. 394, possa l plan dl parch fissé i ciamps sometui ala despusizions provinzieles de carater generel y setoriel aplicables tl teritore dl parch. Nchin al’apurvazion dl Plan o sce chësc ne ne vëija nia danora de tel despusizions vëniel aplicà la despusizions provinzieles de setor, tan inant che les ie cumpatibles cun i obietifs de defendura dl parch coche i ie dac dant tla linies diretives dl Cumité de coordinamënt y direzion nunzià tl articul 3 dl decret dl Presidënt dla Republica di 22 de merz 1974, n. 279, y mudazions suzessives. 6)

(7)  L plan per l Parch naziunel ie sometù a revijion periodica te n tëmp de almanco uni diesc ani. L plan per l Parch naziunel resta a uni moda n forza nchin che l vën renuvà. 7)

(1)  L regulamënt dl Parch naziunel vën elaburà dal'aministrazion provinziela tl respet di prinzips de basa preudui dala lege di 6 de dezëmber 1991, n. 394, te n pruzes partezipatif cun i chemuns y i purtadëures di nteresc sëurandividuei assoziei te lies y cumités. L regulamënt valorisea la usanzes, la tradizions, la manieres de viver y l'ativiteies sozieles y economiches dla populazions residëntes sun l teritore dl Parch coche nce si esprescions cultureles y la carateristiches dla identità dla cumenanzes locales. L regulamënt disciplinea l eserzize dl'ativiteies lascedes pro o limitedes tl teritore dl Parch nstës y determinea nce la localisazion y la graduazion dla pruibizions. L regulamënt stabilësc nce la derogazions ala pruibizions nunziedes tl articul 11 dla lege di 6 de dezëmber 1991, n. 394.

(2)  L’apurvazion dl regulamënt dl Parch naziunel, per la pert dl teritore de cumpetënza provinziela, vën dejëuta n cunformità ala linies d’urientamënt y diretives dl Cumité de coordinamënt y diretif, aldò dl articul 3 dl decret dl Presidënt dla Republica di 22 de merz 1974, n. 279, y mudazions suzessives, cun l pruzedimënt aldò dl articul 50 dla lege provinziela di 10 de lugio 2018, n. 9. La diretëura/l diretëur dl Ufize per l Parch naziunel dl Stelvio tol pert cun dërt de stima ala senteda dla cumiscion per l teritore y l paesaje, te chëla che l vën tratà l’autorisazion o la mudazion dl regulamënt dl Parch naziunel. Ala sentedes dla cumiscion tolel nce pert, cun funzion consultiva, la presidënta/l presidënt dl cumité de gestion.  8)

(3)  Dala data dla prima adozion dl regulamënt o dla mudazion de chësc nchin ala jita n forza relativa muessa l'autoriteies cumpetëntes suspënder uni determinazion sun la dumandes de ntervënc o ativiteies canche les recunësc che les ie n cuntrast cun la determinazions dl regulamënt nstës. La Jonta provinziela apurvea l regulamënt do avëi tëut ite l arat dl cumité de gestion y do avëi tëut ite l arat lient dl Ministere dl ambient y dla defendura dl teritore y dl mer. L regulamënt vën mudà y ajurnà cun la medema pruzedura che ie de bujën per si apurvazion.

(1)  Tl'atuazion dla Diretiva Fauna Flora Habitat 92/43/CEE y dla Diretiva Defendura di Uciei 2009/147/CE (79/409/CEE) iel unì individuà tl Parch raions Natura 2000. Per chisc raions iel unì apurvà i obietifs de defendura y la mesures de cunservazion cun delibera dla Jonta provinziela n. 69 di 24 de jené 2017, aldò dl articul 21 dla lege provinziela di 12 de mei 2010, n. 6 y n atuazion dl decret dl Presidënt dla Republica di 8 de setëmber 1997, n. 357, coche nce dl decret dl Minister dl ambient di 17 d’utober 2007, y la mudazions suzessives respetives. Chisc raions ie unic desiniei sciche Zones Spezieles de Cunservazion cun decret dl Ministere dl ambient y dla defendura dl teritore y dl mer di 15 de mei 2017 y i ie sometui ala despusizions d'atuazion dla diretives europeiches nunziedes.

