b) Lege provinziala di 18 de dezëmber dl 2002, n. 151)
Test unich dl ordinamënt di sorvisc cuntra le medefüch y de proteziun zivila

(1)  Cun chësc vëgnel istituì l’Aziënda speziala por i sorvisc cuntra le medefüch y de proteziun zivila, te chësta lege tlamada Aziënda speziala; ara à chëstes funziuns:

1. l’eserzize dles funziuns delegades ala Provinzia tl ćiamp dl sorvisc cuntra le medefüch y la gestiun economich-finanziara dles assegnaziuns dla Regiun aladô dl articul 5 dla lege regionala di 2 de setëmber dl 1978, n. 17, tut fora les spëises che reverda le personal dl Corp di stödafüch de profesciun y la conzesciun de sostëgns ai comuns por la realisaziun o le mioramënt dles strotöres por le sorvisc cuntra le medefüch aladô dl articul 20 dla lege regionala di 20 de agost dl 1954, n. 24, che é competënza direta dl’aministraziun provinziala;
   
2. 17)
   
3. l’eserzize de ativitês tl setur dla proteziun zivila che ti po gnì surandades dala Junta provinziala.
   

(2)  Aladô dles desposiziuns de chësta lege à l’Aziënda speziala personalité iuridica, y l’autonomia aministrativa, finanziara y de gestiun. L’Aziënda speziala se sorvësc dl personal dla repartiziun competënta por la proteziun cuntra le medefüch y zivila o dl personal metü a desposiziun dala Provinzia. Cun desposiziuns aposta por ći che reverda la contabilité y l’organisaziun, aprovades cun decret dl Presidënt dla Provinzia, vëgnel stabilì les normes de contabilité por la gestiun dles ressurses finanziares; chëstes po inće desvié dales desposiziuns revardëntes la contabilité publica, mo mëss impò respetè i prinzips generai dla normativa sön la contabilité dl’aministraziun provinziala. Le regolamënt che reverda la contabilité y l’organisaziun stabilësc implü les modalitês de vigni ater aspet aministratif y de gestiun nia tlermënter discipliné da chësta lege.

(3)  Les spëises por la sënta y inće por le personal assegné al’Aziënda speziala é a ćiaria dl bilanz dla Provinzia. La Junta provinziala po autorisé, tl respet dles normes varëntes, la surantuta a ćiaria dl bilanz dla Provinzia dles spëises por i sorvisc generai, sciöch’inće por i mebli, l’aredamënt y les atrezadöres dl’Aziënda speziala. 18)

(1)  Les entrades dl bilanz dl’Aziënda speziala se mët adöm insciö:

1. dai fonds dl bilanz provinzial assegnà dala Regiun aladô dl articul 22, coma 1, lëtra a) y dales integraziuns eventuales cun i fonds dl bilanz dla Provinzia por l’esecuziun dl sorvisc di stödafüch;
   
2. dales entrades che deröia da sorvisc a paiamënt fać dal Corp di stödafüch de profesciun;
   
3. dales assegnaziuns eventuales dal bilanz dla Provinzia por funziuns liades ala proteziun zivila y al Sorvisc de proteziun cuntra catastrofes;
   
4. da rendimënć y contribuć de ënć o porsones privates por l’Aziënda speziala;
   
5. da vigni atra entrada eventuala liada ala gestiun y ai fins dl’Aziënda speziala.
   

(2)  Dl’assegnaziun dles somes preodüdes dal coma 1, lëtres a) y c) se fistidiëia la Junta provinziala. Le versamënt al’Aziënda speziala dles somes preodüdes dal coma 1, lëtres a) y c) vëgn fat por l’Aziënda speziala bele danfora y en relaziun ai bojëgns de cassa por periodes determinades dala Junta provinziala. Por chësc fin presentëia l’Aziënda speziala ala Junta provinziala les dates che reverda i bojëgns de cassa partis sö por capitui de spëisa.

(3)  Le sorvisc de cassa dl’Aziënda speziala ti po gnì assegné al istitut bancar a chël che al é afidé le sorvisc de tesorier dla Provinzia; chësc mëss apliché les condiziuns che vel por la Provinzia.

(1)  Organns dl’Aziënda speziala é:

1. le consëi d’aministraziun;
   
2. le presidënt o la presidënta dl consëi d’aministraziun;
   
3. le collegium dles porsones inćiariades a controlè i cunć.
   

(1) Le consëi d’aministraziun dl’Aziënda speziala, nominé dala Junta provinziala, é metü adöm da trëi porsones cun conescënzes particolares tl ćiamp dl’aministraziun publica; öna de chëstes surantol la inćiaria de presidënt.  19)

(2)  Le laûr de secretariat vëgn fat da personal dependënt o inćiarié dl’aministraziun provinziala.

(3) 20)

(4)  Por che les sentades ais validité mëss la maioranza di comëmbri ester presënta. Le consëi d’aministraziun delibrëia a maioranza de usc dles porsones presëntes. A parité de usc é chëra dl presidënt o dla presidënta la usc dezidënta.

(5)  Le presidënt o la presidënta po invié a tó pert ales sentades zënza dërt de usc le dotur de crëta dl’Aziënda speziala y porsones espertes ti ćiamps metüs al ordinn dl dé; implü pol ti surandè al diretur tecnich o ala direturia tecnica y/o al diretur aministratif o ala direturia aministrativa o a d’atri comëmbri inće inćiaries afidades aladô dl articul 3 dla lege regionala di 20 de agost dl 1954, n. 24, y mudaziuns suandëntes al ispetur o al’ispeturia dla Provinzia.

