(1) L Cunsëi à n'autonomia normativa y urganisativa y ie funzionalmënter ndependënt te si atività.
(2) L Cunsëi apurvea si urdinamënt a maiuranza assoluta de si cumponënc.
(3) Ora che per cie che ie stabilì da chësta lege, regulea l urdinamënt la manieres de cunvoché y dejëujer la sentedes, la cundizions de validità dla delibrazions y la pruzedures de funzionamënt y de urganisazion di lëures. Tlo leprò toca nce l'atività de cunsulënza ai chemuns.
(4) L Cunsëi litea, cun litazions spartides y a maiuranza assoluta di cumponënc, trëi vizepresidënc, che fej respetivamënter pert dla grupa de rujeneda tudëscia, dla grupa de rujeneda taliana y dla grupa de rujeneda ladina. La pruposta per l vizepresidënt che à da vester dla grupa de rujeneda taliana vën fata dai cumponënc desiniei dal chemun capoluech.
(5) L urdinamënt possa udëi danora la costituzion de n ufize de presidënza y de cumiscions nternes; l possa udëi danora caji te chëi che funzions dl Cunsëi vën eserzitedes da chisc gremiums.
(6) L urdinamënt possa udëi danora caji te chëi che l tòle pert ai lëures dl Cunsëi y de si gremiums nterns d'autri sogec zënza l dërt de vela.
(7) L urdinamënt segurea na maniera asvelta de fé zirculé i ac y de purté a esprescion la pusizions respetives danter i cumponënc dl Cunsëi, nce tres l'adurvanza de strumënc nfurmatics cumpatibli cun la pruzedures tecniches n droa pra la Provinzia y pra l Cunsëi provinziel; l urdinamënt regulea nce la relazions publiches dl Cunsëi.
(8) L Cunsëi possa se nuzé dl personal y dla strutures metudes a despusizion dala urganisazion plu reprejentativa di chemuns, dal Cunsëi provinziel, dala Jonta provinziela, da duc i chemuns, dala cumenanzes raioneles, coche nce da si ënc strumentei; i raporc curespundënc, nce chëi finanzieres, ie regulei da cunvenzions aposta.
(9) L Cunsëi presentea nchin ai 15 de setëmber d'uni ann ala Presidënza dl Cunsëi provinziel n proiet programatich de si ativitëies, njuntà da na previjion dla spëises curespundënta, per l'apurvazion. La gestion dla spëises respetives ie sometuda ala normes dl urdinamënt d'aministrazion y de cuntabltà ntern dl Cunsëi provinziel. Per paië ora la spëises autorisea l Presidënt o la Presidënta dl Cunsëi provinziel, a cëria di stanziamënc aposta udui danora dal Cunsëi provinziel, giaurides de credic a bën de n funzioner delegà, cris ora danter l personal dl Cunsëi provinziel. Chësc funzioner se cruzia de paië la spëises aldò dla normes provinzieles n forza sun i funzioneres deleghei y sun la basa dla istruzions dl Presidënt dl Cunsëi y ti fej avëi la rendicontazions periodiches di paiamënc fac a cëria dla giaurides di credic, adum cun la documentazion de giustificazion respetiva, per l'ejaminazion aministratif-cuntabla al ufize aministrazion dl Cunsëi Provinziel.
(10) Dan l'apurvazion ti vëniel fat avëi la pruposta de urdinamënt al Ufize de Presidënza dl Cunsëi provinziel, che possa formulé usservazions per l'adatamënt di aspec tecnics pruzedurei danter l Cunsëi y l Cunsëi provinziel.