(2)  La pruponëntes /I pruponënc de proiec, planns teritoriei urbanistics y de setor, tlo leprò vëniel nce ratà i planns agricui, di bosc y dl manejamënt di tieres salveresc y si variantes che nteressea sperses dla rë Natura 2000, prejentea na nrescida de inzidënza per individué la fazions che chisc possa avëi sun chësta sperses.

(1)  La cunzescions o autorisazions y la senialazions o comunicazions cochemei denuminedes, liedes ai ntervënc, mplanc y lëures tl Parch ie sometudes al nulla osta preventif aldò dl articul 13 dla lege di 6 de dezëmber 1991, n. 394 (Lege cheder sun i raions defendui), dl Ufize provinziel per l Parch naziunel dl Stelvio. L nulla osta verifichea la cunformità dl ntervënt cun la despusizions dl plan y dl regulamënt o, sce chëstes mancëssa, cun la disciplina de defendura n forza. 10) 

(2)  Sce la normativa provinziela vëij bele danora n pruzedimënt de apurvazion per i ntervënc, proiec o plans, vën l nulla osta dat tl cheder de chësc pruzedimënt. 11) 

(3)  Sce l ntervënt ie sometù ala valutazion de inzidënza vën l nulla osta dat cun n sëul pruvedimënt.

(4)  Sce l proiet ie sometù ala valutazion dl dann ambientel (VDA/VIA), al’autorisazion unica teritoriela (AUT) o a d’autra autorisazions per chëles che la legislazion spezifica vëij danora che l vënie cherdà ite na cunferënza de servijes, vën l nulla osta dat ora tl cheder dla pruzedures d’autorisazion curespundëntes. 12)

(5)  Sce l ie n plan dl Parch y n regulamënt dl Parch apurvei y n forza, de chëi che la prescrizions ie unides sëurantëutes dai chemuns ti strumënc urbanistics respetifs, vën i ntervënc de costruzion ti raions D dl plan autorisei dala ambolta o dal ambolt, che comunichea chësc debota al Ufize provinziel per l Parch. 13) 

(6)  Contra la refudeda dl nulla osta o contra la prescrizions cuntenides te chësc possa la damandënta/l damandënt prejenté recurs gerarchich ala Jonta provinziela tl tëmp de 30 dis.

(1)  L tò ora, mé per fins scientifics, curëc y minerei, plantes che crësc salveres y tieres salveresc ie disciplinà dal regulamënt dl Parch y autorisà dala diretëura/dal diretëur dl Ufize provinziel per l Parch naziunel. 15)

(1)  Per i liams dac dant da chësta lege y dala leges da dant per la individuazion dl Parch naziunel ne iel udù danora deguna indenisazion. La Provinzia autonoma de Bulsan possa stupulé cun i propreteres di teraces o cun chi che à l dërt de stipulé cuntrac de dërt privat per paië cërta prestazions, limitazions o d'autra mesures sun la basa dl articul 27 dla lege provinziela di 12 de mei 2010, n. 6, y diretives curespundëntes da delibré da pert dla Jonta provinziela.

(2)  L’Aministrazion provinziela sustën l’educazion al respet dla cuntreda y dl ambient y la devulgazion dla normes de defendura y la sustën l’ativiteies de ënc y urganisazions che per ncëria istituzionela mira al arjunjimënt de chisc fins tres cuntribuc o suvenzions y mët a despusizion mesuns adatei. L’Aministrazion provinziela possa oradechël sustenì la tueda, la cunservazion y la valorisazion di bëns sometui a liam aldò de chësta lege, tres l cunferimënt de ncëries de consulënza, tueda, nrescida y proietazion a espertes y esperc coche nce tres la cunzescion de cuntribuc o suvenzions da paië ora diretamënter ai patrons, pussessëures o tituleres o sëurandajan la ncëria ai ënc y ala urganisazions nunziedes dessëura. Per chësta categuries de bëns possa l’Aministrazion provinziela, oradechël, dejëujer diretamënter spëises per defënder, cunservé, cuncé ca y ressané l ambient naturel y de cuntreda, coche nce per mëter a jì la realisazion de proiec vegetaziunei per na miëura integrazion tla cuntreda de infrastrutures defrëntes, zones produtives y residenzieles y de lercs per l vërt publich. Per dejëujer la ncëries y l’esecuzion de lëures y mesures tl Parch possa l’Aministrazion provinziela preudëi l’acuisizion de lëures, bëns y servijes cun leprò nce la compra de guant, ecuipajamënt y veiculi, de mascins spezieles y d’atrezatures. Per l’esecuzion di lëures possa l Parch naziunel damandé la culaburazion dla Repartizion provinziela Bòsc, dl’Agenzia per la prutezion zevila y dl’Agenzia Demane provinziel. 16) 

(3)  L'Aministrazion possa cunzeder cuntribuc anuei, sce la miena che l sibe de bujën, per la natura y la dureda dl'assistënza nunzieda tl coma 2. Per l'atuazion de chësta ncëries y nce per discipliné i raporc patrimuniei, possa l'Aministrazion stipulé cunvenzions aposta cun i patrons.