(6) Per la nominaziun dl consëi d’aministraziun dl’Aziënda speziala, la dorada en ćiaria y i compënsc vëgnel apliché le decret dl Presidënt dla Provinzia di 10 d’aurì dl 2014, n. 13. 21)

(1)  Le consëi d’aministraziun dl’Aziënda speziala:

1. delibrëia le bilanz de previjiun anual, sües variaziuns y inće le cunt consuntif che mëss gnì aprovà dala Junta provinziala. Le bilanz de previjiun anual mëss gnì presentè ćina ai 31 de otober dl ann da denant y le cunt consuntif ćina ai 31 de merz dl ann che vëgn;
   
2. aprovëia i programs d’ativité dl’Aziënda speziala y dl Corp di stödafüch de profesciun sön la basa di preventifs de spëisa. L’aprovaziun di programs autorisëia acuisiziuns, sorvisc y laûrs por la realisaziun di programs de spëisa y a stipulé i contrać corespognënć. Les acuisiziuns, i sorvisc y i laûrs che ne va nia sura i 200.000 euro fora vëgn de regola fać en economia y i contrać relatifs vëgn stipulà aladô de assegnaziuns zënza bandida de concurs publich, aladô dles desposiziuns dl regolamënt de contabilité dl’Aziënda speziala; 22)
   
3. aprovëia i planns y les carateristiches dles dotaziuns de atrezadöres, mesi de trasport, mascinns y echipamënć dl Corp di stödafüch de profesciun; 23)
   
4. delibrëia mudaziuns al regolamënt por ći che reverda la contabilité y l’organisaziun preodü dal articul 22, coma 2, che mëss gnì aprovades dala Junta provinziala;
   
5. delibrëia convenziuns y contrać;
   
6. delibrëia regolamënć de tarifes internes y normes diretives; 24)
   
7. delibrëia les spëises odüdes danfora dal bilanz dl’Aziënda speziala y inće les spëises da pert dla Repartiziun proteziun cuntra le medefüch y proteziun zivila sön le cunt dl’Aziënda speziala;
   
8. determinëia ći che al va ćiamò debojëgn por n bun funzionamënt dl’Aziënda speziala y ti fej les propostes relatives ala Junta provinziala.
   

(1)  La porsona che à la presidënza tl consëi d’aministraziun é la rapresentanta legala dl’Aziënda speziala.

(2)  La porsona che à la presidënza

1. convochëia le consëi d’aministraziun y à la presidënza; na copia dl invit ales sentades dl consëi d’aministraziun ti vëgn menada ai mëmbri dl collegium di controlacunć;
   
2. desponn i prelevamënć dal fonds de resserva;
   
3. stlüj jö i contrać y les convenziuns do che ara à ciafè l’autorisaziun dal consëi d’aministraziun;
   
4. autorisëia l’assegnaziun de fonds por spëises d’economat por i direturs o les direturies dl’Aziënda speziala y i atri funzionars o les atres funzionares che à l’autorisaziun a efetué spëises en economia;
   
5. sotescrî i mandać de paiamënt y de scudimënt;
   
6. controlëia l’esecuziun dles dezijiuns dl consëi d’aministraziun.
   

(3)  La porsona che à la presidënza tol te caji d’urgënza y nezescité provedimënć che é competënza dl consëi d’aministraziun; pro la proscima sentada é chisc atira da ti presentè al consëi d’aministraziun por la ratificaziun.

(4)  Les competënzes preodüdes dal coma 2, lëtres c) y e) ti po gnì delegades ai direturs o ales direturies dl’Aziënda speziala.

(1) La gestiun economich-finanziara dl’Aziënda speziala é sotmetüda al control de n revisur unich o na revisuria unica, nominé/nominada dala Junta provinziala, che à le dërt da tó pert, zënza dërt de lîta ales sentades dl consëi d’aministraziun.

(2)  Le revisur unich o la revisuria unica fej i controi che al/ara arata debojëgn por l'andamënt dla gestiun y à dantadöt le dovëi da ejaminé le bilanz de previjiun y le cunt consuntif, ti scrion na relaziun aposta al consëi d’aministraziun.

(3)  Por la nominaziun dl revisur unich o dla revisuria unica, la dorada en ćiaria y i compënsc vëgnel apliché le decret dl Presidënt dla Provinzia 10 d’aurì dl 2014, n. 13. 25)

(1)  Cuntra les deliberaziuns dl consëi d’aministraziun dl’Aziënda speziala ti pol gnì presentè recurs ala Junta provinziala; chësc é da presentè tl tëmp de 30 dis dala data de comunicaziun dla deliberaziun.

(1)  Por ademplì i dovëis indicà tl articul 1, coma 5, eserzitëia le Sorvisc di stödafüch les ativitês suandëntes:

1. destodé le medefüch, eserzité sorvisc de suraverda y de control y d’atri sorvisc por la prevenziun cuntra le medefüch;
   
2. eserzité aiüt tecnich, sce al va debojëgn inće sciöche prevenziun, te düć i caji odüs danfora dala lege y dales desposiziuns, pro inzidënć desvalis, pro la tomada de frabicać, pro roes, rogossies, inondaziuns y inće te d’atres situaziuns d’emergënza y te vigni ater caje olache l’intervënt vëgn aratè nezesciar;
   
3. eseguì, te situaziuns d’emergënza y por ademplì i dovëis de proteziun zivila, les desposiziuns de lege y regolamentares dades fora dala Provinzia autonoma de Balsan aladô dl articul 11, numer 14 y dl articul 13 dla lege costituzionala di 26 de forà dl 1948, n. 5.
   

(2)  Le Sorvisc di stödafüch garantësc n sorvisc che cür döt le teritore provinzial y al se sorvësc dles strotöres indicades tl articul 2, coma 3.

(1)  L’intervënt dl Sorvisc di stödafüch é obligatore y debann tan dî che al döra la situaziun d’urgënza o d’emergënza y te vigni caje, ma ćina che i organns tecnics competënć surantol so laûr.

