c) Lege provinziala di 28 de novëmber 2001, n. 171)
Lege söi mêsc stlüć

(1)  Tl caje de legitima sozesciun ereditara vëgn la porsona che surantol le mêsc stlüt determinada aladô dl codesc zivil danter i arpadus y les arpadësses cherdà en chestiun; sce al manćia n´acordanza inanter chisc agësc la signoria aladô de chisc prinzips:

1. i coarpadus y les coarpadësses che crësc sö o che é chersciüs/üdes sö sön le lüch à la prezedënza ti confrunć di atri coarpadus y dles atres coarpadësses;
2. inanter plü coarpadus o coarpadësses che crësc sö o che é chersciüs/üdes sö sön le lüch à la prezedënza chi o chëres che ti ultimi dui agn dan la daurida dla sozesciun ereditara à partezipé por usanza ala conduziun y ala coltivaziun dl lüch;
3. inanter plü coarpadus o coarpadësses che ademplësc les condiziuns odüdes danfora dales lëtres a) y b) vëgnel preferì chi o chëres che é en possès de n diplom de scora profescionala por agricoltöra o economia de ćiasa reconesciü a livel statal o provinzial o de n´atra formaziun adatada reconesciüda dala Provinzia;
4. i descendënć o les descendëntes che crësc sö o che é chersciüs/üdes sö sön le lüch cun intlujiun di mituns adotà o dles mitans adotades y chi che i o les rapresentëia vëgn preferis/ides ala porsona maridada che é restada; mo chësta ultima vëgn preferida a düć i atri parënć o a dötes les atres parëntes sce dal´ultima assunziun dl lüch él passè cin agn o sce da almanco cin agn àra colaurè ala conduziun dl lüch conscidran i laûrs te ćiasa sciöche colauraziun ala conduziun dl lüch;
5. inanter plü coarpadus o coarpadësses cun i medemi dërć aladô dles lëtres dala a) ćina d) vëgnel preferì i parënć o les parëntes de degré de parentela plü dlungia;
6. sce le defunt o la defunta ne lascia zoruch no descendënć/descendëntes no fomena o om y à arpè le lüch o gran pert de chësc da un di geniturs o tres n at iuridich che antizipëia la sozesciun ereditara vëgnel apliché sce al é plü porsones dl medemo degré de parentela i criters aladô dles lëtres a), b) y c);
7. 13)

(2)  Sce degügn di coarpadus o dles coarpadësses ne ademplësc les condiziuns odüdes danfora dal coma 1 vëgnel chirì fora, do avëi ascutè i coarpadus y les coarpadësses y la comisciun locala por i mêsc stlüć, sciöche porsona che surantol le lüch chël o chëra che desmostra d´avëi les mius condiziuns por la conduziun direta dl mêsc stlüt.

(3)  Dal dërt de surantó le lüch vëgnel stlüt fora chi coarpadus y chëres coarpadësses che é limità/ades o é gnüs/üdes detlarà/ades interdić/ites o assistis/assistides da n aministradù de sostëgn. 14)

(4)  Tl caje de mort passa le dërt d´assunziun ciafè ai descendënć o ales descendëntes y al om o ala fomena de chëra o chël che à le dërt d´assunziun; tla cerna dl coarpadù o dla coarpadëssa che surantol le lüch vëgnel apliché aladô dl significat i criters sciöche dai comes 1 y 2.

(5)  Sce chël o chëra che é cherdè/dada a surantó le lüch se un desdij dl tó, passa la preferënza ai atri coarpadus o ales atres coarpadësses y al vëgn apliché i criters aladô di comes 1 y 2.