(4)  Per mantenì a tëmp lonch l teritore defendù possa l'Aministrazion provinziela stipulé cuntrac de compra o de fit a tëmp lonch. Per cumpré o fité zones liedes da pert di chemuns, possa l'Aministrazion provinziela cunzeder n cuntribut nchin al 50 percënt dla soma dl cuntrat de compra o de fit.

(5)  Per l’esecuzion de mesures o lëures de mantenimënt dl cheder dla cuntreda y dl ambient tl raion de defendura possa l’Aministrazion provinziela cunzeder premies de sustëni. 17) 

(1)  La Provinzia muessa indenisé i danns gaujei dala fauna salvera tl Parch, ora che chëi gaujei ala pastures da mont y ai bosc, aldò de cie ch ie stabilì tl regulamënt dl Parch. La Jonta provinziela stabilësc cun delibera la mesura dla indenisazion y i criteres y la manieres per si determinazion y erogazion.

(1)  L personal dla Repartizion provinziela Natura y paesaje coche nce chël dl'Agenzia provinziela per l ambient, nciarià per chësc fin da pert dla diretëura respetiva/dl diretëur respetif, l Corp furestel provinziel y la polizai locala cëla che chësta lege vënie respeteda.

(1)  Tl respet dla straufonghes nunziedes tl articul 30 dla lege di 6 de dezëmber 1991, n. 394 y si graduazion stabilida tl regulamënt dl Parch, vëniel aplicà la disciplina legislativa provinziela.

(1)  La sëides dl Parch naziunel vën mudedes, per la pert de cumpetënza provinziela, tla usservanza dla pruzedura ududa danora per l'adozion y l'apurvazion dl plann dl Parch naziunel.

(1)  Per curì la cëries finanzieres che se porta pro dal'atuazion de chësta lege che vën sciazedes, a pië via dal ann 2018, de 1.350.00, 00 euro, fejen nsci:

1. la soma de 996.000,00 euro, aldò dl articul 1, comes 7 y 8, dl decret legislatif di 13 de jené 2016, n. 14, tres deduzion dala soma dl saldo netto da finanzië, coche preudù dal articul 79 dl Statut d'autonomia y dal articul 1, coma 410, dla lege di 23 de dezëmber 2014, n. 190.
   
2. la soma de 354.000,00 euro tres la reduzion curespundënta dl stanziamënt dl fond speziel "Fond global per curì la cëries che se porta pro da pruvedimënc legislatifs nueves" per spëises curëntes, scrita ite tl cheder dl program 03 dla miscion 20 dl bilanz de previjion 2018-2020.
   

(2)  La ressurses finanzieres dl Parch possa oradechël unì integredes da dërc de nuzeda revardënc l'adurvanza de bëns muvibli che ie de proprietà dla Provinzia o che chësta à n gestion, o da ntredes che vën a se l dé da prodoc.

(3)  La Repartizion provinziela Finanzes ie autoriseda a fé, cun si decrec, la variazions de bilanz che ie de bujën.

(4)  La spëisa a cëria di eserzizies finanzieres suzessifs vën stabilida cun lege finanziera anuela.

(1)  Chësta lege va n forza n l di do si publicazion tl Buletin Ufiziel dla Region. Uni persona a chëla che l ti spieta à da la respeté y da la fé respeté sciche lege provinziela.

(2)  Nchin al'apurvazion dl plann per l Parch naziunel y dl regulamënt dl Parch naziunel vëniel aplicà la despusizions de defendura n forza tl mumënt dla sotscrizion dl cunsëns di 11 de fauré 2015.

(1)  La lege provinziela di 3 de nuvëmber 1993, n. 19 ie abrogheda.

Chësta lege unirà publicheda tl Buletin Ufiziel dla Region. Uni persona a chëla che l ti spieta à da la respeté y da la fé respeté sciche lege provinziela.