(1) L coma 1 dl articul 1 dla lege provinziela di 13 de fauré dl 1997, n. 4, ie sustituì nsci:
"Art. 1 (Obietifs generei) – 1. La Provinzia autonoma de Bulsan-Südtirol, tlo dedò tlameda Provinzia, sustën l svilup di setors economics dla ndustria, dl artejanat, dl cumerz, dl turism y di servijes y n particuler de si valor njuntà y de si cumpetitività, nce nternaziunela, tl respet dla normatives comuniteres, di bujëns n cont dl'ecologia y dla defendura dl ambient, dl bujën de garantì n ambient de lëur adatà ala familia, de n svilup balanzà dla ocupazion, dl sustëni dl ses sotreprejentà, di bujëns dla defendura dl lëur, dla igena y dla segurëza pra l lëur."
(2) Do l articul 2-ter dla lege provinziela di 13 de fauré dl 1997, n. 4, vëniel juntà chësc articul:
"Art. 2-quater (Definizions) – 1. Ublianza de familia aldò de chësta lege ie la cura de na fia o de n fi sota i sies ani o la secudienza de parënc nchin al segondo degré che nen à debujën.
2. La zertificazion de cunziliabltà familia-lëur ie chëla aldò di articuli 32, 33 y 34."
(3) Do l coma 4 dl articul 4 dla lege provinziela di 13 de fauré dl 1997, n. 4, y mudazions suzessives, vëniel juntà i comes 5 y 6:
"5. Tl cheder dla regulamentazion comunitera per i aiuc statei vëniel cunzedù aiuc cun na maiurazion sun l tas de basa, dantaldut per cualificazions particuleres, per aziendes te raions struturalmënter dëibli y per aziendes cun la zertificazion de cunziliabltà familia-lëur.
6. Tl cheder dla regulamentazion comunitera per i aiuc statei ti vëniel dantaldut dat la prezedënza a nvestimënc tl servisc dla furnidura de ujinanza, a nvestimënc de aziendes te raions struturalmënter dëibli y a nvestimënc de aziendes cun la zertificazion de cunziliabltà familia-lëur."
(4) Do l pustom i) dl coma 1 dl articul 11 dla lege provinziela di 13 de fauré dl 1997, n. 4, vëniel juntà i pustoms j), k) y l):
"j) furmazion y ajurnamënt dl ses sotreprejentà ti livei dirigenziei, sciche nce furmazion y ajurnamënt per chi che va de reviers tl lëur do na nteruzion per rejons de ublianzes de familia;
k) ntroduzion de fomes de urganisazion y de modiei d'orar de lëur flessibli, y n particuler de posć de lëur a tëmp parziel per persones cun ublianzes de familia, sciche nce de servijes de cura y de assistënza per mutons y mutans, urganisei dala aziendes;
l) l giapé la zertificazion de cunziliabltà familia-lëur o l pudëi se nuzé de d'autra prestazions de cunsulënza che reverda la promozion dla cumpatibltà danter families y prufescion o la promozion dl ses sotreprejentà."