(1) Tl caje che le defunt n´ides nia determiné la porsona che dess surantó le lüch y plü porsones inanter chëres che al é almanco un n arpadù legal o n´arpadëssa legala é cherdades ala sozesciun ereditara vëgnel apliché les normes aladô di articui 14 y 20. Le dërt dl testadù o dla testadëssa de stlüje fora determinades porsones cherdades ala sozesciun dala surantuta dl lüch ne vëgn nia aziché.
(2) Sce le testadù o la testadëssa à cherdè ala sozesciun ereditara plü porsones zënza determiné la porsona che dess surantó le lüch y sce degöna de chëstes ne toma ite sot a chëres indicades tl articul 14 spo po vigni arpadù o arpadëssa cherdè/dada ala sozesciun damanè la divijiun dl´arpejun y la nominaziun dla porsona che surantol le lüch tres signoria, sce tl tëmp de n ann dala devoluziun dl´arperjun n´ài nia arjunt n´acordanza por ći che reverda la surantuta dl lüch.
(3) Por la determinaziun iudiziara dla porsona che surantol le lüch él damanè l´arat dla comisciun locala por i mêsc stlüć che mëss tignì cunt dla idoneité dla porsona che surantol le lüch a le manajè personalmënter.
(4) Sce al ne vëgn nia arjunt n´acordanza por ći che reverda le prisc d´assunziun vëgn chësc stabilì aladô di articui 20 y suandënć.