(2)  Constatè l’esistënza o la fin de na situaziun d’urgënza o d’emergënza é na dezijiun sotmetüda al iudize dl comandant o dla comandanta.

(3) Le Sorvisc de segurëza cuntra le medefüch y i intervënć nia urgënć y che va inant inće do la fin dla situaziun d’urgënza o d’emergënza mëss gnì paià sön la basa dles tarifes aprovades dala Junta provinziala. 26)

(4)  I intervënć y le sorvisc preodüs dal coma 3 é d’oblianza ti caji preodüs dala lege y dales normes diretives y é facultatifs te d’atri caji aladô dl iudize dl comandant.

(1)  I Corps di stödafüch fej n sorvisc publich y agësc aladô dl prinzip dl aiüt reziproch. Tan inant che i planns d’alarm pro la Zentrala provinziala d’emergënza ne stabilësc nia val’d’ater mëss i stödafüch antergnì tl raiun local de süa competënza y sön domanda, inće fora de chësc raiun. Te düć i atri caji é so intervënt facultatif.

(2)  Tan inant che al n’é nia gnü concordè val’d’ater surantol le comandant o la comandanta dl Corp di stödafüch de competënza a livel teritorial la direziun dl’intervënt tolon sö la funziun de comandant o comandanta dl intervënt. Düć i Corps di stödafüch che antervëgn por daidé para é sotmetüs a sü ordinns. Sce al manćia le comandant o la comandanta surantol le o la stödafüch cun le degré de sorvisc plü alt la direziun.

(3)  I Corps di stödafüch volontars cun sënta tl comun de Balsan ti sotestà al comandant o ala comandanta dl Corp di stödafüch de profesciun de Balsan indere ma por ći che reverda les operaziuns tecniches d’intervënt.

(4)  Ćina che le Corp di stödafüch competënt a livel teritorial n’é nia sön le post d’intervënt surantol le comandant o la comandanta dl Corp di stödafüch rové adalerch por pröm la direziun.

(5)  Pro intervënć olache al va debojëgn de n’aziun coordinada de de plü Corps di stödafüch tëgn le comandant o la comandanta dl intervënt cunt dla consulënza di comandanć o dles comandantes di atri Corps di stödafüch o di funzionars o dles funzionares dles Uniuns di stödafüch volontars presënć y al o ara po inće deleghè a d’ëi o a d’ëres la direziun.

(6)  Por le medefüch de bosch vëgn la direziun dl intervënt regolada dal articul 26 dla lege provinziala di 21 d’otober dl 1996, n. 21, y mudaziuns suandëntes.

(7)  I funzionars y les funzionares dles Uniuns di stödafüch volontars competënć a livel teritorial o dl Corp di stödafüch de profesciun che é gnü cherdè adalerch dal comandant o dala comandanta po surantó la direziun dl intervënt sce ai l’arata nezesciar.

(8) Por intervënć de natöra straordinara o particolarmënter prigorusc vëgn la direziun dl intervënt regolada atramënter dal assessur provinzial competënt en materia de proteziun cuntra le medefüch y proteziun zivila. 27)

(9)  Pro i intervënć y por evité de maius prighi o dagns po le comandant o la comandanta dl intervënt do so iudize comanè de tó les mosöres adatades por se stravardè da majeri dagns cun intlujiun dla demoliziun de frabicać.

(10)  Ti caji indicà tl articul 31, coma 1, sön domanda dl ombolt o dl’ombolta, dl comandant o dla comandanta dl intervënt é vigni porsona obliada a dè aiüt, a mëte a desposiziun atrezadöres, mesi y strotöres; al vëgn ma fat ezeziuns por rajuns iustificades. Les porsones interessades à le dërt de ciafè n’indenisaziun y n rembursamënt dles spëises da pert di comuns tocà. Inzidënć y maraties vëgn despaiades jö aladô dles desposiziuns dl articul 49.

(1)  Chi che va cuntra i dovëis preodüs dal articul 18 y 32, coma 10, de chësta lege mëss paié na straufunga aministrativa che va da 50 a 250 euro aplican les normes de prozedöra preodüdes dala lege provinziala di 7 de jenà dl 1977, n. 9. Sanziuns penales eventuales resta impé.

(1)  La repartiziun competënta en materia de proteziun cuntra le medefüch y proteziun zivila se fistidiëia dl rembursamënt di dagns gaujà dal Sorvisc di stödafüch preodü dal articul 2, coma 3, intratan l’eserzize de so sorvisc a terzi - porsones o cosses - nia curis da n’assiguraziun. Chësc ne vel nia por i dagns gaujà dales scuadres di stödafüch aziendales al intern de süa aziënda. 28)

(1)  Spëises eventuales che vëgn sostignides intratan i intervënć, y che i singui Corps di stödafüch volontars ne po nia surantó cun i mesi te so bilanz preventif, vëgn rembursades dal comun olache l’intervënt é stè fat.

(2) Por intervënć che comporta de gran spëises y mesi relevanć po i comuns ti damanè contribuć ala repartiziun competënta en materia de proteziun cuntra le medefüch y proteziun zivila; chisc vëgn paià fora aladô di criters aprovà dala Junta provinziala.29)

(3) 30) 

(1) I mëmbri di stödafüch mëss de regola se vistì canche ai é en sorvisc la mondur cun i sëgns distintifs de süa cualifica de stödafüch y inće dl degré che ai à. I criters por la forma dles mondurs y i sëgns distintifs vëgn stabilis dal assessur provinzial competënt en materia de proteziun cuntra le medefüch y proteziun zivila sön proposta dl’Uniun provinziala di Corps di stödafüch volontars o dl comandant o dla comandanta dl Corp di stödafüch de profesciun. 32)

(1)  A condiziun che al vëgnes tut les mosöres de precauziun nezesciares y che al vëgnes osservè les prescriziuns eventuales da fà fora cun l’Agenzia provinziala por l’ ambiënt 33)  à le Sorvisc di stödafüch l’autorisaziun de mëte a jì eserzitaziuns cuntra le medefüch y tecniches, inće desvian da proibiziuns eventuales preodüdes dales normes iuridiches varëntes.

