(1) Por la reparaziun o la recostruziun di frabicać d’abitaziun aladô dl articul 30, coma 2, lëtra a) vëgnel conzedü contribuć de n iade te na mosöra dal 30 al 70 porcënt dles spëises ametüdes.
(2) Le limit mascimal dles spëises ametüdes por la reparaziun o la recostruziun é metü adöm dai cosć de costruziun convenzionai dl frabicat dortoré o fat sö danü, calcolà aladô dl articul 7 y che ne po te vigni caje nia jì sura i cosć de costruziun por lege de n cuartier popolar cun na spersa convenzionala de 160 metri cuadrać.
(3) Por spëises majeres gaujades dal fat de messëi respetè i lians metüs dant dales normes por la sconanza y la conservaziun dl patrimone storich, artistich y popolar y de chëres sön la sconanza dla contrada, aumentëia le contribut dl 25 porcënt.
(4) Sce sön le frabicat danejè o desdrüt da na catastrofa naturala él na ipoteca por n imprëst tut sö por la costruziun dl frabicat instës vëgnel conzedü n contribut de n iade por paié les rates che toma tratan le tëmp nezesciar por fà i laûrs de reparaziun o de recostruziun che po ester al mascimo de dui agn.
(5) Pro la conzesciun di alisiramënć aladô dl coma 1 vëgnel tut en conscidraziun le davagn complessif dla familia determiné aladô dl articul 58.
(6) Al vëgn inće conzedü i alisiramënć sce le damanant à intenziun de cumprè n’abitaziun popolara impede fà sö danü le frabicat desdrüt dala catastrofa naturala. Por gauja di cosć de spersa y de urbanisaziun che röia laprò vëgn le contribut aumentè dl diesc porcënt.
(7) Sce na pert dl frabicat danejè o desdrüt é gnüda dada en afit a na picia dita aladô dl articul 2083 dl codesc zivil por l’eserzize d’ativitês economiches vëgn i alisiramënć por la recostituziun de chësta pert dl frabicat dà al proprietar, mo la destinaziun d’adoranza originara mëss restè anfat.
(8) I contribuć de n iade por mosöres de segurëza geotecnica vëgn conzedüs tla mosöra dl 70 porcënt di cosć lascià pro.40)