b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré

(1) Te chisc caji vëgn l’assegnaziun detlarada sciöche tomada:

1. sce anter n ann da canch’al é gnü dè fora le zertificat de abitabilité ne vëgn l’abitaziun fata sö sön la spersa assegnada nia ocupada dala porsona che à ciafè l’assegnaziun o dada en afit aladô dl articul 86;
2. sce l’abitaziun vëgn afitada en contradiziun cun les normes dl articul 86;
3. sc’al vëgn mudé la destinaziun d’adoranza dl’abitaziun o de na pert de chësta, en contradiziun cun la deliberaziun d’assegnaziun y al n’é nia plü poscibl jì derevers ala condiziun da denant;
4. sc’al ne vëgn nia respetè i terminns aladô dl articul 83, coma 1, lëtra c);
5. sce les atres oblianzes odüdes danfora tla deliberaziun d’assegnaziun ne vëgn nia respetades;
6. sce l’assegnatar ne vir nia veramënter y tres tl’abitaziun por la dorada dl liam preodü dal articul 86. 135)

(2) I fać che à sciöche conseguënza la tomanza dl’assegnaziun vëgn constatà cun deliberaziun dla Junta comunala y à da gnì contestà dal ombolt ala porsona che à ciafè l’assegnaziun tres lëtra racomanada cun recioiüda derevers cun l’invit a dè jö anter 60 dis deduziuns decuntra documentades te na manira adeguada.

(3) Do che le terminn dè dant tl coma 2 é passè pronunziëia la Junta comunala la tomanza dl’assegnaziun dla spersa. Cuntra la deliberaziun dla junta comunala pol gnì fat recurs ierarchich tl tëmp de 30 dis dala comunicaziun ala Junta provinziala che tol na dezijiun definitiva. La detlaraziun definitiva de tomanza dl’assegnaziun comporta che la spersa assegnada y i frabicać che é gnüs fać sö lassura po gnì esproprià. Sön domanda dl comun dà fora le Presidënt dla Junta provinziala le decret d’espropriaziun.

(4) I comesc 2 y 3 vëgn inće aplicà tl caje de renunzia al’assegnaziun.

(5) Les desposiziuns di articui 82, 83, 84, di comesc 1, 2, 3 y 4 de chësc articul sciöche inće dl articul 86 vëgn aplicades tl caje d’assegnaziun de sperses por le frabiché abitatif alisiré da pert dl’aministraziun provinziala o dl IPFS; te n te’ caje röiel ite impede la Junta comunala la Junta provinziala y le Consëi d’aministraziun dl IPFS.