(1)  Le Corp di stödafüch de profesciun à so raiun de competënza y eserzitëia süa ativité primara tl comun de Balsan. Al sotestà al Presidënt dla Provinzia o al assessur competënt o al assessuria competënta te chësta materia. Dal punt de odüda tecnich y aministratif à le comandant o la comandanta dl Corp di stödafüch de profesciun la direziun; chësc é funzionar o funzionara dla Provinzia.

(2)  Tl Corp di stödafüch de profesciun pol inće gnì organisé n sorvisc d’elicoter, de sfunsadù y inće d’atri sorvisc spezialisà, al à na funziun speziala y na gestiun dl bilanz sön la basa dl regolamënt de contabilité y d’organisaziun preodü dal articul 22.

(3)  Les spëises por le finanziamënt dl Corp di stödafüch de profesciun, tolon ite inće les atrezadöres, é a ćiaria dl bilanz dl’Aziënda speziala y vëgn scrites dant dal Comandant o dala Comandanta dl Corp di stödafüch de profesciun aladô dles modalitês stabilides tl regolamënt de contabilité y d’organisaziun desvian inće, sce al é le caje, dales desposiziuns dla lege provinziala sön la contabilité. Le consëi d’aministraziun delibrëia les assegnaziun relatives.

(4)  La Provinzia mët a desposiziun dl Corp di stödafüch de profesciun casermes di stödafüch y d’atri locai che va debojëgn por eserzité so sorvisc y se fistidiëia aladô dl articul 22 dl finanziamënt di cosć dl personal.

(5)  Le sorvisc dl Corp di stödafüch de profesciun vëgn partì ite cun regolamënt d’esecuziun te unitês d’organisaziun sot ala direziun de porsones che surantol la responsabilité dl sorvisc. Le comandant o la comandanta dl Corp di stödafüch de profesciun po surandè a chëstes porsones responsables funziuns tecniches sciöche inće aministratives y de gestiun dl personal de süa competënza.

(1)  Le tratamënt iuridich y economich dl personal dl Corp di stödafüch de profesciun vëgn stabilì aladô dl ordinamënt dl personal dla Provinzia.

(2)  Le personal dl Corp di stödafüch de profesciun vëgn incadrè tla “funziun speziala dl Corp di stödafüch de profesciun dla Provinzia”. Ćina che al ne gnarà nia regolè atramënter dales desposiziuns dla Provinzia gnarà le personal dl Corp di stödafüch de profesciun menè en ponsiun cun i medemi agn de sorvisc preodüs por i posć corespognënć o analogs ocupà dal personal dl Corp nazional di stödafüch.

(3)  Por ći che reverda i posć dà sö aposta, sön domanda y do na tuta de posiziun dl comandant o dla comandanta, po le personal dl Corp di stödafüch de profesciun che n’é nia plü adatè ales inćiaries dla funziun eserzitada ćina a chël momënt, gnì mantignì en sorvisc pro le Corp di stödafüch de profesciun por ademplì d´atres funziuns a sorvisc dl Corp di stödafüch de profesciun.

(4)  Le personal preodü dal coma 3, che resta en ćiaria sce al é nezesciar inće te n numer surafora, vëgn incadrè te na cualifica funzionala corespognënta; al eserzitëia funziuns adeguades a sües capazitês y ciafa n paiamënt almanco de tan che al davagnâ tl livel funzional da denant. Le medemo personal ciafa inant l’indenité dl sorvisc di stödafüch sciöche indenité personala. Te vigni caje tómel dötes les atres indenitês o i atri compënsc che é lià a inćiaries operatives particolares dl personal che fej pert dla funziun speziala dl Corp di stödafüch de profesciun dla Provinzia.

(5)  Por le personal che aladô dl articul 3 dla lege regionala di 2 de setëmber dl 1978, n. 17, é passè dala Regiun Trentin-Südtirol ala Provinzia autonoma de Balsan y che aladô dla lege provinziala di 3 de agost dl 1983, n. 28, é incadrè tles funziuns provinziales vëgnel tut en conscidraziun, por calcolè la indenisaziun a contlujiun dl raport de laûr, aladô dles normes dla Provinzia, le tëmp de sorvisc pro la Regiun y les periodes reconesciüdes por chësta rajun dala Regiun instëssa aladô dl articul 5 dla lege regionala di 21 de jügn dl 1967, n. 6, remplazè dal articul 24 dla lege regionala di 26 d’aurì dl 1972, n. 10; al vëgn trat jö imporć che po ester é bele gnüs paià fora dal’aministraziun regionala.

(6)  Aladô dles normes iuridiches dl stat relatives eserzitëia le personal che fej pert dla funziun speziala dl Corp di stödafüch de profesciun dla Provinzia les inćiaries d’agënt o agënta y d’ofizier o ofiziera de polizia iudiziara y ciafa na tessera de reconescimënt aposta.

(7)  Implü à le personal dl Corp di stödafüch de profesciun tles materies de competënza dla Provinzia chës funziuns y inćiaries, che ti vëgn assegnades a livel statal al Corp nazional di stödafüch, sce al ne vëgn nia regolamentè atramënter dala Provinzia.

(8)  Le personal dles funziuns speziales dl Corp di stödafüch de profesciun dla Provinzia ne po nia ester ocupé a tëmp parzial.

