(1) Sce la porsona che surantol le lüch trasferësc tl tëmp de diesc agn do la mort dl testadù o dla testadëssa le dërt de proprieté dl lüch o de perts dl lüch tres un o plü ać inanter vis a terzi mëssel paié ala massa ereditara por la divijiun complementara dl´arpejun la desfarënzia inanter le profit da podëi arjunje cun la venüda y le prisc d´assunziun. Por perts dl lüch vëgnel calcolè aladô dla relaziun inanter le prisc d´assunziun dles perts y chël dl lüch intier. Dal profit da podëi arjunje él da trà jö le valur de comedöres desvalies fates dala porsona che à surantut le lüch.
(2) Le dërt de damanè la divijiun complementara dl´arpejun ti speta ai coarpadus y ales coarpadësses y a sü descendënć o sües descendëntes tut fora les desposiziuns de lege söla divijiun dl´arpejun ordinara.
(3) L´oblianza ala divijiun dl´arpejun complementara vel inće tl caje de n´alienaziun sforzada o de n´espropriaziun dl mêsc stlüt o de tòć de chësc. Te de te´caji por la divijiun complementara dl´arpejun é determinanć le prisc arjunt pro la lizitaziun o l´indenisaziun d´espropriaziun.
(4) Sce la porsona che à surantut le lüch à intenziun tl tëmp de dui agn da canche al é gnü sö l´oblianza ala divijiun complementara dl´arpejun de cumprè tla provinzia de Balsan n ater lüch dal medemo valur o tòć de terac agricoi o forestai destinà a gnì integrà pro le lüch o ô investì le davagn te comedöres straordinares, spo pol/pora sospëne por le medemo tëmp le dovëi de paié fora i coarpadus y les coarpadësses y plü tert trà jö les spëises albüdes a condiziun che al/ara informëies atira i coarpadus y les coarpadësses sura l´alienaziun, l´alienaziun sforzada o l´espropriaziun y garantësces ai coarpadus y ales coarpadësses i dërć che ti speta por la perioda dita chilò dessura.
(5) L´oblianza ala divijiun complementara dl´arpejun vel inće por le lüch y i terac cumprà aladô dl coma 4.
(6) La divijiun complementara dl´arpejun aladô dl coma 1 ne vëgn nia a s´al dè sce le mêsc stlüt vëgn lascè a parënć o parëntes en ligna direta, o al om convivënt o ala fomena convivënta dla porsona che surantol le lüch. Le dërt ala divijiun complementara dl´arpejun resta indere impé por la porsona nöia che surantol le lüch por le tëmp che resta ćina al decurs di diesc agn.