(9) 35)

(1)  Le sorvisc dl Corp di stödafüch de profesciun é presidié dal comandant o dala comandanta dl Corp di stödafüch de profesciun che surantol les funziuns aministratives, tecniches y de gestiun dl personal de competënza dla direziun de repartiziun aladô dles desposiziuns provinziales varëntes, cun estlujiun dles competënzes resservades espressivamënter a d’atri organns. Implü eserzitëia le comandant o la comandanta la funziun de diretur o direturia dl ofize competënt por le sorvisc cuntra le medefüch y inće les competënzes che ti vëgn assegnades da chësta lege en materia de sorvisc cuntra le medefüch y de proteziun zivila.

(2)  Le vizecomandant o la vizecomandanta dl Corp di stödafüch de profesciun sostituësc le comandant o la comandanta tl caje d’assënza o impedimënt y surantol les inćiaries che ti é gnüdes surandades dal comandant o dala comandanta.

(1)  Le comandant o la comandanta y le vizecomandant o la vizecomandanta dl Corp di stödafüch de profesciun vëgn nominà dala Junta provinziala por la dorada de cater agn, fora che sce al ti vëgn renovè l’inćiaria, sön proposta dl assessur competënt o dl’assessuria competënta por le Corp di stödafüch de profesciun.

(2)  Por arjunje la cualifica de comandant o comandanta dl Corp di stödafüch de profesciun mëssel gnì ademplì chëstes condiziuns: tó ite la cualifica de diretur o direturia tla proteziun cuntra le medefüch, o dui agn de sorvisc efetif tla funziun de vizecomandant o vizecomandanta dl Corp di stödafüch de profesciun, o dui agn de sorvisc efetif sciöche espert superiur o esperta superiura tla proteziun cuntra le medefüch tla funziun speziala dl Corp di stödafüch de profesciun dla Provinzia. 36)

(3)  Por arjunje la cualifica de vizecomandant o vizecomandanta dl Corp di stödafüch de profesciun mëssel gnì ademplì chëstes condiziuns: tó ite la cualifica de diretur o direturia tla proteziun cuntra le medefüch o de espert superiur o esperta superiura tla proteziun cuntra le medefüch, o cater agn de sorvisc efetif sciöche espert o esperta tla proteziun cuntra le medefüch, o ot agn de sorvisc efetif tla cualifica de ispetur o ispeturia cuntra le medefüch dla funziun speziala dl Corp di stödafüch de profesciun dla Provinzia. Por le personal tla posiziun de ispetur o ispeturia cuntra le medefüch vëgnel implü damanè le titul de stüde y l’abilitaziun profescionala odüs danfora por la funziun de espert o esperta tla proteziun cuntra le medefüch dla funziun speziala dl Corp di stödafüch de profesciun dla Provinzia. 36)

(4)  Le comandant o la comandanta y le vizecomandant o la vizecomandanta dl Corp di stödafüch de profesciun po tó ite la direziun de ofizi dl’aministraziun provinziala tan inant che ai o ares é en possès dles condiziuns profescionales damanades. Le comandant o la comandanta dl Corp di stödafüch de profesciun po do cater agn de sorvisc te chësta funziun tó pert ales prozedöres de seleziun por la nominaziun di direturs o dles direturies de repartiziun tl ćiamp dl’aministraziun provinziala.

(1)  Dlungia i dovëis generai dl sorvisc di stödafüch ademplësc le Corp di stödafüch de profesciun les funziuns suandëntes:

1. le sorvisc cuntra le medefüch pro l’aeroport zivil de Balsan aladô dles normes statales y internazionales tl ćiamp dla segurëza ti aeroporć. Les modalitês y les condiziuns dl sorvisc mëss gnì concordades cun na convenziun aposta da stlüje jö cun la porsona che manajëia l’aeroport; ares mëss ester analoghes a chëres stabilides dales normes iuridiches statales por i aeroporć nazionai dla medema categoria;
   
2. le sorvisc tecnich por stravardè les porsones da prighi che deröia dal’adoranza dl’energia nucleara;
   
3. le sorvisc permanënt de control y de valutaziun dles situaziuns de prigo che podess gaujé situaziuns d’emergënza eventuales;
   
4. les funziuns de polizia iudiziara y aministrativa en relaziun ales competënzes dl sorvisc cuntra le medefüch por ciafè fora y ejaminé les gaujes de medefüch. Por l’eserzize de so sorvisc ti vëgnel atribuì al personal dla funziun speziala dl Corp di stödafüch de profesciun dla Provinzia la cualifica de agënt o agënta o de ofizier o ofiziera de polizia iudiziara. Le personal ciafa tesseres de reconescimënt;
   
5. sce al n’é nia n’atra regolamentaziun provinziala, eseguëscel les prescriziuns che vëgn dades fora dai organns statai competënć te materies che n’é nia de competënza dla Regiun o dla Provinzia mo che é liades al sorvisc cuntra le medefüch y antervëgn te chi caji olache la lege assegnëia funziuns al Corp nazional di stödafüch;
   
6. al dà jö arać preventifs sön proieć de condütes dal’ega, dà prescriziuns por ći che reverda le refornimënt dl’ega da destodé n medefüch y fej inće de chësc vers controi;
   
7. al é por dërt mëmber dla Comisciun por le frabiché dl capolüch dla Provinzia autonoma de Balsan;
   
8. al po ti scrì dant ai titolars o ales titolares de ativitês che é sotmetüdes ala prevenziun cuntra le medefüch de mëte jö planns d’intervënt por i stödafüch tl comun capolüch dla Provinzia y colaborëia tla redaziun di planns d’intervënt por raiuns particolars o situaziuns particolarmënter a risch de medefüch;
   
9. sön inćiaria dl Ofize provinzial dl Sorvisc di stödafüch se fistidiëiel dl’imatricolaziun di auti di stödafüch y inće dl’emisciun dles abilitaziuns a jì cun i auti dl Sorvisc di stödafüch aladô dl decret dl Presidënt dla Provinzia di 25 de forà dl 2000, n. 7, y mudaziuns suandëntes.
   

(1)  I laûrs, les acuisiziuns y i sorvisc ademplis dal Corp di stödafüch de profesciun vëgn fać de regola en economia tres le comandant o la comandanta o tres n’atra porsona da ël o ëra delegada tl cheder dl program di investimënć y di mesi finanziars autorisà dal’Aziënda speziala o dala Junta provinziala.

(2)  Le comandant o la comandanta dl Corp di stödafüch de profesciun o na porsona da ël o ëra delegada à la funziun de conservatar responsabl o de conservatara responsabla che inventarisëia i bëgns mobii che le Corp di stödafüch de profesciun à cumprè cun i fonds aministrà dal’Aziënda speziala. I bëgns assegnà o cumprà cun i fonds dl bilanz provinzial vëgn inće scrić ite tl inventar dl Corp di stödafüch de profesciun. Na fotocopia di inventars y di ajornamënć vëgn dada jö pro le secretariat dl’Aziënda speziala y pro l’Ofize patrimone dla Provinzia.

(3)  La porsona che à la inćiaria de conservatar po nominé sotconservatars o sotconservatares; a chisc o a chëstes ti vëgnel afidé i bëgns di stödafüch de profesciun.

(4)  La gestiun di laûrs y dles acuisiziuns en economia y la gestiun dl inventar vëgn regolades cun regolamënt en materia de contabilité y d’organisaziun preodü dal articul 22.

(1)  L’ativité di stödafüch é volontara y onorara y ne vëgn nia fata sciöche raport de laûr o te vigni caje nia sciöche colauraziun de laûr.

(2)  I Corps di stödafüch volontars y sües Uniuns s’orientëia ai prinzips d’autonomia de gestiun y aministraziun, de sostëgn, de tradiziun y inće de artëgn reziproch.

(3)  I Corps di stödafüch volontars y sües Uniuns eserzitëia süa ativité respetan les normes varëntes, les diretives y i statuć interns. Ai ti sotestà a livel comunal al ombolt o al’ombolta, a livel raional y provinzial ti sotestai ales istruziuns y al control dl Presidënt dla Provinzia o dl assessur competënt o dl’assessuria competënta.

(4)  Intratan l’esecuziun dl sorvisc, tolon ite inće chël a paiamënt, ne respogn i o les stödafüch, y en particolar le comandant o la comandanta dl intervënt, nia personalmënter por dagns a porsones o cosses.

(1) Tut fora d’atres desposiziuns revardëntes le Corp di stödafüch de profesciun por le capolüch dla Provinzia é vigni aministraziun comunala responsabla te so raiun comunal dl sorvisc de stödafüch che é da regolè sön la basa dles desposiziuns de chësta lege y dles diretives dades fora dal assessur provinzial competënt en materia de proteziun cuntra le medefüch y proteziun zivila. 37)

(2)  Le Consëi de comun po dè fora regolamënć por se stravardè dal prigo da medefüch y scrî dant de mëte jö planns d’intervënt por i stödafüch. Sce l’ombolt o l’ombolta vëiga ite la nezescité y l’urgënza por l’utilité publica mëssel gnì tut i provedimënć adeguà por stravardè la popolaziun dal prigo da medefüch y da catastrofes publiches.

(3) Vigni comun mët sö, do avëi aldì l’Uniun raionala di stödafüch volontars y l’assessur provinzial competënt en materia de proteziun cuntra le medefüch y proteziun zivila, almanco un o plü corps di stödafüch volontars aladô dl numer di abitanć y dla nezescité dl post. Le comun stabilësc le raiun de competënza di singui corps di stödafüch y le numer minim de stödafüch. 38)

(4)  Le statut di Corps di stödafüch volontars vëgn elaborè dal’Uniun provinziala di Corps di stödafüch volontars en colauraziun cun le Consorz di comuns y vëgn aprovè cun decret dl Presidënt dla Provinzia; al vel por düć i Corps di stödafüch volontars y contëgn normes internes por l’organisaziun y por l’eserzize dl Sorvisc cuntra le medefüch.

(5)  Sce ara ne va nia da mëte sö a livel comunal n Corp di stödafüch volontars él poscibl afidé, tres na convenziun aposta, le sorvisc cuntra le medefüch a n Corp de n comun vijin.

(6) Le sorvisc cuntra le medefüch vëgn fat diretamënter dal Corp o dai Corps di stödafüch volontars y funzionëia, a desfarënzia de d’atri sorvisc comunai, a livel aministratif y finanziar te na forma autonoma. La gestiun economich-finanziara vëgn disciplinada tl regolamënt d’esecuziun dl ordinamënt di sorvisc cuntra le medefüch y dla proteziun zivila. 39)

(7)  Sce pro n Corp di stödafüch volontars vëgnel dant iregolaritês agravantes spo po le consëi de comun, do avëi aldì l’ombolt o l’ombolta y l’Uniun raionala di Corps di stödafüch volontars, despone la scomposiziun dl Corp di stödafüch volontars.

(1)  Le comandant o la comandanta y le vizecomandant o la vizecomandanta dl Corp di stödafüch volontars vëgn proponüs dal Corp instës y nominà dal ombolt o dal’ombolta. La proposta vëgn fata tres na lîta da pert di mëmbri atifs dl Corp di stödafüch volontars tignin cunt dl’idoneité y dla partezipaziun ai cursc d’adestramënt preodüs dala Scora di stödafüch provinziala. Tl caje de gran violaziuns di dovëis d’ofize po le consëi de comun trà zoruch cun na deliberaziun iustificada les funziuns de comandant o comandanta y de vizecomandant o de vizecomandanta dl Corp di stödafüch volontars.

(2)  Le comandant o la comandanta dl Corp di stödafüch volontars fej pert por dërt dla comisciun por le frabiché y olache ara esist dla comisciun cuntra le medefüch dl comun respetif y inće dl zënter operatif comunal. Sce al esist tl medemo comun plü Corps di stödafüch volontars spo po n comandant deleghè o na comandanta delegada o le comandant competënt o la comandanta competënta te chël raiun fà pert dles comisciuns nominades chilò dessura.

(1) Sce n inzidënt de sorvisc o na maratia ciafada intratan le sorvisc de stödafüch, o a gauja de chësc, porta ala mort o a na invalidité permanënta o temporana paia la repartiziun competënta en materia de proteziun cuntra le medefüch y proteziun zivila, aladô di criters y dles modalitês determinà dala Junta provinziala, na soma sciöche indenisaziun por le dann albü a bëgn dl stödafüch volontar inzidentè o püre o dla stödafüch volontara inzidentada o püra, o a chi che à la rajun. 40)

(2)  La soma paiada ne vel nia sciöche tratamënt economich por maratia o inzidënt y é acomulabla cun les formes desvalies, volontares o obligatories, de previdënza o assistënza economica a chëres che ara vëgn injuntada.

(3) I imporć paià ne po nia ester mëndri di imporć che vëgn paià dal Istitut Nazional por l’Assiguraziun cuntra i Inzidënć sön le Laûr. 41)

(4)  Por podëi fà pert dl sorvisc atif di stödafüch adora düć i mëmbri dl Corp di stödafüch n zertificat de idoneité dl dotur; por podëi eserzité ativitês particolarmënter prigoroses sciöche l’adoranza de mascheres de respiraziun o cosses analoghes vëgnel scrit dant na vijita da n dotur spezialisé o da na doturia spezialisada inće cun analises de laboratore y/o analises stromentales.

(5)  Les porsones indicades ti articui 18 y 32, coma 10, é parificades ai mëmbri di stödafüch.

(6) Pordüdes de davagn o de paiamënt relevantes da reportè a intervënć ti vëgn rembursades, sön domanda dla porsona interessada, ai stödafüch volontars dal comun y dala repartiziun competënta en materia de proteziun cuntra le medefüch y proteziun zivila ai funzionars dles Uniuns preodüdes dal articul 2, coma 3. Te chësc ultim caje vëgn la retüda fata aladô di criters y les modalitês determinades dala Junta provinziala. 42)

(1) Le comun mët a desposiziun di Corps di stödafüch volontars i locai adatà por che ai pois eserzité so sorvisc cuntra le medefüch te na manira adeguada, al se crüzia dl’istalaziun y dla manutenziun di idranć de strada, dl refornimënt dl’ega plü adatè ales nezescitês locales y inće d’arjigné ite implanć d’alarm en conformité ales normes diretives dades fora dala Junta provinziala. Por chësc fin po les aministraziuns de comun damanè alisiraziuns y contribuć odüs danfora da chësta lege y dales normes dla Provinzia. 43)

(2)  Tut fora desposiziuns desfarëntes, é düć i cosć nezesciars por l’ativité dl Corp di stödafüch volontars a ćiaria dl comun; al surantol inće les spëises por l’acuisiziun y la manutenziun dles atrezadöres y dl echipamënt.

(3)  Pro l’emisciun de conzesciuns, reconescimënć y renovamënć di dërć por l’utilisaziun d’eghes publiches mëssel gnì garantì la cuantité d’ega nezesciara por les operaziuns cuntra le medefüch.

(4)  Sön dötes les contestaziuns che vëgn fates por gauja dles spëises albüdes pro intervënć, che chësta lege mët a ćiaria di comuns o de privać, tol na dezijiun la Junta provinziala sön tru aministratif.

(5)  La partezipaziun al finanziamënt dles spëises ordinares di bilanc di Corps di stödafüch volontars istituida aladô dl articul 1 dla lege regionala di 14 de jenà dl 1978, n. 1, vëgn tuta jö y porchël resta les spëises ordinares che va sura les entrades ordinares fora a ćiaria dles aministraziuns de comun competëntes por le raiun.

(6)  I bilanc di singui Corps di stödafüch volontars che vëgn elaborà dai comandanć y dales comandantes vëgn aprovà dal consëi de comun competënt. Cun l’aprovaziun di bilanc aprovëia i comuns inće le finanziamënt dles spëises che é odüdes danfora por le consum, la manutenziun y inće por la sostituziun d’atrezadöres y dl echipamënt di Corps di stödafüch volontars.

(1) L’assessur provinzial competënt en materia de proteziun cuntra le medefüch y proteziun zivila po conzede contribuć, sostëgns y finanziamënć aladô di criters suandënć:

1. ai Corps di stödafüch volontars ti pol gnì conzedü contribuć por investiziuns ćina al 80 por cënt dles spëises reconesciüdes por l’acuisiziun y la manutenziun straordinara di injins en dotaziun; les atrezadöres cuntra sostanzes prigoroses y inće les atrezadöres speziales di singui punć de sostëgn raionai po gnì finanziades ćina al 100 por cënt;
   
2. al’Uniun provinziala di Corps di stödafüch volontars, ales Uniuns raionales di Corps di stödafüch volontars, ala Scora di stödafüch provinziala y ales sozietês cooperatives cun responsabilité limitada di Corps di stödafüch volontars ti pol gnì conzedü finanziamënć ćina al 100 por cënt dles spëises ordinares y straordinares sön presentaziun dl preventif dla spëisa;
   
3. ales Uniuns raionales y ai Corps di stödafüch volontars ti pol gnì conzedü sostëgns por la gestiun y manutenziun ordinara dles atrezadöres di punć de sostëgn raionai.  45)
   

(2)  Ai Corps di stödafüch volontars che à so raiun de competënza te na zona incadrada sciöche zona dejavantajada aladô dl regolamënt dla CEE n. 1257/99, y mudaziuns suandëntes, po les limitaziuns dl contribut preodü dal coma 1, lëtra a), gnì alzà dl 10 por cënt dles spëises reconesciüdes.

(3) 46)

(1)  Por garantì le coordinamënt y l’organisaziun dl sorvisc, por promöie le spirit de solidarieté, por aumentè l’interès general se mët adöm i Corps di stödafüch volontars te Uniuns raionales y tl’Uniun provinziala. Al é poscibl costituì na sozieté cooperativa.

(2)  Les modalitês d’istituziun, i organns, les competënzes dles singules strotöres y süa organisaziun vëgn stabilis tl statut respetif che vëgn elaborè dal’Uniun provinziala y aprovè cun decret dl Presidënt dla Provinzia.

(3)  La lîta di funzionars y dles funzionares dles Uniuns raionales y dl’Uniun provinziala vëgn fata aladô dl statut y la nominaziun vëgn fata dal Presidënt dla Provinzia o dal assessur competënt/dala assessuria competënta. Tl caje de de gran violaziuns di dovëis d’ofize po la Junta provinziala revochè cun deliberaziun motivada les funziuns di funzionars y dles funzionares dl’Uniun provinziala y dles Uniuns raionales. 47) 

(1) La Junta provinziala stabilësc ći aziëndes, industries, magazinns y frabicać analogs che mëss avëi n so sorvisc de prevenziun dal medefüch y d’intervënt, la mosöra minima de chësc sorvisc, les carateristiches di implanć y di materiai y tan de mëmbri di stödafüch che mëss ester tresfora presënć tl’aziënda intratan i orars de laûr. I cosć relatifs é a ćiaria dl’aziënda. 48)

(2) Les scuadres é metüdes adöm dal personal dependënt dl stabilimënt che é adatè al sorvisc cuntra le medefüch. Ares depënn dal datur de laûr o dala daturia de laûr che à la responsabilité dan dal Comandant dl Corp permanënt di stödafüch, che fej le control tecnich. L'istruziun tecnica po gnì fata dala Scora di stödafüch provinziala preodüda dal articul 55. 49)

(3)  Pro intervënć particolarmënter ris vel le prinzip d’aiüt y de sostëgn reziproch preodü dal articul 32; porchël po le comandant o la comandanta dl intervënt o l’ombolt o l’ombolta damanè l’intervënt dles scuadres di stödafüch aziendales inće defora dal’aziënda. Les spëises relatives é te chësc caje a ćiaria dl comun olache al é stè l’intervënt. Al vëgn inće apliché l’articul 49, comes 1, 2 y 3.

(1)  La Junta provinziala é autorisada a inćiarié l’Uniun provinziala di Corps di stödafüch volontars o n ater ënt adatè ala gestiun dla Scora di stödafüch provinziala che organisëia y tëgn cursc de formaziun teoretics y pratics por i comëmbri di Corps di stödafüch.

(2)  La formaziun po inće tó ite periodes d’istruziun te istituziuns, scores y zëntri de formaziun fora de Südtirol o foradecà.

(3)  La Scora di stödafüch provinziala po inće tignì cursc cuntra le medefüch y de proteziun zivila y cursc de segurëza sön le laûr ti ćiamps desvalis preodüs dales leges varëntes en materia. 50)

(4)  Por les ativitês preodüdes dai comes 1, 2 y 3 é la Scora di stödafüch provinziala reconesciüda sciöche scora adatada a tignì les ativitês de formaziun aladô de chësta lege.

(5)  La Scora di stödafüch provinziala relascia zertificać de frecuënza y, do avëi dè jö i ejams, inće diploms legalmënter varënć.

(6)  La formaziun é debann por i volontars y les volontares che fej pert dles organisaziuns dl sorvisc cuntra le medefüch y de proteziun zivila.

(7) L’assessur provinzial competënt en materia de proteziun cuntra le medefüch y proteziun zivila se fistidiëia da finanzié i cursc de formaziun, eserzitan tres la repartiziun competënta te chësta materia funziuns de control por ći che reverda süa realisaziun regolara; implü pol inće autorisé l’atuaziun de cursc a paiamënt. La junta provinziala definësc les tarifes y stabilësc l'adoranza dl complès imobiliar, fissan les tarifes eventuales.51) 

(8) Por l’ativité de formaziun dla Scora di stödafüch provinziala ti speta al ënt inćiarié la retüda dles spëises che ti corespogn al preventif aprovè dal assessur provinzial competënt en materia de proteziun cuntra le medefüch y proteziun zivila. Te 30 dis dal mëteman dl ann de scora inant ti vëgnel dè al ënt inćiarié n’antizipaziun dl 40 por cënt dl preventif de spëisa aprovè. N’atra antizipaziun dl 30 por cënt vëgn conzedüda do sis mëisc. La licuidaziun dl import che resta gnarà fata do la presentaziun dl cunt consuntif regolar che mëss gnì aprovè dala repartiziun competënta en materia de proteziun cuntra le medefüch y proteziun zivila. 52)

(9) Le program y le preventif dles spëises ti mëss gnì presentè ala repartiziun competënta en materia de proteziun cuntra le medefüch y proteziun zivila ćina al pröm d’otober dl ann denant. 53) 

(10)  Por tignì les ativitês dla Scora di stödafüch provinziala y dles Uniuns di Corps di stödafüch volontars preodüs dal articul 2, coma 3, vëgnel metü debann a desposiziun dl ënt inćiarié i imobii cumprà por chësc fin dala Provinzia autonoma de Balsan.

(11)  La manutenziun ordinara dles strotöres aladô dl coma 10 ti speta al ënt inćiarié; la manutenziun straordinara y dötes les spëises che deröia dal’aplicaziun dl decret legislatif di 19 de setëmber dl 1994, n. 626, é a ćiaria dl bilanz dla Provinzia; i laûrs po gnì fać dal ënt inćiarié y les spëises albüdes ti gnarà retüdes.